၁၆ - ကယ်တင်ရှင်နေ

‘ယောရှု’ ဆေပီးခါမာ ‘ဣသရေလ’ လူမျိုးနေဟာဖရားချဲင်န်ကော်ပနာခံကြဝူးလဲ။ ဆူတော့ဟာဖရားချဲင်န်ယဲ့ပ ညတ်တော်နေကော်ပလိုက်နာဝဲတဲ့အပြင်န်ကျင်နေတဲ့ ‘ခါနာန်’ လူမျိုးနေကော်လဲကတိပေးဟားတဲ့ဟဲင်န်းမြေနေရာ မော်နှင်န်ထုတ်သလဲပလုပ်ကြဝူးလဲ။ ‘ဣသရေလ’ လူမျိုးနေဟာဖရားချဲင်န်အစစ်ဖြစ်ဟားတဲ့အမြဲတမ်းဖရား ‘ယာဝေ’ အစား ‘ခါနာန်’ လူမျိုးတော့ယဲ့နတ်ဖရားနေကော်စမော်ကိုးကွယ်လာကြဝါး။ ‘ဣသရေလ’ လူမျိုးမာအုပ်ချုပ်ဆူဖရင် ပရှိဝူးလဲ။ ဟဲင်န်းပီးလူတိုင်းဟာဆူတော့ဖော့ဆူတော့မှန်ဟာလော့ယူဆတဲ့အရာနေကော်လုပ်ဆောင်ခဲ့ကြဟာဝါး။

ဖရားချဲင်န်ကော်ပလိုက်နာဝဲခါ ‘ဣသရေလ’ လူမျိုးနေဟာအကြိမ်ပေါင်းများစွာတစ်ခါပီးတစ်ခါလောမော်ဖြစ် ဟားတဲ့အပစ်ဆံဆရာပုံစံတစ်မျိုးကော်အစပြုလာကြဟာဝါး။ ဟဲင်န်းပုံစံမာဟဲယ်သလဲဖြစ်ဟာဝါး။ ‘ဣသရေလ’ လူမျိုး နေဟာဖရားချဲင်န်ကော်နှစ်ပေါင်းအများရီးပလိုက်နာပဲနေမာ။ ဟဲင်န်းပီးဖရားချဲင်န်ဟာ ‘ဣသရေလ’ လူမျိုးနေယဲ့ရင်ဆူ နေကော်အနိုင်ပေးချင်န်းနဟဲင်န်းတော့ကော်အပစ်ပေးမာလဲ။ ဟဲင်န်းရင်ဆူနေဟာ ‘ဣသရေလ’ လူမျိုးနေနားပစ်စီးနေ ခိုးယူချင်န်း၊ ပိုင်ဆိုင်မှုနေဖျက်စီးချင်န်းနလူနေအများရီးကော်ဆပ်ပစ်ချင်န်းနစော်ကားမှုနေလုပ်ကြမာလဲ။ ဟဲင်န်းပီး ‘ဣသရေလ’ လူမျိုးနေယဲ့ရင်ဆူနေဟာဆူတော့ကော်နှစ်နေအများရီးနှိပ်စက်ပီးနောက်မာဆူတော့ယဲ့အပစ်နေဖော့ နောင်တရပီးဖရားချဲင်န်နားဆူတော့ကော်ကယ်ပေးဖော့လျှောက်ထားမော်တောင်းပန်ကြမာလဲ။

