22. Bijandipe e Jovanesoro

Ko prošlost, o Devel vaćerđa pe narodoja prekalo pe anđelja hem prekalo proroci. Ali, 400 berš nakhlo sar na vaćerđa lenđe. Otojekhvar, jekhe purane sveštenikose palo anav Zaharija alo o anđeo te vaćeri lese e Devlesoro lafi. O Zaharija hem lesiri romni i Jelisaveta inele but pobožna manuša, ali našti ine te oven len čhave.

O anđeo phenđa e Zaharijase: "Te romnja ka ovel čhavo. Tu ka de le anav Jovan. Ka ovel pherdo e Svetone Duhoja, hem ka pripremini e narodo zako Mesija." O Zaharija phenđa: "Mli romni hem me injam but purane te oven amen čhave. Sar me te ovav sigurno da ka ovel adava?"

O anđeo phenđa e Zaharijase: "O Devel bičhalđa man te anav će akava šukar lafi. Adalese so na verujinđan maje, na ka šaj te vaćere đikote o čhavoro na bijanđola." O Zaharija odmah palo adava našti ine te vaćeri. Tegani o anđeo ačhavđa e Zaharija, a o Zaharija irinđa pe čhere. I lesiri romni ačhili khamni.

Ked i Jelisaveta inele khamni šov masek, o isto anđeo otojekhvar iklilo e Jelisavetakere rođakinjaće palo anav Marija. Oj inele devica hem inele verime e manušeja palo anav Josif. O anđeo phenđa laće: "Ka ačhove khamni hem ka bijane čhave. Ka de le anav Isus. Ov ka ovel Čhavo e Najbare Devlesoro hem ka vladini zauvek."

I Marija pučlja: "Sar šaj te ačhovav khamni, a injum čhaj?" O anđeo phenđa laće: "O Sveto Duho ka huljel upra tute hem o zoralipe e Devlesoro ka učhari tut. Adalese o čhavoro ka ovel sveto, Čhavo e Devlesoro." I Marija verujinđa hem prihvatinđa adava so phenđa laće o anđeo.

Na nakhino but palo adava so o anđeo vaćerđa e Marijaja, oj dželi te dikhel e Jelisaveta. Ked i Jelisaveta šunđa e Marijakoro pozdrav, e Jelisavetakoro čhavoro mrdinđa ano late. I Marija hem i Jelisaveta zajedno radujinde pe zako adava so ćerđa lenđe o Devel. I Marija ačhili kori Jelisaveta trin masek i palo adava irinđa pe čhere.

Ked i Jelisaveta bijanđa pe čhavore, o Zaharija hem i Jelisaveta dinđe le anav Jovan, sar so phenđa lenđe o anđeo. Tegani o Devel muklja e Zaharijase palem te vaćeri. O Zaharija phenđa: "Slava e Devlese, adalese so setinđa pe ple narodose! Tu, mo čhavo, ka ove proroko e Najbare Devlesoro hem ka phene e narodose sar šaj te priminen oprostiba zako pumare greja!"

E biblijakiri paramiz taro Luka 1