3. Iemmen acmomai’a Aquiavai’a

Nguengquepmec nac iantelhcapa m’a, aplhameiangco lhnac enelhet lhma nquec jam. Apqueltemenguecjo lhma ngcolatsecama cacpota njan meniamelaiam po’oc. Mang nac nanec ngcolasecama apuetai’a Eniapom Neten, ca aclheianmo lhnac nanec na etuasecjac lhamacjo lhma nquec jam apcapascamo lhnac acmamai’a aquiavai’a nquec ma’a.

Coca Noé apqueliejecjo lhnac nanec Eniapom Neten. Enenlhet apeivomo lhnac Noé napactavec apnemolhema meliamolhma. Apqueltenascamo lhnac Eniapom Neten Noé eniapacsec jata acmomai’a aquiavai’a nquec ma’a. lhnac nanec aptemac apcanemo, elana ta loma nemmen aquiavai’a.

Lhnac aptemac Eniapom Neten apcanemo Noé, 140 ta etnec acvenactema, 23 jata njan etnec acpaijema, cacpota njan 13.5 ta njan acvenactema m’a neten. Apquelanai’ac nac nanec Noé m’a 3 nac aptemac au’alho’oc actanecamoc mo’oc neten, cacpota njan lhema atong atcoc. Cacpota evongcasacpoc tep Noé, canjan apquetcac, cacpota njan lhamacjo actemacja caselha neujac necsa acmomai’a aquiavai’a.

Apqueliejecjavec nac nanec Eniapom Neten Noé m’a. Apmangquec nac tacja apaioma Eniapom Neten Noé cacpota njan apquetcac, apquellaneiangco lhnac nanec loma nemen aquiavai’a m’a. Apqueleltenascangquec nac nane niecje Noé enenlhet ngcovac jata acmomai’a aquiavai’a, lhnac nanec aptemac apquelanemo; Elianmongques jata apualho’oc eliocja Eniapom Neten, coca mang nac nanec ellailhemoc enenlhet ma’a.

Lhnac nanec na aptemac apcanemo Eniapom Neten Noé canjan apquetcac, elpeneso ta njan aplhatmecamoc conne aptecamoc la quetlhengcap, cacpota njan caselha neujac actecamoc. Netamen apquelpenescama lhnac nanec ma’a, lhnac nanec aptemac Eniapom Neten apcanemo Noé, etelh jata apmanie loma nemmen, aptava njan cacpota njan 3 apquetcac anac apnacteiangca njan.

Eniapom Neten noca apquelapasquescama caselha neujac, lhema lhnac ngqueno, cacpota lhema njan ngquelvana vecjo lhnac anata m’a, alentalhenemo lhnac loma nemme cacpota ngcolvomoc taiep necsa acmamai’a m’a. Cacpota njan elapacsec Eniapom Neten 7 ngquelenava’ac 7 njan ngqueluana’ac apmescama la mota Eniapom Neten (OFRENDAS). Nsaujommalhquec nac alentalhnema caselha loma nemen, apcapecjec nac Eniapom Neten atong loma nemen.

Netamen ampai’acja lhnac nanec acmamai’a ngquescama nquec ma’a. ¡40 acnem nac nguaiacmoc acmamai’a m’a cacpota njan 40 pelhep najan metca lhnoca acmesquema m’a!. lhnac na nteiapmac iemmen coneng lhepop. Nlanecjavec nac iemmen lhma nquec jam, ngqueliecaiangquec nac metamong acjema alvenactema nque.

Lhamacjo acto alloma nalhepop ngqueletsepmec nac ma’a, nielhnesejec iemmen loma nemmen ma’a, coca m’a enenlhet cacpota njan caselha neujac allentalhnema conne loma nemmen,ngquelvaiacmec nac nanec taiep.

Mmasquengquec nac nanec acmomai’a m’a nielhenecama lhnac loma nemmen neten iemmen acvacmo 5 pelten apmenec, ca acvaiventamo lhnac nanec na iemmen ma’a. Netamen lhema cnem nac nane ntemac quelha aquietnaiacmo neten metaimong acjema m’a, coca avanjec noca mocjom iemmen lhma nquec jam. 3 pelten apmenec nac nanec nguaiacmoc aliepjonguai’o lhnac metaimong alacjema m’a.

Netamen 40 acnem nac nane ntemac mocjom apcapascamo lhnac nanec lhema mamá Noé m’a, apqueltemo lhnac eliama aquiemac’acja lhma la’a. apquempaicama lhnac mamá apqueliaicama aquiemac’acja lhma, mang noca etecjac ma’a.

Mo’oc acnem na ntemac mocjom ma’a apacnemecjo lhnac lhema conemmactec Noé. Mang nac nanec na etenguaiacmoc aquiemac’acja lhma m’a, apuetacmec nac conemmactec apnacja Noé m’a. lhema semana lhna ntemac mocjom apacnemecjo conemmactec, ¡apuectamo lhnac ma’a conemmactec lhec coca apsentamo lhnac iamet olivo nau’a alhcapoc! ¡Ntemmentaiec nac nanec iemmen, cacpota ngcoltectepecjac na iamet atco’oc!.

Apquelailhemo lhnac mocjom mo’oc semana Noé, apacnemecjo lhnac mocjom conemmactec 3 nac ntemac apacnomama coca eu’actamo lhnac ma’a apuetangueiacmec nac nanec aquiemac’acja lhma m’a!

2 pelten apmenec na ntemac aquiecai’a m’a, lhnac nanec aptemac Eniapom Neten apcanemo Noé, “lheiap, apquetcac, cacpota lhamacjo caselha neujac, ngcolentep jata conne loma nemmen. Epentalhnecjac jata njan apquetcac, canjan aptavana’ac neptamen lhma nquec jam”. Quelenteiapmec nac Noé apquecac loma nemen canjan caselha neujac.

Netamen apteiapma lhnac loma nemmen Noé, neten apquelvanlhemcja caselha ca apquennamec nac moclhem’a caselha neujac ma’a. Nleclemavec nac apualhoc Eniapom Neten actacja apquelanai’a m’a Noé, apcaiangco lhnac bendición Noè m’a cacpota njan apquetcac.

Lhnac nanec aptemac Eniapom Neten: “asqueltavec co’o anguangcoc aspaioma motuasecjec jata co mocjom nalhepop anac aniem’o meliamolhma enenlhet, monguapasec jata mocjom ngquescama acmomai’a lhma nquec jam, niecje necsa aptema pquetcoc aclheianma apualhoc ngcoletsecamaja.”

Ca ampai’acja lhnac secjec tep nac nanec apquelanai’a pemjet cacpota mongenatquesec ma’a, apecquenecjo lhnac apaioma m’a. aptepque mota pemjet neten, ngcolheianuacjo mota apualhoc Eniapom Neten, actemacja lhnac nanec apaioma apquellanei’o enenlhet.

Historia Bíblica-Génesis 6-8