၁။ အစွန်းပြချင်န်း
ဟဲယ်အကြောင်းအရာဟာအစအူးခါက ဖရားချဲင်န်ကလဲ့အများကီးအော်အစွန်းပြခဲ့လယ်။ ဖရားချဲင်န်ဟာလောက ကီးနင်န်အများကီးကော် ခြောက်ရက်လုံးလုံးအစွန်းပြခဲ့ဝါး။ ဖရားချဲင်န်ဟာကဖာကီးကော်စမော်အစွန်းပြတုန်းခါဖာအရာ မော်ပရှိဆေးဝဲလော့ကဖာဟာမဲင်န်းနေခါ ဖာမျိုးဝပရှိဆေးဝဲ့ဝါး။ ဟဲင်န်းပင်မယ့် ဖရားချဲင်န်ယဲ့ဝိဉာဉ်တော်ဟာကဖာ့ရေ ပြင်န်ထဲမှာတဆက်အုံးနေခဲ့ဝါး။
ဟဲင်န်းပီးအောင်ဖရားချဲင်န်ဟာ “ဟဲယ်ကဖာဟာဝဲင်န်းဆေ” လော့ပြောပေးဝဲဝါး။ ဟဲင်န်းပီး ဟဲယ်ကဖာထဲမှာ ဝဲင်န်းလာခဲ့ဟာဝါး။ ဖရားချဲင်န်ဟာဟဲင်န်းဝဲင်န်းဟာအော်မြင်န်ဟာမော့် ‘နေ’ လော့ခေါ်ဝဲဝါး။ ဝဲင်န်းဟာအမဲင်န်းနေမော်ခွဲ ထုတ်ပီးအောင်ဟဲင်န်းအမဲင်န်းအော် ‘ည’ လော့ခေါ်ဝဲ့ဝါး။ ဖရားချဲင်န်ဟာဝဲင်န်းဟာအစွန်းပြချင်န်းယဲ့ဦးဆုံးနေ့မှာအစွန်းပြ ခဲ့ဟာဝါး။
အစွန်းပြချင်န်းယဲ့နောက်နေ့မှာဖရားချဲင်န်က “ရေထဲပေါ်မှာမိုးမျက်နာကျစ်တစ်ခုရှိဆေ” လော့ပြောပေးခဲ့ဝါး။ ဟဲင်န်းနေ့မော်မျက်နှာကျစ်တစ်ခုရှိလာခဲ့ပီးအောင်ဖရားချဲင်န်ကဟဲင်န်းဟာအော် “ကောင်းကဲင်န်ကီး” လော့ခေါ်ခဲ့ဝါး။
ဆတိရမြောက်နေ့မှာဖရားချဲင်န်က “ရေအော်ဟဲင်န်းတစ်နေရာမှာစုမော်မြေကီးပေါ်ပေါက်ဆေ” လော့ပြောပေးခဲ့ ဝါး။ ဖရားချဲင်န်ကမြေကီးအော် “ကဖာမြေကီး” လော့ခေါ်အောမော်ရေများအော် “ပင်လယ်ကီး” လော့ခေါ်ဝေါ့ဝါး။ ဖရား ချဲင်န်ဟာဆူအစွန်းပြတဲ့ဟဲင်န်းဟာနေအော်ကောင်းဝါးခါမြင်န်အားမော်ကြိုက်ဟာဝါး။
ဟဲင်န်းပီးအောင်ဖရားချဲင်န်က “ကဖာမြေကီးအော် ဆစ်ပဲင်န်နဲ့ပန်းပဲင်န်ပေါင်းစုံနေ့ပေါက်ရောက်ဆေ” လော့ ပြောပေးခဲ့ဝေါ့ဝါး။ ဟဲင်န်းပီးအောင် ဆစ်ပဲင်န်၊ပန်းပဲင်န်နေအော်ပေါ်လာခဲ့ဟာဝါး။ ဖရားချဲင်န်ဟာဆူအစွန်းပြတဲ့ဟဲင်န်း ဟာနေအော်ကောင်းမွန်ဟာကော်မြင်န်တွေ့တော်မူဟာဝါး။
