5. Aplhenammap Nematca

Niecai’ac nac 10 iantelhcapa ma’a Abram cacpota njan Saraí cacpota ngcolvomoc aquieto anaán, ngjeclhec noca ngcolvetai’a atcac ma’a. lhnac nane ntemac Saraí anemo Abram: “Eniapom Neten ngqueniem’ac jetnesquescama metca eietca, coca colhuava nac asvaneiam apanque astajac mamma mocjom eietca, ca Agar jeng que’e. Asquennengcasecama nac jata epatjetangcoc cacpota angelvetac engquetca’ac aniem’o Agar”.

Netamen Abram apatjetaiangco lhnac Agar. Apuetasquescamo lhnac apquenno pquetcoc atca m’a, aptemesquescamo lhnac Ismael apuesai’a Abram ma’a nematca. Coca Saraí ngquemjasecama lhna mota aqtec Agar. 13 lhnac nanec nguaiacmoc iantelhcapa apancoc Ismael ma’a, apacmetquescamo lhnac Eniapom Neten Abram, lhnac aptemac:

Lhnac aptemac Eniapo Neten: “Co’o asto Apiapom apto neten apanque. Angelpenacsec jata lhema nelpacmetecamaja.” Netamen, Abraham apquelteclheclhemo lhnac aptapno’oc nalhepop. Lhnac aptemac na Eniapom Neten apcanemo Abraham:”lheiap jata ngcotnec apquetcac enenlhet lhma nquec jam. Allangcoc jata aptavana’ac neptamem lhepop aquieto iocjalhma Canaán, lheiap jata ngcotnec apancoc, co’o ta njan jetnec Apuesque apancoc ngcotnengueianlha nnelha. Eliactemenques jata njan necja tcoc aquieto apcamelhacja lhamacjo apquelennava pquetco’oc apnemo lhema cacpota njan apquetca’ac.”

Ngcotac jata atca pquenno aptava nac Sarai, ca apquetca nemo nac altennascamo. Etnesques jata apuesai’a Isaac. Alanesquesec jata njan pacto m’a. Jata njan ngcotnec aquiavai’a nquec apcavacja m’a. Netamen, a’iacmongcasejac jata njan apuesai’a Abram, atnesquesecjac jata apuesi’a Abraham, mo’oc nema altema “Tata ngquescama apquetcac.”Cacpota njan apiacmongcasecjo lhnac acvesai’a Sarai, aptemescasecjo lhnac Sara m’a. Neltema coca PRINCISA.

Acvaiacmo lhnac na acnem Abraham apqueliactemenquescama necja tcoc apiempec aquieto apcamelhacja lhamacjo apquelennava pquetco’oc (circuncisión) apquelto apcanengama apnacja. Netamen aquiecai’o lhnac lhema iantelhcapa m’a, ca acvaiacmo lhnac 100 iantelhcapa apancoc Abraham cacpota njan 90 iantelhcapa ncoc Sara, acvetai’o lhnac atca Abraham apquetca. Aptemesquescamo lhnac apuesai’a Isaac Eniapom Neten nac aptema m’a.

Apuanecaniec nac Isaac ma’a, apieconmo lhnac ei’asqueiam Eniapom Neten Abraham ma’a lhnac aptemac: “eiantem jata mocjec apquetca nac lhema cacpota jeiacjasquesec epequenec na neten alvanlhemmalhquelha nac caselhaja (sacrificio).” Apqueliejecjavec nac mocjom Abraham actacja apaioma Eniapom Neten, apquelanecjec Abraham cacpota eniacjec apquetca.

Necsa apquetlhengama lhnac ma’a aquieto apma’acja epuanlhemacja caselha Abraha cacpota njan Isaac , lhna aptemac Isaac: “tata nietnec ientapa ancoc la nenguanlhema la caselha. ¿Mamma nac nepquesec?”. Apcatemmoiccama lhnac Abraham ma’a: “Eniapom Neten jata jengelangcoc nepquesec angennapoc lhnac aptemac apcanemo apquetca m’a”.

Netamen apquelvaiacmo lhnac aquieto apma’acja ta elanac neten apuanlhemacja caselha (sacrificio), apnactetmo lhnac apmeioc apquetca Isaac acpota epequenec neten alvanlhemmalhquelha caselha. Ngcaicama lhnac apcacjema apquetca m’a, lhnac aptemac Eniapom Neten: “¡Elaielh! ¡Meniacja apquetcoc anac! Avanjec jeiai’a lheiap meleniesoc na jelan’o lhema niecje apquetca.”

Netamen apcamelhmo lhnac Abraham ca actonac’a apuetai’o lhema nepquesec alaspoma apcapet’oc iamet. Eniapom Neten nac apienaquescai’a m’a, cacpota eniacjec Abraham nepquesec epacnemecjac ma’a Isaac. Mpaijecjavec anquec nac apualhoc Abraham apuetai’o nepquesec cacpota eniacjec ma’a.

Netamen lhnac nanec aptemac Eniapom Neten, apcanemo Abraham, “actacmelacjo nquec aptemacja elanei’o, apqueltavec jelangcoc lhamacjo, vecjo m’a lhema pjapa panque nac apquetca, asqueltavec co’o altacmelcasoc asquelpasmoma. Aptavana’ac jata ngcotnec apto nac iau’a apentalhnema panque, lhamacjo enenlhet lhma nquec jam eleliajacjavec najan, ngcolhec jata altacelcaso nema alpasmoma apnemo lhema lheiap.

Historia Bíblica-Génesis 16-22