4. E Devleso savez e Avramesa

But berša palo baro paj, opet sesa but manuša ano sveto, thaj savore vačarde jekhe čhibasa. O Dol vačarda te pherdol i phuv, thaj von ni čerde gova. Nego čidijepe thaj čerde jekh foro.

Sesa but ponosna, thaj ni manglje te šunen o Dol so vačarda lenđe. Čak lije te čeren jekh baro toranj te bi avena ko nebo. O Dol dikhlja gova te si katane ka čeren bilačhipe, thaj šaj čeren po but bare bezeha.

Golese o Dol čerda te ma avol jekh čhib nego but čhiba thaj von širisajle ko celo sveto. A o foro so lije te čeren dijale vika Babel so si "zbunimo".

Nakhle nekolo šel berša, o Dol vačarda jekhe manušese. Leso alav si Avram. O Dol vačarda lese: „Ačhav ći phuv thaj će familija, thaj đa ani phuv savi me ka sikavav tuče. Ka bahtarav tut thaj tutar ka čerav baro narodo. Ka čerav tu slavno. Ka bahtarav kola so tut bahtaren i ka čerav harami kolen so tut čeren harami. Sa e familije ki phuv ka aven zbog tute bahtarde.“

O Avram šunda e Devle. Lija pe romnja, e Saraja, pe kandinen thaj sa so sasale. Thaj đelo ani phuv savi o Dol sikadalese, phuv Kanaan.

Kana o Avram reslo ano Kanaan, O Dol vačarda: “Dik sa paše tute. Ka dav tut taj čire potomkurenđe ano nasledstvo sa kaja phuv so šaj dičhe.“ Gothe o Avram naselisajlo.

Jekh đive, o Avram arakhlja e Melhisedeke, e rašaje e Najbare Devleso. O Melhisedek bahtarda e Avrame i vačarda: „O Najbaro Dol kaso si o ćeri thaj i phuv bahtarol e Avrame.“ Tegani o Avram dijale dešto kotor (desetko) tar sa so isile.

But berša nakhle, a e Avrame taj e Saraja naj sasa len čhavo. O Dol opet vačarol e Avramese da ka avol len čhavo i gači potomkura kozom si ćerenja ko nebo. O Avram pačaja ane Devleso dindo lafi. O Dol proglasisada e Avrame čačimaso (pravedno) golese kaj pačaja ane leso lafi savo dija.

O Dol čerda sovli e Avramesa. I sovli si vačaripe maškare duj riga. O Dol vačarda: „Ka dav tut čhave tar čiro telo. Ka dav tut i phuv o Kanaan čire potomkurenđe.“ A e Avrame još naj sasa čhavo.

Biblisko paramič andaro: 1 lil e Mojsijaso 11-15