20. Qafadonna Qafadotenni Higa
Israeelete gashshootinna Yihudu gashshooti lamunku Maganu aana cubbo loossu. Maganu insa ledo Siina Ilaalira eino gondooro diiggu. Maganu cubbo ifaaxxitanno gedenna galagalte magansidhanno gede himanaano soyi; insa kayinni hajajama gibbino.
Kunnira Maganu diininsa gudannonsa gede asse lamenka gashshoote qorichishi. Wolqaataamu, mararannokkihu Asoori moote gashshooti Israeelete gashshoote huni; ayirrado coye baala adhi; gobbanniha roore darate giiri.
Asoorootu gashshaano dureeyyenna ogimma afidhinore baala gamba assite Asoori haadhe hadhinonsa. Shinoonnikkiri buxane Israeelooti callu Israeelete gashshooti giddo gattino.
Hakkunni gedensaanni Asoorootu Israeelete gashshoooti noo gobbara heedhanno gede wole gobba manna haadhe abbitu. Wole gobba manni diigantino katamma galagalchite minte hakkiicho gatte noo Israeelootu ledo balloontino. Wole gobba manni ledo adhantino Israeeloota Samarootaho yinoonni.
Israeelete gashshooti manni Magano ammaninokkihuranna hajajaminokkihura asse qorichishinonsa gara Yihudu gashshooti giddo noo manni afino. Hattono Ikke hee’reenna Yihudu gashshooti manni aanaho Kana”aanootunnitano lede kaphu maganna magansi’rino. Maganu qorophisiissanno himanaano soyinonsa. Isna kayinni macciishsha gibbino.
Asoorootu Israeelete gashshoote huntuhunni 100 diri geeshsha ikkitanno yanna gedensaanni Yihudu gashshoote qassanno gede Maganu Baabiloonoota soyi. Baabilooni wolqaataamu moote gashshooteeti. Yihudu moote Nabukadanatsoori soqqamaancho ikkatenna diru dirunkunni woxe baatate sumuu yii.
Ikkollana shiimu diri gedensaanni Yihudu moote Baabilooni aana kai. Kunnira Baabiloonootu galagalte higge Yihudu gashshoote qassu. Yerusaalamete katama amaddu; Qullaawa Mine diiggu. Katamunnitanna Qullaawu Mini taje baala adhitu.
Yihudu moote gara giwinosi daafira qorichishate Nabukadanatsoori gaaddo Yihudunnita labballi ooso baala shitu. Isono ille ballissu. Hakkunni gedensaanni Baabilooni usuru mine reyanno gede haadhe hadhu.
Nabukadanatsoorinna olantosi lowo geeshsha buxane ikkino manna calla Gate loosanno gede agurte Yihudu gashshooti manna baala qafadde Baabilooni haadhe hadhu. Maganu manni hexxote gobba baxikkinni agurino yanna tenne qafadote yinanni.
Maganu qafadamanno gede assatenni manna cubbinsara qorichishinsarono insanna uyinonsa hexxo dihawino. Maganu mannasi agaranna himanaanote widoonni qole hasaawisa diagurino. Lamalawu diri gedensaanni, galagalte hexxote gobba higganno gede coyi’rinonsa.
Lamalawu diri gedensaanni, Faarisi moote Baabilooni qase qeeli; kunnira Faarisi moote gashshooti Baabilooni moote gashshooti darga amadi. Xa Israeeloota Ayihudete yini. Insa giddonni rooru manni Baabilooni gobbara hee’rino. Lowo geeshsha geedhinohu shiimu manni callu Yihudu gobba qaagino.
Faarisi moote gashshooti kaajjadoho; amadino mannira kayinni shaqqadoho. Qiroosi Faarisootu moote ikkihunni shiima yanna gedensaanni, Yihuda higa hasi’rino Ayihudichi baalu Faarisi agure Yihuda higa dandaanno gede hajajo uyi. Qullaawa Mine galagalchite mintanno gede woxe nafa kaa’linonsa. Kunnira qafadante keeshshituhu lamalawu diri gedensaanni shiima Ayihudete gaamo Yihudu katama Yerusaalame higgu.
Mannu Yerusaalame iilli yannara, Qullaawa Minenna katamu qooxeessira noo huxxa galagalchite huxxitu. Xaa geeshsha wolu anga gashshanturono, galagalte Hexxote gobbara heedhe Qullaawa Mine magansidhino.
Qullaawu Maxaafi Dhagge:- 2Mootoolla 17; 24-25; 2Mootoolla 36; Izira 1-10; Nehimiya 1-13.