18. Ulavdo carstvo

Palo but berša, o David mulo, a lesoro čhavo o Solomon lelja te vladini upro Izrael. O Devel vaćerđa e Solomoneja hem pučlja le so najviše mangela. Ked o Solomon rodinđa džandipe, o Devel inele zadovoljno hem ćerđa le te ovel najdžando manuš ki phuv. O Solomon siklilo but so hem inele but džando sudija. O Devel ćerđa le te ovel but barvalo.

O Solomon vazdinđa Hram ano Jerusalim zako savo lesoro dad o David ćerđa plan hem čedinđa materijal. O narodo akana slavinđa e Devle hem anđa žrtve ano Hram, a angleder adava ine ćerena ano Šatori zako sastanko. O Devel alo hem inele ano Hram, hem živinđa pe narodoja.

Ali o Solomon but volinđa e đuvljen taro avera phuvja. Na šunđa e Devle hem lelja bute romnjen, đi sar 1.000 romnja inole! But adale romnjendar ale taro avera phuvja, a pumencar anena ine pumare devlen saven ine slavinena. Ked o Solomon purandilo, hem ov da lelja te slavini lengere devlen.

O Devel xoljanđa upro Solomon hem sar kazna zako adava so o Solomon na ine lese verno o Devel obećinđa lese da palo lesoro meriba e Izraelesoro narodo ka ovel ulavdo ko duj carstvija.

Ked mulo o Solomon, lesoro čhavo o Rovoam ulo caro. Ov na inele razumno manuš. Sa o Izraelci čedinđe pe te proglasinen le carose. Žalinđe pe lese da o Solomon terinđa len te ćeren phare buća hem te platinen but porez.

E Rovoamesoro odgovor na inele šukar: "Tumen mislinđen da mo dad o Solomon terinđa tumen te ćeren phare buća, ali me ka terinav tumen te ćeren po phare buća nego so ov terinđa tumen hem ka kazninav tumen po zorale nego so ov kazninđa tumen."

I ađahar, deš plemenja e Izraelesere na mangle e Rovoame carose. Samo duj plemija ačhile lese verna. Adala duj plemija ule carstvo vičime E judejakoro carstvo.

Aver deš plemenja e Izraelesere, kola na mangle e Rovoame carose, čhivđe carose e manuše palo anav Jerovoam. Lengoro carstvo inele ko upruno kotor e phuvjakoro, a vičinđe le E izraelesoro carstvo.

O Jerovoam bunisalo protiv o Devel hem legarđa e manušen ano greh. Ćerđa duje idolen te šaj lesoro narodo slavini len, a na e Devle ano Hram savoi ano carstvo e Judejakoro.

E Judejakoro hem e Izraelesoro carstvo ule neprijatelja hem but puti marđe pe jekh avereja.

Ano nevo carstvo e izraelesoro, sa o carija inele bišukar. Buten olendar mudarđe avera Izraelci, kola mangle te oven carija lenđe ko than.

Sa o carija hem but manuša taro e izraelesoro carstvo slavinena ine idolen. Ko adava inele uključime but bišukar buća hem sar žrtven dena ine pumare čhavoren.

O carija e Judejakere inele potomci e Davidesere. Nesave olendar inele šukar manuša, kola vladinđe pravedno hem slavinđe e Devle. Ali, but carija e judejakere inele bišukar hem ćerena ine okova so na valjani, hem slavinena ine idolen. Nesave carija da dena ine pumare čhaven sar žrtva e xovavne devlenđe. But manuša tari Juda da cidinđe pe e Devlestar hem slavinena ine avere devlen.

E biblijakiri paramiz taro 1. lil e caronendar 1-6; 11-12