4. Actacja Nnelha Apaioma Eniapom Neten Cacpota Njan Abraham

Netamen acmomai’a ngquescama acvengquepmo lhnac na iantelhcapa m’a, apentalhnecjavec nac enenlhet. Lhema lhnac nanec na apquelpacmeiasma m’a. ntemengquec nac actemacja lhnac apaioma Eniapom Neten, apquelpasmommacpo lhnac na m’a apquellaneiangquec nac lhema apquellavacja aquiavai’a nquec ma’a.

Alamalhco nquec lhnac nanec apualho’oc ma’a enenlhet, mang nac ellalhemoc actacja apaioma Eniapom Neten. Ca apquellanei’o lhnac lhema pa’at acvenactema nquec ma’a apqueleltemo lhnac elvescamoc neten. Apuetai’o lhnac Eniapom Neten apquelpasmommacpo apquenmacmecama, elpasmamecjac na ngcollatsecamaja, cacpota njan ngcoianguomoc meliamolhma.

Ca atlheneianlha lhnac nanec apquelpacmeiama enenlhet ma’a, cacpota enielhpacnec etlhong lhma nquec jam. Coca m’a apquellanecamoc nac apiau’acja temma actemo lhnac acvesai’a “Babel” mo’oc nema altema “atelheneiam”.

Nguengquepmec nac nanec iantelhcapa netamen, apacmetquescamo lhnac nanec Eniapom Neten lhema enenlhet apuesai’a Abram. Lhnac aptemac apcanemo Eniapom Neten, “eieniecja ta lhepop apancoc, cacpota njan apaiomolhema, jata emjangcoc ma’a lhepop asmac’acja nac altennacsec. Atacmelcasoc jata aspasmoma, alanesquesec jata aquiavai’a nquec apcavaja. Neten apanquec jata atnesquesec. Apasmoc jata njan acto la apasmoma, coca mepasmoma la’a mopasmec jata njan co’o m’a. lhamacjo lhma nquec jam enenlhet nalhepo anac ngcolhec jata alpasmo aniem’o lheiap”.

Apqueliejecjavec nac nanec ania’a Abram. Apiantemecjo lhna na aptava Sarai cacpota njan lhamacjo caselha apanco’oc ma’a canjan apquellennengcasecamaja (siervo), cacpota emjangcoc ma’a apqueltennascamacja lhnac nanec Eniapom Neten aquieto Canaan.

Necsa apuaiam nac Abram aquieto m’a Canaán, lhnac aptemac Eniapom Neten: “Elanjo no neiava. Jata anguangcoc lheiap, cacpota njan aptavana’ac neptamen lhamacjo lhepop anac alangcocjac jata”. Netamen ma’a, apnaiacmo lhnac nanec Abram ma’a lhepop anac.

Lhema cnem nanec nane ntemac Abram, aptaniei’o Melquisedec apto lhnac nanec na” Eniapom Neten apto eten apanquec sacerdote apancoc, aptacmelquescamo lhnac nanec apasmoma Abram ma’a”: Netamen, Abram apcaiangco lhnac Melquisedec necja tcoc lhamacjo apquetsecamaja.

Aquiecai’o lhnac mocjom mo’oc, mo’oc iantelhcapa m’a, Abram cacpota njan Saraí, mang nac ngcoluetai’ac mocjom atcac ma’a. Apacmetquescamo lhnac nanec Eniapom Neten Abram, apqueltennascamo lhnac nanec mocjom eniangcoc jata lhema apquetca, cacpota njan apentalhnema aptavana’ac neptamen malha iau’a neten anac. Mang nanec ei’asqueiacmoc Abram actacja apqueltennascama Eniapom Neten. Aplheianmo lhnac Eniapom Neten Abram apto apeivomo mei’asqueiam actacja apqueltennascama.

Netamen Eniapom Neten, aptemo lhnac nanec actacja nnelha apaioma apquelanei’o Abram (PACTO). Janet nac apteac ma’a. lhnac aptemac Eniapom Neten: “anguangcoc jata lhema apquetca panque, anguangcoc jata njan lhepop aquieto nac Canaán aptavana’ac neptamen”. Coca mang nac etai’ac mocjom apquetca Abram ma’a.

Historia Bíblica-Génesis 11-15