5.Thutiam Naipa chu

Genesis bung 16-22 atanga Bible chanchin lâksuok

Abrama nih Saraii chu Kanan rama an lut kum sawm hnung homin nai an la nei vu nai naw a. Abrama nupui Saraiin Abrama hnianga chun, “Pathianin nai ani pe phal nghal naw a, tun hinle nai nei dingin ki tar ta nghala, mahin ki siahlawnu Hagari chu a om hi, nai e neipek dingin nupuiin nei mai rawh,” a ti a.

Kachun Abrama chun Hagari chu nupuiin a nei ta a. Hagari chun nai ipate a neia, a rihming chu Abrama chun Ismaela ti in a saka. Changhomsiala, Saraiii chun Hagari chu a thik ta fe a. Ismaela chu kum sawmhlei kum inthumka a hong tling chun Pathianin Abrama hnianga kahin thu a hril nawk ta a.

“Pathian ipai thawthei ke chang. Ei inkarah thuthlung ke siam ding a chang hi,” ti in. Kachun Abrama chu rinenga a bokkhup ta a. Pathianin a hniangah, “Hnam tamka pa la hong chang ne tih. Nang nih ni thlahei hniangah ni roichan dingin Kanan ram hi nang peng ki ti a, chatuanin an Pathian chang ke tih. Ni insunga nai ipa piang taphot chu an ser ne tan pek ngei ngei ding a chang,” ti in.

Ni nupui Saraii chun nai nei a ti a, thutiam naipa ting an tih. A rihming Isaka ti in sak rawh. Ki thuthlung chu a hniangah om a ti a, hnam roiinpui feka la hong chang a tih. Ismaela hom hnam roiinpui fekan siam ke tih, changrawchu ki thuthlung chu Isaka reka inkar chai chang a tih. Kachun Pathianin Abrama rihming chu a thleng peka, Abrahama a sak ta a, a omzia chu ‘mi tamka pa” tina a chang. Pathianin Saraii rihming hom a thlenga, Sari ti in a saka, “lal nainu” tina a chang.

Mankachun Abrahama chun a insunga ipa kaphot ser chu a tan pek ta a. Kumka hnunga chun Abrahama chu kum 100 a ulian a hong chang ta a. Sari hom kum 90 a hong kai chun Sari chun Abrahama chu nai ipa a nei pek ta a. Pathianin a hril angka han a rihming chu Isaka a sak ta a.

Isaka chu thleirawlte a hong chang chun Pathianin Abrahama chu a ringna fiana dingin, “Ni naipa neiun ha hruai inla, ki dingin hring inthawina dingin maicham chungah inhlan rawh,” a ti ta a. Abrahama chun Pathian thuhril chu a zawm ta a, a naipa chu maichama Pathian hniangah inthawina dingin a buatsai a.

Abrahama nih Isaka chu inthawina ding hmun tiang chun an kal laiin Isakan, “Pa, inthawina dingin thing a oma, pumrawhmang inhlan dingin berate chu iten mawh a om?” a ti a. Abrahama chun, “Ki naipa, inthawina ding berate chu Pathianin ngaitua fawm mai a tih,” ti in a thunga.

Inthawina ding hmun an thlung chun Abrahama chun a naipa Isaka chu a phiara, maicham chunga chun an zaltira, a naipa that dinga chemte an lang lai chun Pathianin Abrahama hnianga chun, “Thaw naw rawh, naipang chunga han kut thla naw rawh. Tun chun ani ti leiin ni naipa neisun hom ki ta dingin ne pe phal a chang ti ki hawi ta,” a ti a.

Abrahama chun a hang en vel a, a hnung tiang chun bera chal, a riki thing tanga loi intang hi a hang hmu a. Isaka thlengin inthawina dinga Pathianin a loi ibuatsai pek a chang. Kachun himvaikan Abrahma chun inthawina dingin bera chal chu a hmang ta a.

Mankachun Pathianin Abrahama hniangah, “Thil ikapai, ni naipa neisun ari hom ani pek phal leiin mal nang sawm ngei ngei ke tih. Ni thla hei hom rivana arsi zakan inpungtir ke tih. Ki thu ni zawm leiin ni thla a chun khawvela chitin hei chu la thawveng an tih,” a ti a.

A Bible story from: Genesis 16-22