အစွန်းပြချဲင်န်းလေးရက်မြောက်နေ့မှာဖရားချဲင်န်ဟာ “ကောင်းခဲင်န်ကီးမှာဝဲင်န်းဆေလော့” ပြောပေးဝေါ့ခါ ဟဲင်န်းနေ့မှာ နေ၊လနဲ့ကြယ်နေအော်ပေါ်ပေါက်စေခဲ့ဝါး။ ဖရားချဲင်န်ကဟဲင်န်းဟာနေအော်ကဖာမြေကီးနေအတွက်ဝါး ဝဲင်န်းအောင်နေ့၊ ည၊ ရာသီဥတုများန ခုနှစ်များအော်မှတ်မော်အစွန်းပြခဲ့ဝါး။ ဖရားချဲင်န်က ဆူအစွန်းပြခဲ့အားတဲ့ဟဲင်န်း ဟာနေအော်ကောင်းမွန်ဟာကော်ရှု့စားတော်မူလေဝါး။
ငါးရက်မြောက်နေ့မှာဖရားချဲင်န်ဟာ “ရေထဲကဆက်ရှိအကောင်များနပြည့်စေမော်ကောင်းကင်ကီးပေါ်မှာငှက် နေနပြင်န်စေ” လော့ပြောပေးဝဲ့ဝါး။ ဟဲယ်နီးနဖရားချဲင်န်ဟာရေပေါ်မှာကူးမော်ရေအကောင်နေနငှက်နေအော် ပြင်န် အောင်အစွန်းပြခဲ့ဝဲ့ဝါး။ ဖရားချဲင်န်ဟာဟဲင်န်းအရာနေကော်ကောင်းလွန်းဟာကော်ရှု့စားတော်မူပီး ဟဲင်န်းဟာနေကော် ချီးမွန်းပေးခဲ့ဝဲ့ဝါး။
အစွန်းပြချင်န်းခြောက်ရက်မြောက်နေ့မှာဝါးဖရားချဲင်န်ဟာ “မြေကီးပေါ်မှာနေအကောင်အများကီးပေါ်လာ ဆေ” လော့ပြောပေးခဲ့ဝေါ့ဝါး။ ဟဲင်န်းပီးအောင်ဖရားချဲင်န်ပြောဟာသလဲဖြစ်ဆွားပီးတချို့တလေအမွေးလို့ကောင်းတဲ့ အကောင်များဖြစ်အားမော်တချို့တလေအမြေကီးပေါ်မှာဆွားနေတဲ့အကောင်နေဖြစ်ကာ တချို့တလေမာတောရိုင်း တရိတ်ဆန်နေဖြစ်ကြဝါး။ ဟဲင်န်းပီး ဖရားချဲင်န်ဟာ ဟဲယ်အရာတော့ကောင်းမွန်တော်မူဟာကော်တွေ့မြင်န်တော်မူ ဟာဝါး။
ဟဲင်န်းပီးအောင်ဖရာချဲင်န်က “ငါတို့သလဲပုံစံတူလူဆားကော်အစွမ်းနပြုလုပ်စေ၊ဟဲင်န်းဆူတော့ကော်ကဖာကီးန အကောင်အများကီးပေါ်အုပ်ချုပ်မော်နေစေ” လော့ပြောပေးဝေါ့ဝါး။
ဟဲင်န်းပီးခါဖရားချဲင်န်ဝါးမြေကီးတချို့တလေကော်ယူအားမော်လူယောကျာ်းပုံလုပ်အားပီးဇီဝအဆက်ကော် ဆွင်န်းဟားပီးခါဟဲင်န်းလူဆားနံမယ်ကော် ‘အာဒမ်’ ဖြစ်ဟာဝါး။ ဖရားချဲင်န်ဟာကီးမားလွန်းတဲ့ခြံင်န်ဆခုကော် ‘အာဒမ်’ နေဖော့အစွန်းပြတော်မူခဲ့ဝါး။ ‘အာဒမ်’ ကော်ဟဲင်န်းခြံင်န်နားကြည့်ရှုစောင့်ရှောက်ဖော့စေခိုင်းထားခဲ့ဟာဝါး။
