‘ယောသပ်’နှင့် သူ၏မိသားစုအား ဘုရားရှင်ကယ်တင်တော်မူခြင်း

နှစ်ပေါင်းများစွာကြာသောအခါ ‘ယာကုပ်’သည် အသက်အရွယ်အိုမင်းပြီဖြစ်သဖြင့် ၎င်း၏ အချစ်ဆုံးသား ‘ယောသပ်’ကို သူ၏ တိရိစ္ဆာန်များအား စောင့်ရှောက်ပေးနေသော အစ်ကိုထံသို့ စစ်ဆေးကြည့်ရှုရန် စေလွှတ်လိုက်သည်။

(၈-၂)‘ယောသပ်’၏ ညီအစ်ကိုများက ‘ယောသပ်’သည် သူတို့အဖေ၏ အချစ်ဆုံးသားဖြစ်ပြီး သူတို့၏ အုပ်ချုပ်သူဖြစ်လာမည်ဟုယောသပ် အိပ်မက်မက်သောကြောင့် ၎င်းအား မုန်းတီးကြ၏။ ‘ယောသပ်’သည် သူ၏ အစ်ကိုများထံသို့ လာသောအခါတွင် သူတို့သည် သူ့အားဖမ်းဆီး၍ ကျွန်ရောင်းသူကုန်သည်များထံသို့ ရောင်းစားလိုက်ကြသည်။

(၈-၃)‘ယောသပ်’၏ညီအကိုများသည် အိမ်သို့ပြန်ခါနီးတွင် ‘ယောသပ်’၏ အဝတ်အစားများအားယူ၍ ဆိတ်သွေးများတွင် နှစ်လိုက်ပြီး သူတို့၏ ဖခင်အား ထိုအဝတ်အစားများကို ပြ၍ တောရိုင်းတိရိစ္ဆာန်များက ‘ယောသပ်’ အား သတ်လိုက်ပြီဟုအ ထင်ရောက်စေသည်။ ‘ယာကုပ်’သည် အလွန်ဝမ်းနည်းသွားလေသည်။

(၈-၄)ကျွန်ကုန်သည်များသည် ‘ယောသပ်’အား အီဂျစ်သို့ခေါ်ဆောင်သွားကြသည်။ အီဂျစ်သည် နိုင်းမြစ်ကမ်းဘေးတလျှောက်တွင်ရှိပြီးကြီးမားကျယ်ဝန်း၍အင်အားကြီးမားသောနိုင်ငံတစ်နိုင်ငံဖြစ်သည်။ ကျွန်ကုန်သည်များသည် ‘ယောသပ်’အား ချမ်းသာသော အစိုးရအရာရှိတစ်ဦးထံသို့ ရောင်းလိုက်သည်။ ‘ယောသပ်’သည် သူ၏ သခင်အား ကောင်းမွန်စွာ အလုပ်အကျွေးပြုသဖြင့် ဘုရားသခင်က သူ့အား ကောင်းချီးပေးလေသည်။

(၈-၅)သူ့သခင်၏ဇနီးသည် ‘ယောသပ်’နှင့် အတူအိပ်ရန်ကြိုးစားလေသည်။ သို့သော် ‘ယောသပ်’ သည် ဘုရားရှင်အား ဆန့်ကျင်ပြီး ပြစ်မှုမကျူးလွန်လိုသောကြောင့် ငြင်းဆန်ခဲ့သဖြင့် သူမသည် အလွန်အမင်းဒေါသထွက်သွားပြီး ‘ယောသပ်’ အား ထောင်ထဲသို့ ပို့နိုင်ရန်မတရား စွပ်စွဲလေသည်။ ယောသပ်သည်ထောင်ကျသည်အထိ ဘုရားရှင်အားသစ္စာရှိစွာယုံကြည်ကိုးစားသဖြင့် ဘုရားရှင်သည် ‘ယောသပ်’အား ကောင်းချီးပေးလေသည်။

(၈-၆) နှစ် နှစ်ခန့်ကြာပြီးနောက် ‘ယောသပ်’သည် အပြစ်ကင်းစင်သော်လည်း ထောင်ထဲ၌ပင်ရှိနေသေးသည်။ တစ်ညတွင် အီဂျစ်ဘုရင်ဖာရောသည် အိပ်မက်နှစ်ခုမြင်မက်၍သူ့အားကြီးစွာစိတ်အနှောင့်အယှက်ဖြစ်နေသည်။ ထိုအိပ်မက်များ၏အနက်အဓိပ္ပာယ်ကိုသူ၏ပညာရှိများသည် မည်သူမျှ မဖော်ထုတ်နိုင်ပေ။

(၈-၇)ဘုရားရှင်သည် ‘ယောသပ်’အား အိပ်မက်၏ အဓိပ္ပါယ်ကို ဖော်နိုင်သော စွမ်းရည်အား ပေးထားလေသည်။ ‘ဖာရော’ ဘုရင်သည် ‘ယောသပ်’ အား ထောင်ထဲမှ ခေါ်ဆောင်လာစေခဲ့ပြီး သူ၏ အိပ်မက်များအား အဓိပ္ပါယ်ပြန်ခိုင်းသောအခါတွင် “ဘုရားရှင်သည် အစာရေစာပေါများသောနှစ် (၇)နှစ်နှင့် ကပ်ဘေးကျရောက်သော(၇)နှစ်ကို ဖြစ်စေလိမ့်မည်” ဟုပြောကြားလိုက်သည်။

