2. Moniamolhma Actalhnemo lhnac nanec lhma nquec Jam

Adan cacpota njan aptava, avanjec nac nanec alpaijecja mota au’alho’oc ma’a, ntsec anquec nac nanec aniep apquellanesquescama Eniapom Neten ma’a. Coca mamma lhnoca allentalhnema, mang nac ngcoliamoc najan nemmangcactema, ngcanec mamma nquec nac nanec moniamolhna lhma nquec jam. Ngquelomaca lhnac nane mota aquieto aniep, cacpota njan alpacmetquesaicama mota Eniapom Neten ma’a.

Coca nlomaca lhnac na menasma acmovana ngcotnamaja (ngcotnenguacjo lhma). Acpacmetquecamo lhnac ma’a ngquelvana: ¿Jave nlho niapac aplheianmo Eniapom Neten metca actecamoc aquielhna iamet amjamo nac aniep je?

Ngcatemmoicama lhnac nanec ngqueluana: “lhta aptac Eniapom Neten, enguanquec anto’oc lhamacjo aquielhna iamet, coca meltemoc anto’oc iamet aquielhna jenianguesquescaiacmo actamanma cacpota njan acmasoma. Lhta ptac Eniapom Neten: “Ca actavengco la aquielhna nlhocala ncolmanguomoc, ngcoletsepoc jata.

Ca atemmoiangca lhnac nanec menasma m’a: “¡Jave, apmopuana nia’a m’a! mmá, angcoletsepeje. Apiavec Eniapom Neten actavengco la quetlhengca m’a, ngcolianguomjoc lhamacjo caselhaja ca aptemacja nac ma’a. Ngcotnangcoc malha Eniapom Neten, apiavec actemacja actacmanma cacpota njan ngcolatsecaja.”

Netamen ma’a ngqueluana acvetai’o lhnac aquielhna ntasec anquec nac, atsec nac najan. Nteniai’ac nac nanec na aquiangueiacmo m’a, ca acmamo lhnac aquielhna cacpota ngcotvoc ma’a. Netamen acsacjescamo lhnac nanec na m’a atava aptomo lhnac na m’a.

Colhvavec anquec nac ntemac malha almaijecja acto’oc ma’a, alvetai’o lhnac metca alentelhnema m’a. Alapteiangco lhnac iamet ava cacpota ngcolanangcoc alentalhnema m’a cacpota mangcoluetalhquec metca alentalhnema m’a.

Netamen, Enenlhet anac cacpota njan aptava alengai’o lhnac nanec malha alhcaiam, Eniapom Neten noca njan aplomaca m’a aquieto aniep. Ngquelielhanengquescangquec noca Eniapom Neten ma’a. Netamen apueneiangca lhnac nanec eniapom Neten Adan ma’a: “¡Cola apnacja m’a!” apcatemoingca lhnac nanec Adan ma’a ”asleng’ac lhec apuactamo lheiap aniep anac, asquenmenac’ac co’o, ngcanec mamma astalhnema má, ca canec co aielhanmoc ma’a.”

Apquenmalheiangca lhnac nanec Eniapom Neten: “¿Selha altennascama lheiap aptema metca aptalhnema ie? ¡Nlhoca aptavac lheiap ma’a moltemo lhta etvoc aquielhna! “Jeiangque lhta lheiap ngquelvana nac, lhquec jeiaicamoc aquielhna m’a. “Netamen Eniapom Neten apquenmalhneiangca lhnac nanec ngquelvana nac ma’a: “¿Javei’e niapac je?” Ngcatemoicama lhnac nanec ngquelvana m’a: “Menasma lhquec jeienengcasac, lhna ntemac ma’a”.

Lhnac nanec aptemac apcanemo Eniapom Neten menasma: “Mang colhec jata actacmelcaso lheia, ngcotnec jata acpelhioicamoc necsa aclhengama, lhepop jata njan ngcotuoc lheia. Amelhmacja nquec jata ngcotnec lheia m’a, nquelvana nac ngcotnec jata njan amelhmacja lheia, cacpota njan atcac, canjan ngcotno la atcac ngcoltacnevecjac jata njan, coca acto lhema pjapac apanquec ataven netamen ngquelvana nac, etiamoc jata apcatec, apajac jatoca ngcotaclhec”.

Netamen lhnac nanec aptemac apcanemo ngquelvana Eniapom Neten: “Ngconangcojoc jata acmasca alvet’o ta atcac. Ngcotnec jata njan valha atava apquemjama apmanie

Lhnac nanec aptemac apcanemo Eniapom Neten enenlhet: “Apcailhavec acpaioma aptava, cacpota mangjeliejecjejé. Mmasquec alatsengca nalhepop, aquientalhnema nquec jata ngcotnec apmacmecamaja, cacpota etac aptoma aniem’o aniep. Enitsepoc jata cacpota ngcotacjoc lhepop apiocjana nac.” Ca enenlhet anac aptemesquescamo lhnac acvesai’a aptva Eva, mo’oc nema altema coca “actema alhnancoc”, ngcanec jata ngcotnec atcac lhamacjo enenlhet’oc. Caselha neujac aiempec nac nanec apquelanescamac Eniapom Neten aptalhnema m’a Adan ccpota njan Eva.

Netamen lhnac aptemac Eniapom Neten: “Coca jengca enenlhet anac malha nennavec enengco’o, apianguacmec actemacja actacmanma cacpota njan ngcolatsecamaja, mangcapuanquec jata etvoc mocjom aquielhna iamet anac aquienactescama eneniec cacpota eloca mocjom acvangcajojo.”Aptepquescangquec nac nanec Eniapom Neten, Adan cacpota njan Eva aquieto actacmelacja aniep, apquelapascamo lhnac na Enenlhet Neten apquelientactema apquelanecama atong, cacpota mang colhec actavo m’a iamet aquielhna aquienactema eneniec.

Historia Bíblica- Génesis 3