7. Eniapom Neten Aptacmelquescamo apasmoma Jacob

Apcactengangquec nac nanec ma’a nematcac, metca apuengquepmo lhnac nanec Jacob apnemacja, coca m’a po’oc Esaú vanlha lhnac nanec apiaspngcoma mota apquelpacvaiam ma’a. Jacob lhnac nanec amelaiangquelha m’a Rebeca, Isaac noca apcamelaianlha m’a Isaú.

Ihema cnem apuectama apquelpa'va'iam Esaú, mec anquec na ngacacjemac ma'a Ihnac aptemac Esaú, apcanemo Jacobo: "Asqueltave niecje je'iangcoc quetsec la astoma, ca apjanma nac." Apcatemmoicama lhnac Jocobo: "Je'iamoc secjee apmanie iheiap, aptema apquemjama apmanie apto metro pquetcoc. " apca'iangquec Esaú m'a, aptema apquemjama apmanie metro pqueteoc. Netamen, apca'iangco ihnac quetsec aptoma Jocobo m'a.

Isaac apqueltemo lhnac eniangcoc caselha actacmanma m’a Esaú. Coca Rebeca lhnac nane ntemac aman’ie, altemo lhnac eltacpoc Esaú, Jacob. E’iennengquese jata Isaac ma’a. Apuane’iam apanquec nac aptemac Isaac ma’a, Mmasquengquec nac apuetai’a lhma. Ca aptalhnecjo lhnac Jacob, Esaú aptalhnema ieta’ai apiempec nac nanec apecanmac aquieto apiaspoc, cacapota njan apmeio’oc.

Apme’iecjec nac Jacob m’a, anacja Isaac lhnac aptemac: “Esaú co’o, asuactan’ie, je’iamoc lhe caselha actacmanma. “Apquelpacnemaicama lhnac Isaac quetsec nac apiecpelquemac ma’a ie’tai apiempec, lhna songquec aptecjanmo njan apiemes Esaú aptalhnema, ca apcanemo lhnac Esaú m’a, ca apca’iangco lhnac caselha actamanma m’a.

Nnatjescangquec nac Esaú, ngcanec Jacob lhnac aplecasecjac aptema apquemjama apmanie m’a, aquietemo njan aptema metno pquetcoc, cacpota elhcac caseha actacmanm nquec ma’a. Netamen aclhe’ianmo lhnac apualhoc eniacjec apquetsepo la apiapom ma’a.

Niamavac nac Rebeca actacja aclhe’ianma apualhoc Esaú. Netamen Rebeca cacpota njan Isaac, alapascamo lhnac mocjec ma’a apcacjangquelha acpaiomo lhema.

Lhennenga tep anquec na ntemac apqueliepetcaicama Jocob m’a, Rebeca acnemo lhema, nguengquepmec nac ia’ntelhcapa. Aptava lhna nac ma’a, apquelvetai’o lhnac 12 apquetcac ma’a, Eniapom Neten nac aptemesquescamac ngquescama apquetsecama m’a.

Netamen acva’iacmo lhanc 20 ia’ntelhcapa apna’iam mo’oc necja ta’iepec anquec nc Canaán, coca apuecjec nac Jacob m’a cacpota njan apquetcac, cajan lhamacjo apquelennengcasecaja, apnactoscama clhamacjo lhnac ma’a.

Apcai’avec nac Jacob, Esaú ngjeclhec nac apcanemac apmajai’a eniacjec ma’a. ca apquelapasquescamo lhnac necja apnactoscama metca aquianmoma lhnac ma’a. Apqueliantemecjo lhnac apnacja Esaú, lhnac apta’iangcoc apquellanemo: “Ca apquennengcasema nac lheiap Jacob, apquellaicamoc apnactoscama lhnaclhec. Evatac jata jeng que’e lhnac apta’iangcoc ma’a.

Apcasecjecjavec nac Esaú m’a, Jacob, nemo mo’oc nac ntemac alpaijecja apualho’oc ma’a. Ntacmanmec nac apnema Jacob aquieto Canaán. Netamen apquetsepmo lhnac Isaac ma’a, cacpota elcatonnec ma’a apcanet anac, Jacob, cacpota njan Esaú. Coca m’a apqueleltennascamo lhnac nanec Eniapom Neten Abraham cacpta njan Isaac, lhanc apquetlhevecjac ma’a Jacob, cacpota njan Esaú.

Historia Bíblica-Génesis 25:27-33:30