‘ဣသရေလ’ လူမျိုးနေနောင်တရဟားအခါတိုင်းမာလဲဖရားချဲင်န်ကဆူတော့ကော်ကယ်ဟာဝါး။ ဖရားချဲင်န် ဟာရင်ဆူနေကော်တိုက်ပီးခေမှုန်းနိုင်ဆူကယ်တင်ဆူတစ်ယောက်ကော်ထောက်ပံ့ပေးသလဲဟဲယ်လုပ်ဆောင်ချက် ကော်လုပ်ခဲ့ဟာဖြစ်ဝါး။ ဟဲင်န်းပီးမြေနေရာဟာငြိမ်းချမ်းဆာယာမှုရှိလာပီးကယ်တင်ချင်တယောက်ကဆူတော့အပေါ် မာကောင်းကောင်းမွန်မွန်အုပ်ချုပ်ပေးလာမာဖြစ်ဟာဝါး။ ဖရားချဲင်န်ဟာ ‘ဣသရေလ’ လူမျိုးနေယဲ့ရင်ဆူလူမျိုးစုဖြစ် ဟားတဲ့အနီးအနားတဝိုက်ရှိ ‘မိဒျန်’ လူမျိုးနေအား ‘ဣသရေလ’ လူမျိုးနေကော်နှိမ်နှင်န်းခွင်န့်ပေးတော်မူဝဲ့ဝါး။

‘မိဒျန်’ လူမျိုးနေဟာ ‘ဣသရေလ’ လူမျိုးနေယဲ့အဆီးအနှံအများရီးကော်ဆိမ်းယူခဲ့ဟာမာ ခွန်နေနှစ်တိုင်ရှိ ဟားဝဲ့ဖြစ်ဝါး။ ‘ဣသရေလ’ လူမျိုးနေဟာ ‘မိဒျန်’ လူမျိုးနေကော်အားကီးကြောက်ဟားသလဲဆူတော့ကော် ‘မိဒျန်’ လူ မျိုးနေပတွေ့အောင်ဂူနေမာခိုးအောင်းနေခဲ့ဟားဝါး။ နောက်ဆုံးခါဖရားချဲင်န်ကဆူတော့ကော်ကယ်ပေးဖော့အော်ဟစ် မော်ငိုနေကြဟာဝါး။

‘ဂိဒေါင်’ လော့ခေါ်တဲ့ ‘ဣသရေလ’ ယောက်ကျားတစ်ယောက်ရှိခဲ့လဲ။ တနေ့မာ ဆူဟာဆူ့ယဲ့ကောက်ပဲဆီးနှံ နေကို ‘မိဒျန်’ လူမျိုးနေခိုးယူလို့ပရအောင်နေရာတစ်ခုမာခိုးအောင်းခဲ့ဟာလဲ။ ‘ယာဝေ’ ယဲ့တမန်တော်တစ်ယောက် ဟာ ‘ဂိဒေါင်’ ထံနားလာမော် “ခွန်အားကီးတဲ့စစ်ဆီတော်ဖရားချဲင်န်ဟာနင်န့်နအတူတူရှိနေဟာဝါး။ ‘ဣသရေလ’ ကော် ‘မိဒျန်’ လူမျိုးနေနားဆွားမော်ကယ်ဝဲ့လဲ” လော့မိန့်တော်မူဝဲ့ဝါး။

‘ဂိဒေါင်’ ယဲ့အဖဟာရုပ်ထုတခုကော်ပူဇော်ဆက်ကပ်ဟားတဲ့ပလင်န်တခုရှိဟာဝါး။ ဖရားချဲင်န်ဟာ ‘ဂိဒေါင်’ ကော်အရင်န်ဆုံးပြောဟားတဲ့အရာမာဟဲင်န်းပူဇော်တဲ့နေရာကော်ဖျက်စီးဖြိုချဖော့ဖြစ်ဝါး။ ဟဲင်န်းပေမဲ့ ‘ဂိဒေါင်’ မာလူ နေကော်ကြောက်ဟားခါညင့်နက်အထိစောင့်နေခဲ့ဟာဝါး။ ဟဲင်န်းပီးဆူဟာဟဲင်န်းနေရာကော်ဖြိုခပီးတစစီဖြစ်အောင် ထုခေလိုက်ဟာဝါး။ ဆူဟာဖရားချဲင်န်ဖော့ပူဇော်မလော့နေရာတခုကော်အနီးအနားမာစေဆောက်ပီးဖရားချဲင်န်ကော် ပူဇော်ဟာဝါး။

