8. Pathianin Josefa nih a insûnghei a sanhimna

Kum tamka a liama, Jakopa chu a hong tar hnung chun a hmangai êm êm Josefa chu ram hla fêka hmunah a urêngpui ran hre hei chu va hmu dingin a tir ta a.

An pa in an lai katia, a duat bîk lei nih a rimanga a hmu angkan an chunga roirêltu la hong changa tih ti an hmu leiin Josefa chu a urêngpuihei chun a hnel ta fê a. Kachun an hniangah ava tlung chun a urêngpui hei chun an loi hmana, Ismael khual inzin hei hnianga chun an zuar ta a.

A urêngpuihei chu an in tiang an kîr hma in a zakaw fual chu an thlêr pêk a, kel thisena chun an hnawka, in an tlung chun an pa Jakopa hnianga anin hmu a; ramsa in a eia, a that ngei a chang ti anin ringtir ta a, kachun Jakopa chu a lungai ta êm êm a.

Ishmael khual inzin sumdawng hei chun Aigupta rama an ṭhui a. Aigupta ram chu ram lian nih thil thawthei fe a chang a. Nile tuidung hrîla om a chang. Ismael khual inzin sumdawnghei chun Aigupta ram Sorkar milian inah chun sala om dingin Josefa chu an zuar ta a. Josefa chun a pu rong chu fel vaika nih ringom fêkan a bawl pêka, Pathianin Josefa chu mal a sawm tir a.

A pu nupui chun Josefa chu zâlpui a tuma, changhomsiala Josefa chun Pathian hma ah mankata sual chu a thaw awi naw leiin a hnial ta a. Ma nupang chu a ning a thika, Josefa chu lung ina khum dingin khêlin a hêka. Lung ina a om sûng hom chun Josefa chun Pathian hma ah ringom vaikan a om tir a, Pathianin mal a sawm tir ta zawk a.

Josefa chu ân sualna a om naw homin kum inhnika lai lung ina chun ala tâng ta rêt a. Zanka chu Aigupta lal Farawa an iti chun rimang inhnika a nei a, a rimanghei chun a lungril ân sawl tirin a bei ân dong ta fe a; a khawnbawl laia mi tuhomin a rimang omzia chu a hril fia pêk thei an om naw a.

Pathianin Josefa chu rimang hrilfia theina a pêk a, Kachun Farawa chun Josefa chu lungina ṭang chun a zu ṭhui suaka. Josefa chun Farawa rimanghei chu a hrilfia pêk ta a. “Pathianin kum ṭhat kum, inchong kum, kum sari hong intlungtir a ti a, ma hnung chun kum ṭhaloi kum, kum siat kum, kum sari in zui thai a tih,” a ti a.

Farawa chun Josefa chu a lungril chun a ring zoi ta fê a, Aigupta ram pumpuia chun Farawa dottpu, thuneipu chemin a siam ta a.

Josefa chun kum sari kum ṭhat kum chun fak ding a tam thei angka chema sawk dingin mipui hei chu a hril a. Kachun kum sari ṭâm kum sûnga an fâk ding bu a siakhawm hei chu mihei hnianga chun a zuar ta a.

Ṭâm chu Aigupta ram chaia a thlâk naw a, Jakopa omna ram Kanan ram homa a thlâk a.

Kachun Jakopa chun a nâihei chu nêk ding an nei theina dingin bu inchaw dingin Aigupta rama chun a tir ta a. Bu inchaw dinga Josefa hma ah an ngîr lai chun an nâibungpa Josefa a chang ti an hawi naw a. Josefa raw chun anni chu a loi hawi mai a.

An lungril a danginlam ta maw tia a fia hnung chun “Nin unâipa Josefa ha ke chang; ṭi naw unla, inlai riai naw roi. Sal angkan anni zuara, thilsual nin thaw a, changhomsiala Pathianin thil ṭhaloi chu thil ṭha in a siam a chang hi; nangmani nih nin insûnghei chu hong ṭhui unla Aigupta rama hin nangni ki enkol theina dingin hong roi,” a ti a.

Josefa urêngpui hei chun in an tlung hnung chun an pa Jakopa hniangah Josefa ha ala dam ti an hril chun a lawm ta fê a.

Jakopa chu tar fê chang ta homsiala, a insûnghei rêk chun Aigupta ram tiang chun an kal ta a. Ma hmuna chun an om ta a. A thi hma in Jakopa chun a nâihei chu an rêngkan mal a sawm ṭianga.

Thuthlung thutiam chu Abrahama hnianga Pathianin ân tlunga, kachun Isaka hnianga pêk nawk a changa, ma zoi chun Jakopa hnianga pêk a chang nawk a. Kaden chun Jakopa nâihei nih an nâihei hnianga pêk sawng tir a changa. A nâi sawmhlei inhnika hei ha Israel hnam sawmhlei inhnika hei chu an chang.

Bible a mi chanchin: Genesis 37-50