ကမ္ဘာကြီးအားအပြစ်တရားဝင်ရောက်ခြင်း

(2-1)‘အာဒမ်’နှင့်သူ၏ဇနီးသည် ဘုရားရှင်ဖန်ဆင်းပေးထားသည့် လှပသောဥယျာဉ်ကြီးထဲတွင် အလွန်ပျော်ရွှင်စွာ နေထိုင်နေခဲ့ကြသည်။ ၎င်းတို့နှစ်ဦးစလုံးသည် အဝတ်အစားများမဝတ်ဆင်ကြပေ။ သို့သော် ဤကမ္ဘာမြေပေါ်တွင် အပြစ်တရားမရှိသောကြောင့် မည်သည့်အရှက်တရားမှ မခံစားရပါ။ ၎င်းတို့သည် ပုံမှန်ပင် ပန်းခြံထဲ၌လမ်းလျှောက်ကြပြီး ဘုရားရှင်နှင့်စကားပြောကြသည်။

(2-2)သို့သော်၎င်းဥယျာဉ်ထဲတွင်အလွန်ကောက်ကျစ်သော မြွေတစ်ကောင်ရှိလေသည်။ ၎င်းမြွေကမိန်းမအား "ဘုရားရှင်သည်သင်တို့အားဤဥယျာဉ်ထဲရှိတချို့အပင်က အသီးကိုမစားရန် ပညတ်ထားတယ်ဆိုတာအမှန်ပင်ဟုတ်ပါသလား"ဟု မေးမြန်းလိုက်လေသည်။

(2-3)ထိုမိန်းမက "ဘုရားရှင်သည်ကောင်းခြင်းဆိုးခြင်းကိုသိစေနိုင်သော အသိဉာဏ်သစ်ပင်မှလွဲ၍ မည်သည့်အပင်က အသီးကိုမဆို စားသုံးနိုင်သည်"ဟု ကျွန်ုပ်တို့အားမှာကြားထားပါသည်။"ထိုအသီးအား စားရန်ပင်မဆိုနှင့် ထိရုံနှင့်ပင်သေလိမ့်မည်ဟု ဘုရားရှင်က ကျွန်ုပ်တို့အားပညတ်ထားပါသည်"ဟုဖြေဆိုလိုက်လေသည်။

(2-4)ထိုအခါတွင်မြွေက “ဒါတွေကအမှန်မဟုတ်ပါ၊ သင်တို့သေမည်မဟုတ်ပါ၊ ထိုအသီးကိုသင်တို့စားလိုက်လျှင် ဘုရားရှင်ကဲ့သို့ပင် အကောင်းနှင့်အဆိုးများကိုချက်ချင်း နားလည်သဘောပေါက်သွားမည်ကို ဘုရားရှင်ကစိုးရိမ်၍သာဤသို့ပညတ်ထားခြင်းဖြစ်သည်။”ဟုပြန်လည်ပြောဆိုလိုက်လေသည်။

(2-5)မိန်းမကထိုအသီးများသည် အလွန်လှပ၍ စားချင်စဖွယ်ဖြစ်သည်ဟု မြင်လေ၏။ သူမသည် ဉာဏ်ပညာကြီးမြတ်ချင်သောကြောင့် ထိုအသီးအချို့ကို ခူးယူစားသုံးလိုက်သည်။ သူမနှင့်အတူ ပါလာသော သူမ၏ခင်ပွန်းအားကျွေးလိုက်သဖြင့် အာဒမ်ကလည်းစားလိုက်လေသည်။

(2-6)ရုတ်တရက်တွင်သူတို့၏အသိဥာဏ်များပွင့်သွားပြီးနောက် သူတို့ကိုယ်လုံးတည်းဖြစ်နေသည်ကို သတိထား မိသွားကြသည်။ သူတို့သည်သစ်ရွက်များကို အဝတ်အစားအဖြစ်ပြုလုပ်ပြီး ဖုံးအုပ်ရန်ကြိုးစားကြပါသည်။

(2-7)ထိုအချိန်တွင် ဘုရားရှင်သည်ဥယျာဉ်ထဲတွင် လမ်းလျှောက်နေသည်ကို အာဒမ်နှင့်သူ၏ဇနီးတို့က ကြားလိုက်ကြသည်။ ထိုအခါ ၎င်းတို့နှစ်ဦးစလုံး ဘုရားရှင်အား ပုန်းကွယ်နေကြသည်။ ထိုအခါ ဘုရားရှင်က “သင်တို့ဘယ်မှာလဲ” ဟု မေးလေသည်။ ‘အာဒမ်’က “ကျွန်ုပ်သည် ဘုရားရှင်ဥယျာဉ်ထဲမှာ လမ်းလျှောက်နေသည်ကိုကြားရပါသည်၊ ကျွန်ုပ်တို့သည် ကိုယ်လုံးတည်းဖြစ်နေသောကြောင့် ကြောက်ရွံ့၍ပုန်းနေပါသည်"ဟု ဖြေကြားခဲ့ပါသည်။