နောက်နေ့မနက်ခါမာလူနေကဆူတော့ပူဇော်ဖော့နေရာကော်ဖျက်စီးထားဟာကော်တွေ့ဟားခါအများရီးဒေါ ဆထွက်ကြဝါး။ ဆူတော့ဟာ ‘ဂိဒေါင်’ ကော်ဆပ်ဖော့ဆူအိမ်နားဆွားခါ ‘ဂိဒေါင်’ ယဲ့အဖက “နင်န်တော့ယဲ့ဖရားကော် ဖာသလဲကြောင့်နင်န့်တော့ကူဖော့ကြိုးစားနေကြသလဲ။ ဆူဟာဖရားလော့ပြောရင်ဆူ့ကိုယ်ဆူကာကွယ်ခိုင်းလဲ” လော့ပြောလိုက်ဟာဝါး။ ဆူဟဲယ်သလဲပြောခဲ့လော့လူနေက ‘ဂိဒေါင်’ ကော်ပဆပ်ကြဝူးလဲ။

ဟဲင်န်းပီး ‘ဣသရေလ’ လူမျိုးနေနားလောမော်ခိုးဖော့လာခဲ့ကြတဲ့ ‘မိဒျန်’ လူမျိုးနေဟာအများရီးဖြစ်ဟားလော့ ရေလော့ပရဝူးလဲ။ ‘ဂိဒေါင်’ ဟာဆူတော့ကော် ‘ဣသရေလ’ လူမျိုးနေနအတူတူပေါင်းတိုက်ဖော့စုပီးခေါ်ဝဲ့ဝါး။ ‘ဂိဒေါင်’ ကဖရားချဲင်န်ဟာဆူ့အော် ‘ဣသရေလ’ ကော်ကယ်ဖော့အမှန်ပြောနေဟာဟုတ်ပဟုတ်ဆေချာအောင်နိမိတ်နေခုကော် တောင်းဆိုဟာဝါး။

အရင်န်ဆုံးနိမိတ်အနေန ‘ဂိဒေါင်’ ဟာမြေကီးပေါ်မာသိုးအရေခွံကော်ခင်န်းစေပီးခါမနက်ခင်းမြူအများရီးမြေ ကီးပေါ်မာပကျစေပဲသိုးအရေခွံပေါ်မာကျစေဖော့ဖရားချဲင်န်ကော်လျှောက်ထားခါဖရားချဲင်န်ကဟဲင်န်းသလဲလုပ်လိုက်ဟာဝါး။ နောက်နေ့ညမာဆူဟာမြေကီးနားစိုစေပီးသိုးမွှေးနားပစိုအောင်စေလုပ်ခိုင်းခါ ဖရားချဲင်န်ဟာဟဲင်န်းသလဲလုပ် လိုက်ဟာဝါး။ ဟဲယ်နိမိတ်နေခုသလဲဖရားချဲင်န်ဟာ ‘ဣသရေလ’ ကော် ‘မိဒျန်’ လူမျိုးနေနားအမှန်ကယ်စေလိုကြောင်း ကော် ‘ဂိဒေါင်’ ယုံဆွားကြလေဝါး။

ဟဲင်န်းပီး ‘ဂိဒေါင်’ ဟာဆူတော့နားစစ်ဆားနေအော်လာဖော့ခေါ်ဝဲ့ခါလူအယောက်ပေါင်းဆုံးသောင်းနေ ထောင်ရောက်လာကြဟာဝါး။ ဟဲင်န်းပီးခါဖရားချဲင်န်ကဆူကော်လူများလွန်းဟားတယ်လော့ပြောကြားခါ ‘ဂိဒေါင်’ ဟာတိုက်ဖော့ကြောက်ဟားတဲ့လူအယောက်နေသောင်းနေထောင်ကော်အိမ်နားပြင်န်မော်စေလွှတ်ဝဲ့ဟာဝါး။ ဖရား ချဲင်န်ဟာ ‘ဂိဒေါင်’ ကော်လူများနေဆေးဟာလော့ပြင်န်ပြောခါ ‘ဂိဒေါင်’ ဟာစစ်ဆားအယောက်ဆုံးရာမှလွဲပီးကျင် လူနေကော်အိမ်နားပြင်န်လွှတ်လိုက်ဟာဝါး။

