10. Acva’iacmo lhnac 10 caselha ngcollatsecama alente’iapma m’a

Apme’iecjec nac Moisés cacpota njan Aaron, apnacja Faraón, lhnac aptemac: “Ca ntac apaioma Apiapma’ac Israelita jeng que’e, ¡Eniangco elentepoc asnemo lhema!” mang nac enialhemoc Faraon. Mang nac eniasecjai’ac elentepoc Israelita Faraon, ¡apianguesca’iacmec noca aquientalhnema apquenmacmecama m’a!

Ngjeclhec nac ntemac Faraon apquenmasma Israelita, apuetai’ac na niecje apquelapascamo 10 caselha ngcol’latcama Eniapom Neten aquieto Egipto. Coca jeng caselha ngcol’latsecama apqueltemo lhnac e’ijanguomjo niecje Eniapom Neten, Faraon. Apto neten apanque tacjalhet lhamacjo caselhaja.

Aptemescasecjo lhnac Eniapom Neten ema alvata Nilo, coca ngjeclhec na ntemac apquenmasma Faraon, Israelita.

Netamen apcapascamo lhac Eniapom Neten, naptecteng aquieto Egipto. Ca apqueltemo lhac Faraon, Moisés emasquecsec ma’a naptecteng. Nta’iecjec na mota aquiennactema apualhoc Faraon, apqueletsepmo m’a naptecteng, mang nac eniasecjai’ac elentepoc Israelita aquieto Egipto.

Apcapascamo lhnac mocjom Eniapom Neten paga m’a, netamen ma’a apcapascamo lhnac na iapa. Ca apqueltemo lhnac ngcolhec ac’iantenguacjo Faraon, Moisés cacpota njan Aaron, lhnac aptemac apquel’lanemo: Elentepques jata Egipto Israelita nac. Ca apacmetquescamo lhnac Eniapom Neten Moisés, apmasquemo lhnac ma’a iapa, cacpota njan paga aquieto Egipto. Coca nta’iecjec na mota aquiennactema apualhoc Faraon, apquenmasvecjo lhnac mocjom Israelita m’a.

Netamen Eniapom Neten apqueltemesquescamo lhnac anmasca a’iempeioc apnactoscama co Egipto cacpota ngcoletsepoc ma’a. Coca Faraon ngjeclhec nac aquiennactema apualhoc, mang nac elentepquescamac Israelita aquieto Egipto.

Lhnac aptemac Eniapom Neten apcanemo Moisés, eclhecja neten tajap napactec Faraon. Netamen alente’iapmo lhnac pascapma apiempe’ioc co Egipto m’a, Israelita lhnoca ngqueltacmanmac apiempe’ioc. Eniapom neten nac aptemesquescamac ac’iennactema apualhoc Faraon, cacpota melentepsec Israelita aquieto Egipto.

Netamen Eniapom Neten aptengquescamo lhnac ajecjo’oc ma’a. Ngquennapmec apquenai’camoc co Egipto m’a, cacpota njan acto apqueliavecja aniep apanco’oc apqueletsepmec nac na m’a. ca apqueltemo lhnac Faraon ngcolhec aclaclosenguacjo Moisés, canjan Aaron, lhnac aptemac apquel’lanemo: “Moi’jamolhma nac co’o. ¡Elaclacja ta Israelita! “ca apacmetquescamo lhnac Moisés Eniapom Neten, ca acmasquemo lhnac acte’iam neten ajecjo’oc ma’a.

Coca Faraon nguectamec na mota aquiennactema apualhoc ma’a. Mang nac eltemoc elentepoc Israelita aquieto Egipto.

Netamen Eniapom Neten apquelapascamo lhnac na Seva m’a aquieto Egipto. Lhnac apto’iangcoc na m’a anamalhca aliacnengquescama ajecjo’oc.

Apcapascamo lhnac na Eniapom Neten ie’nactescama lhma ac’vaneiam ac’vaiacmo 3 acnem. Mang nac elente’iapmac apcacja’iangquelha co Egipto aniem’o ie’nactescama lhma. Coca aquieto apcacjangquelha Israelita, ngquetsai’avec na lhma m’a.

Netemen 9 caselha nac, ngjeclhec nac aquiennactema apualhoc Faraon, mang nac elentepquescamac israelitas ma’a. Aplengai’ac na niecje actacja nnelha apaioma Eniapom Neten cacpota ngcoiacmocjac aptemacja m’a Faraon.

Historia Bíblica- Éxodo 5-10