====== 4. Abrama hnianga Pathian thutiam====
Tuilian hnung, kum tamka hnung chun khawvela hin mi an hong tam nawk ta a, tong khatkan an tonga. Changhomsiala Pathianin thu a pek angkataka luasip hnekin hmunkan an om khawma, khawpui an siam ta zawka.
Mihriam hei chu an inuang fe a, Pathian thu hom an ngaisak tak naw a. Rivan phak daika khopin tlirna in insang feka an bawl tan ta a. Hmunkan an om hoia, sin an thaw lai chun thil thaloi tamka thawngan tih ti Pathianin a hmu a.
Kachun an tong chu Pathianin an dangtira, tong dang dangin an tongtira, khawvel pumpuia an dartir ta a. Khawpui an ibawl chu a rihming Babel an saka, a omzia chu ‘lunginzingna, buaina, inramna’ tina a chang.
Kum riza tamka hnung chun Pathianin Abrama hnianga chun thu a hril a. Pathianin, “Ni khua nih ni suapui hei atang chun suak inla, Ram nang ki lan entir ding tiang chun kal rawh. Mal nangsawm ki ti a, hnam roiinpui fekan nang siam ki ti a, ni rihming roiinpuitir ke tih. Mal nang sawmpu hei phot chu mal sawm ki ti a, tongsia nang inpelpu chu tongsia inpel ke tih. Nangma a chun hnamtin la thawveng an tih,” a ti a.
Kachun Abrama chun Pathianin a hnianga thu a hril chu a zawm ta a. A nupui Saraii nih a siahlaw hei kapai nih a thil nei kapai ni chun Pathianin ram a inentir, Kanan ram tiang chun a kal ta a.
Abrama chun Kanan ram a thlung kani chun Pathianin a hniangah, “Tlir inla, hei en vel ta, Ram ni hmu phak kapai ari chu nang nih ni thlahei hniangah roi dingin nangni peng ke tih,” a ti a. Abrama chun ma rama chun omhmun a khuar ta a.
Nika chu Abraman Melkizedeka, Pathian thiampu chu an tongpuia. Melkizedeka chun Abrama chu mal a sawm a; “Pathian chunginung chem rineng nih rivan neitu chun Abrama chu mal sawm rise,” a ti a. Kachun Abrama chun a thilnei kapai atang chun sawmapakhat chu Melkizedeka hniangah a pe ta a.
Kum tamka a ral hnung hom chun Abrama nih Saraiin chun nai ipa an la nei nai naw a. Pathianin Abrama hniangah nai ipa nih rivana arsi zaka ni thla hei la chang an tih ti in a atharin an tiam nawka. Pathian thutiam chu Abraman a ringa. Pathian thutiam Abraman a ring leiin Pathianin Abrama chu mifelin a ruat ta a.
Kachun Abrama hniangah Pathianin thuthlung a siam ta a. Thuthlung hi pawl inhnika karah siam a chang thina. Pathianin, “Ni thalbe atang ngeiin naipa nang peng ke tih. Kanan ram chu ni thla hei hniangah ke pe ding a chang,” a ti a. Changhomsiala, Abrama chun nai ipa ala nei naw a.
A Bible story from: Genesis 11-15