‘ဂျိုးဇက်’နှင့် သူ၏မိသားစုအား ဘုရားရှင်ကယ်တင်ခြင်း

နှစ်ပေါင်းများစွာကြာသောအခါ ‘ယာကုပ်’သည် အသက်အရွယ်အိုမင်းပြီဖြစ်သဖြင့် ၎င်း၏ အချစ်ဆုံးသား ‘ယောသပ်’ကို သူ၏ တိရိစ္ဆာန်များအား စောင့်ရှောက်ပေးနေသော အစ်ကိုထံသို့ စစ်ဆေးရန် စေလွှတ်လိုက်သည်။

‘ယောသပ်’၏ ညီအစ်ကိုများက ‘ယောသပ်’သည် သူတို့အဖေ၏ အချစ်ဆုံးသားဖြစ်ပြီး သူတို့၏ အုပ်ချုပ်သူဖြစ်လာမည်ဟု အိပ်မက်မက်သောကြောင့် ၎င်းအား မုန်းတီးကြ၏။ ‘ယောသပ်’သည် သူ၏ အစ်ကိုများထံသို့ လာသောအခါတွင် သူတို့သည် ၎င်းအားဖမ်းဆီး၍ ကျွန်ရောင်းသူများထံသို့ ရောင်းစားလိုက်ကြသည်။

‘ယောသပ်’၏ညီအကိုများသည် အိမ်သို့ပြန်ခါနီးတွင် ‘ယောသပ်’၏ အဝတ်အစားများအားယူ၍ ဆိတ်သွေးများတွင် နှစ်လိုက်ပြီး သူတို့၏ ဖခင်အား ထိုအဝတ်အစားများကို ပြ၍ တောရိုင်းတိရိစ္ဆာန်များက ‘ယောသပ်’ အား သတ်လိုက်ပြီဟုအ ထင်ရောက်စေသည်။ ‘ယာကုပ်’သည် အလွန်ဝမ်းနည်းသွားလေသည်။

ကျွန်ရောင်းဝယ်သူများသည် ‘ယောသပ်’အား အီဂျစ်သို့ခေါ်ဆောင်သွားကြသည်။ အီဂျစ်သည် နိုင်းမြစ်ကမ်းဘေးတွင်ရှိသည့် ကြီးမား၍အင်အားကြီးမားသောနိုင်ငံတစ်နိုင်ငံဖြစ်သည်။ ကျွန်ရောင်းဝယ် သူများသည် ‘ယောသပ်’အား ချမ်းသာသော အစိုးရအရာရှိတစ်ဦးထံသို့ ရောင်းလိုက်သည်။ ‘ယောသပ်’သည် သူ၏ သခင်အား ကောင်းမွန်စွာ အလုပ်အကျွေးပြုသဖြင့် ဘုရားသခင်က သူ့အား ကောင်းချီးပေးလေသည်။

သူ့သခင်၏ဇနီးသည် ‘ယောသပ်’နှင့် အိပ်ရန်ကြိုးစားလေသည်။ သို့သော် ‘ယောသပ်’ သည် ဘုရားရှင်အား ဆန့်ကျင်ပြီး ပြစ်မှုမကျူးလွန်လိုသောကြောင့် ငြင်းဆန်ခဲ့သဖြင့် သူမသည် အလွန်အမင်းဒေါသထွက်သွားပြီး ‘ယောသပ်’ အား ထောင်ထဲသို့ ပို့နိုင်ရန် စွပ်စွဲလေသည်။ ထောင်ကျသည်အထိ ဘုရားရှင်အားသစ္စာရှိသဖြင့် ဘုရားရှင်သည် ‘ယောသပ်’အား ကောင်းချီးပေးလေသည်။

(၂) နှစ်ကြာပြီးနောက် ‘ယောသပ်’သည် အပြစ်ကင်းစင်သော်လည်း ထောင်ထဲ၌ပင်ရှိနေသေးသည်။ တစ်ညတွင် ‘ဖာရို’ဟုခေါ်သော အီဂျစ်ဘုရင်သည် ၎င်းအားကြီးစွာစိတ်အနှောက်အယှက်ပေးသော အိပ်မက်နှစ်ခုအားမြင်မက်လေသည်။ ထိုအိပ်မက်များအား ၎င်း၏ပညာရှိများသည် မည်သူမျှ မဖော်ထုတ်နိုင်ပေ။

ဘုရားရှင်သည် ‘ယောသပ်’အား အိပ်မက်၏ အဓိပ္ပါယ်ကို ဖော်နိုင်သော စွမ်းရည်အား ပေးထားလေသည်။ ‘ဖာရို’ ဘုရင်သည် ‘ယောသပ်’ အား ထောင်ထဲမှ ခေါ်ဆောင်လာစေခဲ့ပြီး ၎င်း၏ အိပ်မက်များအား ဖတ်ခိုင်းသောအခါတွင် “ဘုရားရှင်သည် အစာရေစာပေါများသောနှစ် (၇)နှစ်နှင့် ကပ်ဘေးကျရောက်သော(၇)နှစ်ကို ဖြစ်စေလိမ့်မည်” ဟုပြောကြားလိုက်သည်။