ဟဲင်န်းညမာဖရားချဲင်န်က ‘ဂိဒေါင်’ ကော် “မိဒျန် စခန်းနေနားဆွားမော်ဆူတော့ပြောနေဟာကော်နားထောင် လဲ။ ဆူတော့ပြောနေဟာကော်နင်န့်တော့ကြားရပီးရင်ဆူတော့ကော်တိုက်ဖော့အတွက်ကြောက်ဝူးလဲ” လော့ပြော လိုက်ဟာဝါး။ ဟဲင်န်းညမာ ‘ဂိဒေါင်’ ဟာ ‘မိဒျန်’ စစ်တပ်နားဆွားပီးခါ ‘မိဒျန်’ စစ်ဆားတယောက်ကဆူအိမ်မက်မက် ဟာအကြောင်းအရာတခုကော်အဖော်ဖြစ်ဆူနားပြောနေဟာကော်ကြားခဲ့ရဝါး။ ဟဲင်န်းလူဟာအဖော်ဖြစ်ဆူနား “ငါ့ယဲ့ အိပ်မက်ကငါတော့ မိဒျန် စစ်တပ်ကော် ဂိဒေါင် စစ်တပ်ကအနိုင်ဆိမ်းပိုက်မာလော့အဆိတ်ပယ်ရလဲယ်” လော့ပြော နေဟာဝါး။ ‘ဂိဒေါင်’ ဟာဟဲယ်သလဲကြားဟားခါဖရားချဲင်န်ကော်ရှစ်ခိုးဝဲ့ဝါး။

ဟဲင်န်းပီး ‘ဂိဒေါင်’ ဟာဆူတော့ယဲ့စစ်ဆားနေနားပြင်န်ဟားမော်တယောက်ချင်းကော်သိုးဦးချိုနလုပ်ဟားတဲ့ တံပိုတခု၊ မြေအိုးတအိုးနမီးတုတ်တချောင်းကော်ပေးဝဲ့ဝါး။ ‘ဂိဒေါင်’ ယဲ့စစ်ဆားဆုံးရာဟာ ‘မိဒျန်’ စစ်ဆားနေအိပ်နေ တဲ့တပ်ဖွဲ့ကော်ဝိုင်းဟားခါမာဆူတော့ယဲ့မီးတုတ်ကော်မြေအိုးထဲမာထေ့ခါ ‘မိဒျန်’ လူမျိုးနေကဆူတော့ယဲ့ မီးတုတ်နေ ကော်ပမြင်န်ရဝူးလဲ။

ဟဲင်န်းပီး ‘ဂိဒေါင်’ ယဲ့စစ်ဆားနေဟာဆူတော့ယဲ့မြေအိုးနေအော်တခါအဲခွဲပီးမီးတုတ်နေကော်တခါအဲထုတ်ပြ ဝဲ့ဝါး။ ဟဲင်န်းပီးဆူတော့ယဲ့ဦးချိုနေကော်မှုတ်ပီး “ယာဝေနေ ဂိဒေါင် ဖော့ဓားတချောင်း” လော့အော်ကြဟာဝါး။

ဖရားချဲင်န်ဟာ ‘မိဒျန်’ လူမျိုးနေယဲ့စိတ်ရှုပ်ဆွားစေပီးအချင်န်းချင်န်းတိုက်မော်ဆပ်စေဝါး။ ချက်ချင်န်းသလဲ ‘ဂိဒေါင်’ ဟာဆူတော့ယဲ့အိမ်မာနေဟားကြတဲ့ ‘ဣသရေလ’ လူမျိုးနေကော် ‘မိဒျန်’ လူမျိုးနေနားကူပီးနှင်န်ထုတ်ဖော့ နတ်ဒေဝါနေကော်ဆွားရောက်ခေါ်စေဝါး။ ‘ဣသရေလ’ လူမျိုးနေဟာ ‘မိဒျန်’ လူမျိုးနေကော်ဆပ်ပစ်ပီးတချို့နေအော် ဆူတော့ယဲ့မြေနေရာနေမော်နှင်န်ထုတ်ဝဲ့ဝါး။ ဟဲင်န်းနေ့မာ ‘မိဒျန်’ လူမျိုးတသိန်းနေသောင်းဆေဟားခဲ့ဟာဝါး။ ဟဲယ် နီးနဖရားချဲင်န်ဟာ ‘ဣသရေလ’ ကော်ကယ်ခဲ့ဟာဝါး။