(2-8)ထိုအခါဘုရားရှင်က “သင်တို့ ကိုယ်လုံးတည်းဖြစ်နေသည်ဟု ဘယ်သူကပြောသနည်း၊ ငါ မစားနှင့်ဟုပြောထားသောအသီးအား စားခဲ့ပါသလား” ဟုမေးမြန်းလိုက်ပါသည်။ထိုအခါအာဒမ်က “ဘုရားရှင်က ကျွန်ုပ်ကို ဤမိန်းမအားပေးခဲ့ပြီး၊ ဤမိန်းမက ကျွန်ုပ်အား ဤအသီးကိုပေးပါသည်”ဟု ပြန်လည်ဖြေကြားလိုက်သည်။ ထိုအခါဘုရားရှင်သည် ထိုမိန်းမအား “သင်ဘာလုပ်မိပြီလဲ”ဟု မေးလိုက်သည်။ မိန်းမက “မြွေက ကျွန်ုပ်အားလှည့်စားလိုက်သည်”ဟု ပြန်လည်ဖြေကြားလိုက် လေသည်။

(2-9)ဘုရားရှင်သည်မြွေအား “ကျွန်ုပ် သင့်အားကျိန်စာတိုက်လိုက်သည်။ သင်သည်ဝမ်းဗိုက်နှင့် တွားသွားပြီး မြေကြီးကိုစားရမည်။ သင်နှင့်ဤမိန်းမသည် တစ်ဦးနှင့်တစ်ဦးမုန်းတီးကြပြီး သင်၏အမျိုးအနွယ်နှင့် သူမ၏အမျိုးအနွယ်တို့သည်အချင်းချင်းမုန်းတီးကြလိမ့်မည်။ ဤမိန်းမ၏မျိုးရိုးစဉ်ဆက် များမှာ သင်၏ဦးခေါင်းကိုနင်းချေကြမည်ဖြစ်ပြီး သင်သည်လဲသူတို့၏ခြေဖနောင့်အားပေါက်လိမ့် မည်။”ဟုမိန့်တော်မူလိုက်သည်။

(1-10)ထို့နောက်ဘုရားရှင်က မိန်းမအား “သင်သည် ကလေးမွေးဖွားရာတွင် အလွန်အမင်းနာကျင်စေမည်။ သင်သည် သင်၏ယောက်ျားအား ချစ်ခင်စုံမက်ပြီးသင့်ယောက်ကျားက သင့်အပေါ်တွင် ဩဇာညောင်းလိမ့်မည်။”ဟုမိန့်တော်မူလိုက်လေသည်။

(2-11)ဘုရားရှင်က ယောက်ျားအား “သင်သည် သင်၏မိန်းမစကားအားနားထောင်ပြီး ကျွန်ုပ်အား ဖီဆန်ခြင်းပြုသည်။ ယခုအခါတွင် မြေကြီးသည် ကျိန်စာသင့်၍ မြေကြီးမှသီးနှံထွက်ရန်အတွက် ခက်ခဲစွာစိုက်ပျိုးရလိမ့်သည်။ ထို့နောက်သင်သေဆုံးပြီး သင်၏ခန္ဓာကိုယ်သည် မြေမှလာ၍မြေကြီးထဲသို့ပြန်လည်ရောက်ရှိသွားမည်။” အမျိုးသားက သူ၏မိန်းမအား အသက်ပေးသူဟူသော အဓိပ္ပါယ်ဖြင့် ‘ဧဝ’ဟု အမည်ပေးခဲ့သည်။ အဘယ့်ကြောင့်ဆိုသော် သူမသည် လူတိုင်း၏မိခင်ဖြစ်လာမည် ဖြစ်သောကြောင့်ဖြစ်သည်။ ဘုရားရှင်က ‘အာဒမ်’နှင့် ‘ဧဝ’အား တိရိစ္ဆာန်တို့၏သားရေများဖြင့် ဝတ်စားဆင်ယင်ပေးတော်မူလေသည်။

(2-12)ထို့နောက် ဘုရားရှင်က “ယခုအခါတွင် ထိုလူသားတို့သည် ငါတို့ကဲ့သို့ အကောင်းအဆိုးများကို ခွဲခြားသိမြင်လာကြပြီးဖြစ်သဖြင့်သူတို့အား အသက်၏သစ်ပင်မှအသီးကိုစား၍ ထာဝရအသက်ရှင်ခွင့် မပြုသင့်ပေ"၊ ထို့ကြောင့် ဘုရားရှင်သည်သူတို့အားဥယျာဉ်၏အဝေးသို့ ထွက်ခွာသွားစေသည်။ ဘုရားရှင်က အသက်၏သစ်ပင်မှ သစ်သီးများအား မည်သူမျှမစားနိုင်စေရန် တန်ခိုးကြီးသောနတ် စေတမန်များကို ထိုဥယျာဉ်၏အဝင်ဝတွင်စောင့်စေလေသည်။

__