ဟဲင်န်းခြံင်ယဲ့အလယ်အားမှာဖရားချဲင်န်ဟာအဆက်နဆစ်ပဲင်န်ကော်ကောင်ဝါးပကောင်းဝါးဆိအောင်လော့ အဆိဉာဉ်ဆစ်ပဲင်န်သလဲဆန်းဟားတဲ့ဆစ်ပဲင်န်နေပဲင်န်ကော်ထားခဲ့ဝါး။ ဖရားချဲင်န်ဟာ ‘အာဒမ်’ ကော်ကောင်းဝါးပ ကောင်းဝါးဆိ့အောင်အဆိဉာဉ်ဆစ်ပဲင်န်မှလွဲမော်ဖာသလဲအပင်န်မျိုးကော်ပဆိုစေစားဝေါ့ဝါး။ ဟဲယ်စလဲနတားဟားတဲ့ အပင်န်နအဆီးကော်စားလော်ရှိရင်ဆူဆေမှာလော့ပြောခဲ့ဝေါ့ဝါး။
ဟဲင်န်းပီးအောင်ဖရားချဲင်န်ဟာ “လူဆားတဦးအဲကျင်န်းနေဟာပကောင်းဝူးသလဲ” လော့ပြောဝဲ့ဝါး။ ဟဲယ်သလဲ အကောင်နေမှလဲ ‘အာဒမ်’ ယဲ့လုပ်ဖော်ကိုင်ဖက်ပဖြစ်နိုင်ဝူး။
ဟဲင်န်းပီးဖရားချဲင်န်ဟာ ‘အာဒမ်’ ကော်အားရပါးရစေအိပ်မော် ‘အာဒမ်’ ရဲ့နံရိုးတချောင်းကော်ယူအားပီးမိန်းမ သလဲအစွန်းပြအမော် ‘အာဒမ်’ နားခေါ်ဝေါ့ဝါး။
‘အာဒမ်’ ဟာဟဲင်န်းမိန်းမကောမြင်န်ဟားခါ “ပီးခါနီးခါဟဲယ်တစ်ယောက်ဟာငါန့တူပီး ဆူမဟာယောက်ကျား ထံမှဆင်န်းသက်လာခါဆူမကော် မိန်းမလော့ခေါ်ဝါး” လော့ပြောလိုက်ဝါး။ ဟဲင်န်းပီး ယောက် ကျားနေဟာဆူတော့ယဲ့ မွေ့ဖနေကော်ထားကမော်မိန်းမနပေါင်းဖက်ကြချင်န်းဖြစ်ဟာဝါး။
ဖရားချဲင်န်ဟာယောကျာ်းနမိန်းမကော်ဆူသလဲပုံစံမျိုးအစွန်းပြခဲ့ဟာဝါး။ ဖရားချဲင်န်ဟာဆူတော့နေကော်ချီးမွမ်း မော် “ဆားဆမီးနေ၊ မြေးနေများများရီးမွေးပီး ဟဲယ်ကဖာမြေကီးပေါ်ပြည့်အောင်ကူစေ” လော့ပြောဆိုခဲ့ဟာဝါး။ ဟဲင်န်း ပီးအောင်ဖရားချဲင်န်ကဟဲင်န်းသလဲလုပ်အားတဲ့အရာနေကော်ကောင်းအောင်လုပ်လော်မြင်န်အားမော်အများရီးအားရ ဝမ်းန်ဆွာအားဝါး။ ဟဲယ်ဟာနေအများရီးအစွန်းပြဟားတဲ့ခြောက်ရက်နေ့မှာဖြစ်ပေါ်ခဲ့ဟာဝါး။
ခွန်နရက်မြောက်နေ့ရောက်အားခါဖရားချဲင်န်ဟာကိုယ့်ဟာကိုယ်အစွန်းပြမော်အလုပ်အားလုံးကော်ပီးခဲ့ဝါး။ ဆူ ကဟဲင်န်းခွန်နရက်မြောက်နေ့ကော်သန့်ရှင်န်းမြင့်မြတ်တဲ့နေ့အဖြစ်ကောင်းချီးမင်္ဂလာပြုလုပ်ပေးခဲ့ဝါး။ ဖယ်သလဲဆိုခါ ဟဲင်န်းနေ့မှာအစွန်းအများကီးကော်ရပ်ဝေါ့တဲ့နေ့ဖြစ်ဆွားခဲ့ဝါး။ ဟဲင်န်းသလဲကြောင့်ဝါး ဖရားချဲင်န်ဟာလောကကီးန ဟဲင်န်းဟာနေအများကီးကော်အစွန်းပြသလဲဖြစ်ဟာဝါး။
A Bible story from: Genesis 1-2