8. Eniapom Neten Apquelvongquescama José Apnemo lhema

Nguengquepmec nac nanec ia’ntelhcapa, apuane’iam nac nanec aptemac Jacob m’a, José lhnac apuesai’a apquetca apcamela’ianlha lhnac ma’a. Apcapascamo lhnac apquellomacja apquelpetma’ac apquelanecama nepquesec.

Apquelammelhaicama lhnac apquelpet’ma’ac ma’a José, lhna songquec apcamela’iam apiapom, cacpota njan apuannongcoma aplhe’ianma mota etnec jata apuesque m’a. Necsa apuecja lhnac José m’a apquellocja apquelpetma’ac, apquelposcangquec nac secjec ma’a, netamen aptenia’iangco lhnac apianmoma apquella’iangco lhnac enenlhet apquelmama caselhaja.

Aman’ie apqueltacjecja lhnac ma’a, José apquelpetma’ac apqueleliaptemo lhnac José aptalhnema m’a, cacpta njan eleltelhnangcoc na ie’ta’ai ema pancoc. Cacpota eletsacjesec eleltennasec apqueliapom ma’a, caselha neujac acjema m’a José. A’iosec nac ntemac apualhoc aplengai’o Jacob m’a.

Apto apquelhaicama nema aquianmoma esclavos, lhnac apiantemecjac José ma’a aquieto Egipto. Egipto apiau’acja temma lhnac ma’a, cacpota njan nema apqueletsecama lhnac na m’alhnac nietemoc ma’a necja alvata Nilo. Ca enenlhet anac, lhnac apteniangueiacmoc apianmoma José m’a nema apquetsecama apmacmesaicama vesque co Egipto. Tacmelquescamavec nac apmacmecama José napactec vesque pancoc. Eniapom Neten nac na aptacmelquescamoc apasmoma m’a José.

Ca acmajai’o lhnac ngcoatjetangcoc vesque pancoc aptava José m’a, coca mang nac eniasecjai’ac Eniapom Neten nac apcai’ac ma’a, acmovanania’a lhna ntemac aclhe’ianmo lhnac José apatjema m’a. Cacpota ngcolhec aclhengcaso nemammalhquelha José. Coca ngjeclhec nac aptemac apcai’o Eniapom Neten, apasmongquec nac na Eniapom Neten José m’a

Janet nac ntemac aquiecai’a ia’ntelhcapa m’a, ngjeclhec nac apnema conne nemammalhquelha José m’a, metquelho ptacjo. Lhema pelhasep nac ntemac, Faraón (vesque lhac ma’a co Egipto) janet nac ntemac apuanmongcoma m’a avanjec anquec na ntemac aclhenaicama mota apualhoc ma’a. Mang nac eliamoc acto apqueliojo apquellaniemjaicama (apqueliolhma) actemacja apuannongcoma.

Eniapom Neten nac apcaicamoc José apmopuana elpeivescasecjac nema alvanongcoma, ca apqueltemo lhnac Faraón ngcolhec aquiantenguacjo José m’a apnacja nemammalhquelha. Ccpota elpeivescasecjac apuanmongcoma m’a, lhnac aptemac: “7 ia’ntelhcapa ta ngcacsec apuqeluetai’a aquielhna, 7 ia’ntelhcapa ta njan ngcotnec metca aptecamoc enenlhet”.

¡Nleclemavec nac apualhoc Faraón ma’a José, ca aptemesquescamo lhnac neten apanquec apientalhnemo aquieto m’a Egipto!

Lhnac aptemac José apquellanemo enenlhet, ellanquesecja ta nentoma ca acva’iacmo 7 ia’ntelhcapa. Netamen José, nema aquianmoma lhnac aptemac José m’a ngua’iacmec nac 7 ia’ntecapa apquellanquesecja m’a, cacpota ngcoitec ngquescamap aptecamoc ma’a.

Nguai’ac nac mec ma’a mamma nquec nac nentoma jave lhnac valha Egipto, lhnac na m’a aquieto Canaán apnacja Jacob, acjangquelha apaiomolhema.

Apquelapascamo lhnac Jacob apquetcac metno pquetco’oc aquieto Egipto, cacpota elmangcoc aptecamoc. Mang nac eliecpelquemac apquelpetma m’a José, necsa apquelmaicamoc aptecamoc. Coca José apqueliecpelquemavec nac ma’a.

Malha mongeliecpelco lhnac aptemac secjec José m’a, netamen apqueleltennascamo lhac ma’a, lhnac aptemac José: “¡Eliepma’a quetlhengcap José co’o! mang jelaga, ¡apqueleltemave lhta niecje anactevasec co’o quetlhengcap jeclhaque lhta nema aquianmoma cacpota atnec esclavo. Eniapom Neten coca apiacmongcasecja actacmanma m’a ngcolatsecama lhta! Etlheng, etlheng, aquieto Egipto allangcoc jata, cacpota njan nemo lhema engancave nac.”

Apqueltacjemavec nac apquelpetma’ac José apquelvecjo lhnac apcacja’iangquelha, lhnac aptemac apquellanemo apqueliapom Jacob, ¡Malhquec enietsepmac José, nengelvetacjec lhec! Mpaijecjec nac apualhoc ma’a.

Apuane’iam apanquec nac aptemac Jacob, apma’iangco lhnac aquieto Egipto lhamacjo apquetcac, lhnac apcacjengueiacmoc lhamacjo m’a. (Ie’tentama) apquetsepma lhnac Jacob, apquella’iangco lhnac moc lhem’a caselha actacmanma (bendición).

Actacja nnelha lhnac apaioma (PACTO) Eniapom Neten, cacpota njan apqueltennascamo lhnac na apaioma Abraham, aplhevecjo lhnac ma’a Isaac, netamen na Jacob, cacpota njan 12 apquetcac Jacob. Ca 12 nac. 12 lhnac ngua’iacmoc apquelpacme’iasma njan ma’a.

Historia Bíblica-Génesis 37-40