9. Eniapom Neten Apqueliequiescama Moisés

Netamen apquetsema lhnac José m’a, lhamacjo apaiomolhem lhnac apcacjaicocjac aquieto Egipto. Nguengquepmec nac nanec ia’ntelhcapa apcacjai’camoc ma’a, aplhamecjo lhnac apquetcac cacpota aptavana’ac neptamen. Nemo lhnac altemesquescamo apquelvesai’a “Israelitas”.

Netamen lhenenga tep anquec nac ntemac apcacjaicamoc Israelita aquieto Egipto. Neten apancavec nac ntemac apentalhnema m’a. Ngquelelvangcame’iangquec nac co Egipto, José lhamacjo actemacja lhnac apquelpasmoma. Ca enemelha lhnac nanec nema allai’o co Israelita m’a ngcanec apentelhe panquec nac ma’a. Faraón nac apuesque m’a Egipto, apqueltemesquescamo lhnac esclavo panco’oc co Egipto m’a.

Apqueleltemo lhna mota co Egipto, lhamacjo apiau’acja tema. Nientelhec anquec nac apquenmacmecama, coca Eniapom Neten noca apqueltacmelquescamoc apquelpasmoma, apentalheniangquec apquetcac co Israel ma’a.

Apuetai’o lhnac Faraón Israelita apquelvetai’a mota apquetcac, apqueltemo lhnac ngcolhec annapacjo apquelennava pquetcoc’oc ma’a, ngcolhec na alhacjo alvata Nilo m’a.

Jave lhnac nane niapac alvetai’o atcac co Israelita apquelennava pquetco’oc. Ngquelposcangquec noca mota’a lhamacjo cnem.

Moclhem’a ngcana’ac noca mang colavanca’ac ngcolpocsec lhamacjo cnem atcac, ia’ma posac noca nlhatamac ma’a cacpota ngconengcanuacjac ma’a ne’iava alvata Nilo, cacpota evomoc ta’iep mematnecjec najan. Apialho lhnoca alenecama mota m’a.

Lhema lhnac apquetca Faraón acvetai’o ia’ma posac, cacpota ngcomoc ngcolanjoc conne m’a. Acvetai’o lhnac nematca, mmangquec nac ma’a malha atca lhna ntemac alanei’o m’a. Acsacjescamo lhnac Israel ngquelvana cacpota ngcotacmequesec ma’a, mang ngcoi’jamoc Faraón apquetca ngquen nac nietemoc angcongua’iam ma’a. Apuanecaniec nac nematca masquengquec nac neme, cacpota ngcsacjesoc ngcangconguacjac Faraón apquetca, actemesquesquecamo lhnac apuesai’a Moisés ma’a.

Apuanecaniec nac Moisés ma’a, lhema cnem na ntemac apuetai’o co Egipto aptecpoicama lhema esclavo Israelita. Apqueltemo lhna niecje Moisés emasuomoc aptemo lhemec Israelita ma’a.

Aclhe’ianmo lhnac apualhoc Moisés “mamma temma jeng que’e”, apcacjemo lhnac lhema co Egipto apcatonengquec nac na m’a. Coca nnengquec noca acvetai’o m’a actaja apquelanai’a m’a.

Netamen aplengai’o lhnac Faraón, actacja apquelanai’a, apqueltemo lhnac ematong ma’a. Coca apqueniengquec nac Moisés lhnac apmaiangcoc ma’a metquelha temma cacpota evomoc ta’iep metecjec na Faraón.

Apquellanecama nepquesec nac aptemengua’iacmoc Moisés aquieto metquelha temma, ta’iepec anquec nac Egipto m’a. Ngqueliemjapue’iacmec nac na Moisés ma’a, janet nac ntemac apquetcac ma’a.

Necsa aapquelanecama lhnac nepquesec Moisés ma’a, lhema cnem nac nanec auetai’ac ia’met alei’voma talha. Coca mang nac ngconiasmac ma’a. Apio’iacmo lhnac Moisés ma’a cacpota etac aquiocjo nquec ma’a. Necsa aptetesca’iacmo lhnac Moisés alaivomacja m’a ia’met, aplengai’o lhnac Eniapom Neten apqueliatecama m’a: “Moisés eljatsos apnactetopmanmcoc. Nientelhec jeng que’e lhepp anac.”(JENGUAPNEC JENGQUE’E LHEPOP ANAC)

Lhnac aptemac Eniapom Neten: “Asuet’ac co’o amap’iosac’a asquenemo lhema. Anguapacsec jata lhe’iap apnacja Faraón, cacpota elentepquesec Israelitas Egipto nac, lhe’iap jajta elaclo’oc mocjec anque. Jata alangcoc lhepop Canaán anac, asqueltenascamo lhnac nanec Abraham, Isaac, cacpota njan Jacob.”

Apcatemmoicama lhnac Moisés: “¿Canja apmo’o eliojoc enenlhet selha jepascama ie? ¿Niejec queha atnec allatemmoma m’a?” lhnac aptemac Eniapom Neten: “YO SOY EL QUE SOY. CO’O ta jelhenec ascapascama, CO’O njan asto apqueliapma’ac apqueliei’jengca Abraham, Isaac, cacpota njan Jacob. Asuesai’a mangcomasquengua’iam.”

Apcai’ac nac Moisés Faraón, mang nac ngcomajai’ac eniacjac apnacja Faraón, nlhe’ianmec nac apualhoc mang colatsama apaioma elanjoc ma’a, lhnac apcapascamac eniacjac Eniapom Neten, Moisés apnacja apetma Aron cacpota epasmoc ma’a. Apqueltennascamavec nac nanec apaioma Eniapom Neten Moisés, cacpota njan Aron, ngcanec Faraón etnenguacjoc na lhma m’a.

Historia Bíblica- Éxodo 1-4