1. Caselha apquelentepquescama Engiapom Neten

Coca jengca ampai’acja secja aplhenammap apquelentepquescama Eniapom Neten, lhamacjo caselhaja. Acvaiacmo lhnac nanec 6 acnem ma’a coca aquietnemo lhnac na ienactescama lhma acvaneiam ma’a mamma lhnac anguetac má iemmen acvaneiam anquec nac acmaptonne ncoie, coca Eniapom Neten apualhoc noca nietnemac tacjalhet iemmen acvaneiam.

Netamen, lhnac aptemac Eniapom Neten: Cotiep aponmatma, ca acteiapmo lhnac aponmatma m’a, ca apieniescasecjo lhnac aponmatma ienactescama lhma m’a, cacpota etnesquesec acvesai’a pelhasep, netamen apquelanei’o lhnac Eniapom Neten ntasec anquec nac apquelanei’o m’a, lhema lhnac nane ntemac aquiecai’a m’a.

Janet acnem na ntemac ma’a, aptepquescamo lhnac nanec na Eniapom Neten, neten cacpota njan nalhepop, ca apquelanesquescamo lhnac nanec na janet acnaiangquelha iemmen ma’a, neten canjan coneng nalhepop, ca apienievquescamo lhnac nanec mo’oc iemmen ma’a.

acnem nac nane ntemac, lhnac aptemac Eniapom Neten: Squelhpancasquec iemmen, niemac’ave lhmá, ca aptemesquescamo lhnac acvesai’a nalhepop, cacpota njan ma’a aquietnaianlha iemmen alvatá. Ca apuetai’o lhnac Eniapom Neten ntasec anquec nac ma’a.

Netamen lhnac aptemac Eniapom Neten: Colentep jata lhamacjo actemacja iamet, cacpota njan iamet’atco’oc, ntemengquec nac ma’a, alenteiapmo lhnac ma’a. Ntasec anquec nac nanec apquelanei’o Eniapom Neten.

Ca acvaiacmo lhnac nanec 4 acnem ma’a, apquelentepquescamo lhnac Eniapom Neten, acnem, pelten, canjan iau’a, alaponmatmo lhnac tacjalhet nalhepop cacpota njan aniojoc ma’a aclhengama iantelhcapa. Ca apquelanei’o lhnac ma’a ntasec anquec nac apuetai’a m’a.

acnem nac nanec nguaiacmoc ma’a, lhnac nanec aptemac Eniapom Neten: Colentep lhamacjo actemacja anata, cacpota njan alloma nac iemmen, apuetai’o lhnac Eniapom Neten actacmanma nquec ma’a, apcaiangco lhnac apaioma actacmanma nquec ma’a.

nac nguaiacmoc acnem ma’a lhnac nanec aptemac Eniapom Neten: Angellanac lhamacjo actemacja caselha neujac, ntemengquec nac nanec actacja apaioma m’a Eniapom Neten, ngquelenteiapmec nac nennactoscama, caselha neujac, cacpota njan mo’oc caselha neujac acmaimentac’a.

Netamen lhnac aptemac Eniapom Neten: Angelanac enenlhet, nelietquesammalhco la’a, annesoc jata nentemacja nac. Ncotnec jata njan apientalhnemo tacjalhet lhepop, cacpota njan lhamacjo caselha neujac,

lhepop nac nanec apquelmamac Eniapom Neten, apquelan’o enenlhet, apcaiangco lhnac na aquiennactema apneiec ma’a. lhnac apuesai’a apquenno Adan. Aniep nac na apquelanai’ac Eniapom Neten ma’a, cacpota elhec Adan ma’a, etacmelquesec najan.

Apcanmo lhnac na 2 actemacja iamet Eniapom Neten ma’a aquieto aniep, aquiennactema enneiec, jenianguesquescaiacmo actacmanma capota njan ngcolatsecamaja. Lhnac nanec aptemac Eniapom Neten apcanemo Adan, ntasec etuoc lhamacjo actemacja aquielhna amjamo nac aniep, coca aptavo la m’a iamet aquielhna jenianguesquescaiacmo nac actamanma capota njan ngcolatsecamaja. Jaí, enietsepoc jata lheiap.

Netamen lhnac nanec aptemac Eniapom Neten: “Manac quelha ngcolatsema eloca aplhepquennenga apquenno la’a”. Mangcopasme nac quelha caselha neujac anac Adan.

Netamen Eniapom Neten iama ten nac apcapquescamac Adan. Cacpota Eniapom Neten elequesec lhema apocjoc ma’a Adan, ngqueluana lhnac apquelanesquescamac ma’a, apiantengcasejo lhnac ma’a.

Necsa apuetai’a lhnac Adan ma’a, lhnac nanec aptemac: ¡Tacmelacjo nque! ¡asnave panque nac! Ngcotnec jata acuesai’a “ngqueluana” ngcanec aniem’acja nquec apquenno” ca ngcanec eienioc jata aptema apnemo lhema apiapom ngquen, cacpota eipetcoc ma’a aptava.

Eniapom Neten nac nanec apquelanai’a apquenno cacpota njan ngquelvana, apquelietquesammacpavec nac ma’a. Aptacmelquescamo lhnac apaioma apquellanei’o m’a, lhnac nanec aptemac: “¡Elhamecjac jata apquetcac cacpota njan aptavana’ac neptamen, elanoc jata njan lhma nquec jam, cacpota elanjoc Eniapom Neten ma’a ntasec anquec nac apquelanei’o m’a coca jengca acvaiacmo lhnac acnem ma’a.

Ca acvaiacmo lhnac nanec 7 acnem, apsavjomaquiec nac apmacmecama Eniapom Neten, lhamacjo actemacja apquelentepquescama m’a. netamen aptacmelquescamo lhnac nanec apaioma apquelanei’o ngcanec apsaujomo lhnac apmacmecama m’a, lhamacjo acnangco lhma nquec jam.

Historia Biblica- Génesis 1-2