လူနေဟာ ‘ဂိဒေါင်’ ကော်ဆူတော့ယဲ့ဖရင်အဖြစ်သတ်မှတ်လိုကြလဲဝ ‘ဂိဒေါင်’ ကဟဲယ်သလဲလုပ်ခွင်န့်ပပြုပဲ ‘မိဒျန်’ လူမျိုးနေနားယူးဟားတဲ့ရွှေလက်စွပ်နေးနေးကော်တောင်းဟာဝါး။ လူထုမာ ‘ဂိဒေါင်’ ကော်ရွှေနေအများရီးပေး ဝဲ့ဝါး။

ဟဲင်န်းပီး ‘ဂိဒေါင်’ ဟာဟဲင်န်းရွှေနေကော်အဆုံးပြုဟားမော်ဆာဆနာရေးဆိုင်ရာမဟာနာယကယဲ့အဆင် တန်ဆာနေလုပ်ပေးဟာဝါး။ ဟဲင်န်းသလဲလူနေဟာဟဲယ်ဝတ်စုံကော်ရုပ်ထုသလဲစဟားမော်ကိုးကွယ်လာကြဟာဝါး။ ဟဲင်န်းခါမာဖရားချဲင်န်ဟာ ‘ဣသရေလ’ ကော်ရုပ်ထုနေကိုးကွယ်လာခါလောဟားမော်အပစ်ပေးဝါး။ ဖရားချဲင်န်ဟာ ဆူတော့ယဲ့ရင်ဆူနေနားဆူတော့ကော်လော့မော်တိုက်ဖော့ခွင်န့်ပေးလိုက်ဟာဝါး။ ဆူတော့ဟာဖရားချဲင်န်ကော်လော မော်ကယ်ဖော့တောင်းပန်ခါကယ်တင်ရှင်တယောက်ကော်လောမော်စေလွှတ်ခဲ့ဟာဝါး။

ဟဲယ်သလဲအဖြစ်အပျက်နေအများရီးဖြစ်ဝဲ့ဝါး။ ‘ဣသရေလ’ လူမျိုးနေကအပစ်အများရီးလုပ်ကြပီးဖရားချဲင်န် ကဆူတော့ကော်အပစ်ပေးမာလဲ။ ဆူတော့ကပြင်န်ဟားမော်နောင်တရကြမာလဲ။ ဟဲင်န်းပီးဖရားချဲင်န်ဟာဆူတော့နား ကယ်တင်ဆူတယောက်ကော်စေလွှတ်လိုက်မာလဲ။ ဟဲင်န်းပီးနှစ်ပေါင်းအများရီးအတွင်းမာ ‘ဣသရေလ’ လူမျိုးနေ ကော်ဆူ့တော့ယဲ့ရင်ဆူနေလက်နေမော်ကယ်တင်ချင်န်အများရီးကော်စေလွှတ်ခဲ့ဝဲ့ဝါး။

နောက်ဆုံးမာ ‘ဣသရေလ’ လူမျိုးနေဟာတခြားနိုင်ငံသလဲဖရားချဲင်န်နားဖရင်တပါးတောင်းခဲ့ဝဲ့ဟာဝါး။ ဆူ တော့ဟာအရစ်ရှည်မော်ဆန်မာကာဆူတော့ကော်တိုက်ပွဲမာဉီးဆောင်နိုင်ဖော့ဖရင်တပါးကော်အလိုရှိကြဟာလဲ။ ဖရား ချဲင်န်ဟာဟဲယ်တောင်းဆိုချက်ကော်ပကြိုက်လဲဝဆူတော့တောင်းဆိုဟားတဲ့ဖရင်ကော်ပေးအပ်ခဲ့ဝဲ့ဝါး။

A Bible story from: Judges 1-3; 6-8; 1 Samuel 1-10