4. E Devlesoro savez e Avraameja

But berša palo baro pani, ki phuv palem živinđe but manuša. Sare on vaćerđe jekha čhibjaja. So te pheren i phuv sar so naredinđa lenđe o Devel, on čedinđe pe hem ćerđefse diz.

But inele barikane, hem sa jekh ine lenđe zako adava so phenđa o Devel. Čak lelje te vazden jekh bari kula savi valjanđa te ovel bari đi o nebo. O Devel dikhlja da ka šaj te ćeren po više greja te nastavinđe zajedno te ćeren bišukaripe.

Adalese o Devel ćerđa te na vaćeren više jekha čhibjaja nego bute avere čhibjencar, hem ćerđa te na oven više o manuša ko jekh than nego ki sa i phuv rasejime. I diz savi lelje te ćeren vičinđa pe Vavilon so značini "zbunime".

But berša palo adava, o Devel vaćerđa jekhe manušese palo anav Avram: "Ačhav i phuv kote bijandiljan hem te porodica, hem dža ki phuv savi me ka mothovav će. Ka blagoslovinav tut hem tutar ka ćerav bare narodo. Ka ćerav to anav te ovel but baro. Ka blagoslovinav okolen kola tut ka blagoslovinen hem ka prokletinav okolen kola tut ka prokletinen. Sa o porodice ki phuv ka oven blagoslovime zbog tute."

I ađahar, o Avram šunđa e Devle. Lelja pe romnja, e Saraja, sa pe slugen hem sa so inole, i dželo ki phuv savi o Devel mothovđa lese, ki phuv vičime Hanaan.

Ked o Avram reslja ano Hanaan, o Devel phenđa lese: "Dikh sa adava angla tute. Tuće hem te potomstvose sar nasledstvo ka dav sa adaja phuv savi šaj te dikhe." Tegani o Avram ačhilo ani adaja phuv.

Jekh dive, o Avram reslja e Melhisedeke, e Najbare Devlesere svešteniko. O Melhisedek blagoslovinđa e Avrame hem phenđa: O Najbaro Devel, kasoroi o nebo hem i phuv, te blagoslovini e Avrame." Tegani o Avram dinđa e Melhisedekese dešto kotor oto sa so inole.

But berša nakhle, ali e Avrame hem e Saraja pana na inolen čhave. O Devel vaćerđa e Avramese hem palem obećinđa lese da ka ovel le čhavo hem potomci edobor kobor isi čerenja ko nebo. O Avram verujinđa e Devlesere lafese i adalese o Devel vaćerđa dai o Avram pravedno.

Tegani o Devel ćerđa savez e Avrameja. O savezi dogovor maškaro duj strane. O Devel phenđa: "Tutar ka dav tut čhave. I phuv Hanaan dava te potomstvose." Ali e Avrame pana na inole čhavo.

E biblijakiri paramiz taro 1. lil e Mojsijasoro 11-15