ဖာရိုဘုရင်သည် ‘ယောသပ်’အား အလွန်အမင်းနှစ်သက်သဘောကျပြီး အီဂျစ်တခွင်တွင် ဒုတိယမြောက်အာဏာအရှိဆုံးသူအဖြစ် သတ်မှတ်လိုက်လေသည်။

‘ယောသပ်’ သည် လူများအား အစာရေစာပေါများသောနှစ်တွင် အစာရေစာမြောက်များစွာ သိုလှောင်စေပြီးအငတ်ဘေး (၇) နှစ် ဆိုက်သောအခါတွင် စားစရာများရရှိစေရန်အတွက် ‘ယောသပ်’ သည် လူများအား အစားအသောက်များကို ရောင်းချပေးလေသည်။

အငတ်ဘေးသည် အီဂျစ်တစ်ခုထဲတွင်မဟုတ်ဘဲ ‘ယာကုပ်’ နှင့် သူ၏မိသားစုနေထိုင်သော ခါနန်တွင်လည်း ပြင်းထန်စွာဖြစ်ပွားလေသည်။

ထို့ကြောင့် ‘ယာကုပ်’သည် သူ၏ သားအကြီးများအား အီဂျစ်သို့ အစားအစာဝယ်ရန် စေလွှတ်လိုက်သည်။ ညီအစ်ကိုများသည် အစားအစာဝယ်နေစဉ် ရှေ့၌ရပ်နေသော ‘ယောသပ်’ အား မမှတ်မိကြပေ။ သို့သော် ‘ယောသပ်’မှာ ၎င်းတို့အား မှတ်မိလေသည်။

ထို့နောက်သူ၏ ညီအစ်ကိုများ ပြောင်းလဲသွားခြင်းရှိမရှိအား စမ်းသပ်ပြီး နောက်‘ယောသပ်’ သည် ၎င်းတို့အား “ကျွန်ုပ်သည် သင်တို့၏ညီဖြစ်သူ ‘ယောသပ်’ ဖြစ်သဖြင့် မကြောက်လန့်ကြပါနှင့်။ သင်တို့သည်ယုတ်မာစွာဖြင့် ကျွန်ုပ်အားကျွန်အဖြစ်ရောင်းစားလိုက်ကြသည်။သို့သော်ဘုရားရှင်သည်ကျွန်ုပ်အားကောင်းကျိုးများခံစားရရန်အတွက်ထိုဆိုးယုတ်သောအရာကိုအသုံးပြုခဲ့ခြင်းသာဖြစ်သည်။ သင်နှင့်သင်၏မိသားစုတို့အား ကျွန်ုပ်ထောက်ပံ့ပေးနိုင်ရန် အီဂျစ်တွင်လာ၍ နေထိုင်ကြပါ” ဟုဆိုလိုက်လေသည်။

‘ယောသပ်’၏ညီအစ်ကိုများသည် သူတို့၏အိမ်သို့ ပြန်ရောက်သောအခါတွင် သူတို့၏ဖခင်ဖြစ်သူ အား ‘ယောသပ်’ သည် အသက်ရှင်နေသေးကြောင်းပြောပြရာယာကုပ်သည် အလွန်ပင်ဝမ်းသာပျော်ရွှင်သွားလေသည်။

‘ယာကုပ်’သည် အိုမင်းနေပြီဖြစ်သော်လည်း အီဂျစ်သို့ ပြောင်းရွှေ့ပြီး ၎င်း၏မိသားစုနှင့်အတူ ထိုနေရာ၌ ပျော်ရွှင်စွာနေထိုင်ကြလေသည်။ ‘ယာကုပ်’ မကွယ်လွန်မီ ၎င်းတို့၏ သားတစ်ဦးစီတိုင်းအား ကောင်းချီးများပေးခဲ့လေသည်။

ဘုရားရှင်က ‘အာဗြဟံ’ အား ပေးခဲ့သောပဋိညာဉ်သည် ‘ဣဇာက်’ထံသို့ လက်ဆင့်ကမ်းခြင်းခံရပြီးနောက် ‘ယာကုပ်’နှင့်သူ၏သား (၁၂) ယောက်တို့၏ မိသားစုထံသို့ ဆက်လက်ရောက်ရှိသွားလေသည်။ထိုမိသားစု (၁၂) စုတို့၏ မျိုးဆက်များသည်လည်း ဣသရေလတွင်ရှိသော လူမျိုး (၁၂) မျိုး ဖြစ်သွားလေသည်။

__