35. Paramiz e žalostivnone dadestar

Jekh dive, o Isus sikaj ine bute carinikonen hem avere grešnikonen kola čedinđe pe te šunen le.

Nesave e verakere vođe kola inele adari oleja, dikhlje so o Isus premalo grešnici ponašini pe sar premalo amala, i lelje maškara pumende te kritikujinen le. Adalese o Isus vaćerđa lenđe akaja paramiz.

"Inele jekh manuš kole ine duj čhave. O tikneder čhavo phenđa ple dadese: 'Dade, mangava odmah te de man mlo kotor oto barvalipe klo!' I ađahar, o dad ulavđa plo barvalipe ple duje čhavenđe."

"O tikneder čhavo čedinđa sa so inole, dželo ki durutni phuv hem xalja sa ple love živindoj grešno."

"Palo adava, ki phuv kote živinđa o tikneder čhavo alo baro bokhalipe, a ole na inele love te činel xajbnase. Adalese lelja te ćerel jedino buti savi šaj ine te arakhi: parvarđa e balen. Edobor inele napatime hem bokhalo, da manglja te xal adava so xana o bale."

"Konačno, o tikneder čhavo vaćerđa korkoro pese: 'So ćerava me adava? Sa o sluge mle dadesere isi len sa edobor xajbnase, a me akate merava bokhatar. Ka irinav man mle dadese hem ka molinav le te lel man sar jekhe ple slugendar.'"

"I ađahar o tikneder čhavo lelja te irini pe ple dadesere čhereste. Sar pana inele dur, o dad dikhlja le hem pelo lese žal olese. Prastandilo nakoro čhavo, zagrlinđa le hem čumudinđa le."

"O čhavo phenđa: 'Dade, grešinđum anglo Devel hem angla tute. Na injum više dostojno te ovav to čhavo.'"

"Ali, lesoro dad phenđa jekhese ple slugendar: 'Siđar dža hem ana o najšuže šeja hem hurjav mle čhave! Čhiv lese i angrustik ko naj hem o sandale ko pre. Tegani čhinen e najšuže telco te šaj te xa hem te slavina, adalese so mlo čhavo inele mulo, ali akanai dživdo! Inele našaldo, ali akanai arakhlo!'"

"I ađahar, o manuša lelje te slavinen. Na nakhino but, o phureder čhavo alo čhere tari buti savi ćerđa ki njiva. Šunđa bašaliba hem čheliba, i pučlja pe so šaj te ovel adava."

"Ked o phureder čhavo šunđa so slavinena adalese so lesoro phral irinđa pe čhere, but xoljanđa i na manglja te đerdini ko čher. Lesoro dad iklilo hem molinđa le te đerdini te slavini olencar, ali ov na manglja."

"O phureder čhavo phenđa ple dadese: 'Sa akala berša kandava tut! Niked na injumle će neposlušno, a tu na dinđan man ni buzore te šaj te veselinav man mle amalencar. A ked akava to čhavo, kova xalja sa te love živindoj grešno, irinđa pe čhere, tu čhinđan lese e najšukare telco!'"

"O dad phenđa lese: 'Mlo čhavo, tu stalno injan mancar. I sa soi mlo-kloi. Ali, avela ano redo te slavina, adalese so to phral inele mulo, ali akanai dživdo, inele našaldo, ali akanai arakhlo!'"

E biblijakiri paramiz taro Luka 15,11–32