(၈-၈) ဖာရောဘုရင်သည် ‘ယောသပ်’အား အလွန်အမင်းနှစ်သက်သဘောကျပြီး အီဂျစ်တခွင်တွင် ဒုတိယမြောက်အာဏာအရှိဆုံးသူဘုရင်ခံအဖြစ် ခန့်အပ်လိုက်လေသည်။

(၈-၉) ‘ယောသပ်’ သည် လူများအား အစာရေစာပေါများသောခုနစ်နှစ်အတွင်းတွင် အစာရေစာမြောက်များစွာ သိုလှောင်စေသည်။ထိုနောက်အငတ်ဘေး ခုနစ်နှစ် နှစ် ဆိုက်သောအခါတွင် ‘ယောသပ်’ သည် လူများအား အစားအသောက်များလုံလောက်စွာရရှိစေရန် ရောင်းချပေးလေသည်။

အငတ်ဘေးသည် အီဂျစ်တစ်ခုထဲတွင်သာမက‘ယာကုပ်’ နှင့် သူ၏မိသားစုနေထိုင်သော ခါနန်တွင်လည်း ဖြစ်ပွားလေသည်။

(၈-၁၁)ထို့ကြောင့် ‘ယာကုပ်’သည် သူ၏ သားအကြီးများအား အီဂျစ်သို့ အစားအစာဝယ်ရန် စေလွှတ်လိုက်သည်။ ညီအစ်ကိုများသည် အစားအစာဝယ်နေစဉ် ရှေ့၌ရပ်နေသော ‘ယောသပ်’ အား မမှတ်မိကြပေ။ သို့သော် ‘ယောသပ်’မှာ ၎င်းတို့အား မှတ်မိလေသည်။

(၈-၁၂)ထို့နောက်သူ၏ ညီအစ်ကိုများ ပြောင်းလဲသွားခြင်းရှိမရှိအား စမ်းသပ်ပြီး နောက်‘ယောသပ်’ သည် ၎င်းတို့အား “ကျွန်ုပ်သည် သင်တို့၏ညီဖြစ်သူ ‘ယောသပ်’ ဖြစ်သဖြင့် မကြောက်လန့်ကြပါနှင့်။ သင်တို့သည်ယုတ်မာစွာဖြင့် ကျွန်ုပ်အားကျွန်အဖြစ်ရောင်းစားလိုက်ကြသည်။သို့သော်ဘုရားရှင်သည်ကျွန်ုပ်အားကောင်းကျိုးများခံစားရရန်အတွက်ထိုဆိုးယုတ်သောအရာကိုအသုံးပြုခဲ့ခြင်းသာဖြစ်သည်။ သင်နှင့်သင်၏မိသားစုတို့အား ကျွန်ုပ်ထောက်ပံ့ပေးနိုင်ရန် အီဂျစ်တွင်လာ၍ နေထိုင်ကြပါ” ဟုထုတ်ဖော်‌ပြောဆိုလိုက်လေသည်။

(၈-၁၃) ‘ယောသပ်’၏ညီအစ်ကိုများသည် သူတို့၏အိမ်သို့ ပြန်ရောက်သောအခါတွင် သူတို့၏ဖခင်ဖြစ်သူ အား ‘ယောသပ်’ သည် အသက်ရှင်နေသေးကြောင်းပြောပြရာယာကုပ်သည် အလွန်ပင်ဝမ်းသာပျော်ရွှင်သွားလေသည်။

(၈-၁၄) ‘ယာကုပ်’သည် အိုမင်းနေပြီဖြစ်သော်လည်း အီဂျစ်သို့ ပြောင်းရွှေ့ပြီး ၎င်း၏မိသားစုနှင့်အတူ ထိုနေရာ၌ ပျော်ရွှင်စွာနေထိုင်ကြလေသည်။ ‘ယာကုပ်’ မကွယ်လွန်မီ ၎င်းတို့၏ သားတစ်ဦးစီတိုင်းအား ကောင်းချီးများပေးခဲ့လေသည်။

(၈-၁၅) ဘုရားရှင်က ‘အာဗြဟံ’ အား ပေးခဲ့သောပဋိညာဉ်သည် ‘ဣဇာက်’ထံသို့ လက်ဆင့်ကမ်းခြင်းခံရပြီးနောက် ‘ယာကုပ်’နှင့်သူ၏သား တစ်ဆယ့်နှစ်ယောက်တို့၏ မိသားစုထံသို့ ဆက်လက်ရောက်ရှိသွားလေသည်။ထိုမိသားစု တစ်ဆယ့်နှစ် စုတို့၏ မျိုးဆက်များသည်လည်း ဣသရေလတွင်ရှိသော လူမျိုး တစ်ဆယ့်နှစ်မျိုး ဖြစ်သွားလေသည်။

__