13. E Devlesoro savez e Izraelconencar
Palo adava so o Devel legarđa e Izraelconen maškaro Lolo more, legarđa len maškari pustinja đi ki planina savi vičini pe Sinaj. Adava inele isto planina kote o Mojsije dikhlja o grmo savo ine thabljola. O narodo čhivđe o šatorija teleder i planina.
O Devel phenđa e Mojsijase hem e izraelskone narodose: "Te šunđen man hem te ićerđen mlo savez, ka oven mlo najmanglo narodo, me ka ovav tumaro caro, a tumen ka oven sar sveštenici, hem ka oven sveto narodo."
Palo trin dive, palo adava so o narodo duhovno pripremisalo, o Devel hulilo upro najučo than e planinakoro Sinaj, a upral ine grminđa, khuvđe munje, mothovđa pe čuro hem šundilo zoralo zvuk e trubakoro. Samo e Mojsijase inele muklo te uštel ki planina.
Tegani o Devel dinđa len savez hem phenđa: "Me injum o Jahve, o Devel klo, kova spasinđa tut taro robujiba ano Egipat. Ma slavinen avere devlen."
"Ma ćeren idolen hem ma slavinen len, adalese so me, o Jahve, injum ljubomorno Devel. Ma koristinen mlo anav ko bišukar način. Dikh o eftato dive te ovel će sveto. Averčhane, ćer sa ti buti ko šov dive, adalese so ko eftato dive valjani te odmorine tut hem te setine tut mandar."
"Poštujin te dade hem te daja. Ma mudar. Ma ćer preljuba. Ma čor. Ma xovav. Ma mang averesera romnja, ni averesoro čher, ni bilo aver soi averesoro."
Tegani o Devel pisinđa akala Deš naredbe ko duj ploče oto bara hem dinđa len e Mojsijase. O Devel da dinđa but avera zakonja hem pravilja savenđe valjanđe te oven poslušna. Te o manuša ule poslušna akale zakonenđe, o Devel obećinđa da ka blagoslovini len hem da ka štitini len. Te na ule poslušna, o Devel ka kaznini len.
O Devel e Izraelconenđe vaćerđa tačno sar te ćeren o šatori savo manglja lendar te ćeren. Vičinđa pe Šatori zako sastanko. Inole duj sobe saven odvojinđa jekh bari zavesa. Samo o baro svešteniko šaj ine te đerdini ki soba pali zavesa, adalese so adari inele o Devel.
Te neko na ulo poslušno e Devlesere zakonese, šaj ine te anel životinja ko žrtveniko anglo Šatori zako sastanko sar žrtva e Devlese. O svešteniko tegani čhinela ine e životinja hem tharela la upro žrtveniko. O rat e životinjakoro savo inele žrtvujime učhari ine o greh adale manušesoro hem ćerela le ine te ovel čisto anglo Devel. O Devel birinđa e Mojsijasere phrale e Arone hem e Aronesere potomkonen te oven lesere sveštenici.
O narodo phenđa da ka oven poslušna e zakonenđe saven o Devel dinđa len, te slavinen e jekhe Devle hem te oven lesoro posebno narodo. Ali na nakhino but palo adava so obećinđe da ka oven poslušna e Devlese, ćerđe nešto bišukar zako so o Devel inele but xoljame.
O Mojsije but dive inele ko naj učo than e planinakoro Sinaj, kote vaćeri ine e Devleja. E manušenđe dosadinđa pe te adžićeren le te irini pe. Adalese anđe zlato e Aronese hem rodinđe lestar te ćerel lenđe idole.
O Aron ćerđa idole oto zlato ko oblik e telcosoro. O manuša lelje te slavinen adale idole hem te anen lese žrtve! O Devel inele but xoljame upro lende adalese so grešinđe hem manglja te mudari len. Ali o Mojsije molinđa pe olenđe hem o Devel šunđa lesiri molitva i na mudarđa len.
Ked o Mojsije hulilo tari planina hem ked dikhlja e idole, edobor inele xoljame da phaglja o ploče oto bara upro savende o Devel pisinđa o Deš naredbe.
Tegani o Mojsije phaglja e idole, ćerđa le ko prah, o prah frdinđa ko pani hem terinđa e narodo te pijen adava pani. O Devel bičhalđa nevolja upro manuša i but đene olendar mule.
O Mojsije ćerđa neve ploče oto bara zako Deš naredbe sar zamena okolenđe saven phaglja. Tegani palem uštino ki planina hem molinđa e Devle te oprostini e narodose. O Devel šunđa e Mojsija hem oprostinđa lenđe. Irinđa pe tari planina e Deše naredbencar save inele pisime ko neve ploče. Palo adava, o Devel e Izraelconen legarđa tari planina Sinaj nakori Obećime phuv.
E biblijakiri paramiz taro 2. Lil e Mojsijasoro 19-34