16.

Astán láta nilh Josué, amá israelitas yaj takgaxmatnilh Dios chu ni katlakgaxtulh tiku xtawilanalhkú antá nakj Canaán na ni takgaxmatlí xlimapakgsin Dios. Amá Israelitas tsúkulh talakgachixkuwí xdioskan Cananeos, nakj xlakgxokgo Jehová, amá Dios xa'xlikána. Amá israelitas ni'xtakgalhí langa púxku, wa chunáa chatúnu xtatlawá tukuxlakán xtalakjpuwán pi tlán.

Wa'xpalakata israelitas ni'xtakgaxmatnimanalh Dios, xlá kamapatínilh chu kamakamaxkilh xtara tlawanakán lokí naka'tlajakán. Amá xtaratlawanakán xka'makgkgalhán israelitas, na'xkalalakjtlawaní tu'xtakgalhí, chu na lhúwa xkamakgnikán. Lhúwa kata lata ni'takgaxmátnilh Dios, chu lata kama'akgxtokgajnika, amá israelitas ta´lakgpálilh lixkán xtáyatkán chu skinikgólh Dios ka'kalakgmaxtúlh.

Chuná, Dios makamilh chatúm lakgmaxtuná, chu kalakgmaxtulh na'límilh takakjsní nakj katiyatni. Wata, latamanin ta'akgtsangswapá Dios chu tatsukupá talakgachixkuwi tlatawamákgxtu. Chuna Dios mástalh talakaskin pi amá madianitas, xtaratlawanakán nakatlaja.

Amá madianitas takgálhalh xtachanankán israelitas lata akjtujún kata. Israelitas lu'xtajikuanit, chu xtatsekgkgo nakj lakj'langa lhúku laki madianitas ni'xkatakgáslí. Chuná xtakilhanipará Dios laki na'kalakgmaxtú.

Túm kilhtamakú, chatúm chixku xla Israel wanikán Gedeón, tsekg xlakgsakgma xtalhtsi, laki madianitas nilá natakgalhán. X'Ángel Jehová lakgmilh Gedeón chu wánilh: "Dios táwilan, chixkú xa'tlieákga chu ni xa'jikjwa. Kapit chu kalakgmaxtu Israel nakj xmakán madianitas."

Xtlát Gedeón xkaxtlawanit akgtúm niku xlakgaskgoyonán akgtúm tatlawamakgxtu. Dios wanilh Gedeón kalakjtláwalh amá pulakgaskgóyon. Wata Gedeón xjikjwaní latamanin, chuna kgalhilh natsiswán. Tunkún lakjtkáwalh amá pulakgaskgóyon lu'skán lakjtsu tláwalh. Xlá tláwalh akgtúm niku nalakgachixkuwikán Dios, lakatsú niku ixwilakgólh a'túnu pulakgaskgóyon xlatatlawamákgxtu, chu xlá mástalh akgtum lilakgachixkuwit xla Dios.

Xlichalí tsisa amá kachikin takatsilh pí xkalakjtlawanikanit xpulakgaskgóyon chu xtasitsinit. Ankgolh nakj xchik Gedeón laki namakgnikgo, wata xtlát Gedeón wa: "¿Wána makgtayapátit mi dioskán? ¡Pi'xlikána dios, kamakgxtakgtil laki sakjstu katamakgtáyalh!" Akjxni chuná kawánilh, latamanin ni tamákgnilh Gedeón.

Chuná madianitas ankgolh tamakg'kgalhanampará israelitas. Lhúwa xtawanit nilá xtaputlakgá. Gedeón katasánilh israelitas katamakjxtumikgolh laki nata'án katarachipá. Gedeón skinilh Dios akgtuy tamasiyán laki chuná nakatsí pi Dios maxkima talakaskin na lakgmaxtú Israel.

Pulakjtum tamasiy, Gedeón wililh pakgtsu lhakgat nakj katiyanit chu skinilh Dios pí amá monkganá katamancha mán antá naakj lhakgat lata tsisa chu ni anta nakj tiyat. Dios chuná tláwalh Xlí katsisni, skimpa pi amá catiyatni ka'káwalh, wata lhakgat skawawa katámalh. Dios chuna tlawapá. Wa jae akgtuy limasuy matliwakglhli Gedeón pí Dios x'áma lilay xlatamat laki nakalakgmaxtu israelitas nakj xmakán madianitas.

__