၅။ ကတိပေးဟားနပတ်သက်တဲ့ဆား

‘အာဗြံ’ န ‘စာရဲ’ တော့ဟာ ‘ခါနန်’ ကော်ရောက်ပီးဆယ်နှစ်ကြာလဲဝဆူတို့မာဆားဆမီးနေပမွေးဆေး ပူးလဲယ်။ ဟဲင်န်းခါ ‘အာဗြံ’ ယဲ့မိန်းမလုပ်ဆူ ‘စာရဲ’ က “ဖရားချဲင်န်ဟာငါ့ကော်ဆားဆမီးနေပထွန်းကားစေပူး လဲယ်။ ငါကလဲဝလူခဲနယ်မွေးဖော့အများရီးအိုနေပီးဖြစ်ဟာလဲ့။ ဟဲယ်လူကငါ့ယဲ့အစေခံ ‘ဟာဂရု’ ဖြစ်ဟာဝါး။ ငါ့အတွက်လူခနယ်မွေးပေးဖော့ဆူ့ကော်ယူဝဲ့” လော့ ‘အာဗြံ’ ကော်ပြောဝဲ့ဝါး။

ဟဲင်န်းသလဲမျိုးကြောင့် ‘အာဗြံ’ ဟာ ‘ဟာဂရ’ ကော်ယူဝဲ့လဲယ်။ ‘ဟာဂရ’ ဟာဆားတယောက်မွေးခါ ‘အာဗြံ’ ကဆူကော် ‘ဣရှမေလ’ လော့နံမယ်ပေးဝဲ့ဝါး။ ဟဲင်န်းပီးခါ ‘စာရဲ’ ဟာ ‘ဟာဂရ’ ကော်ပနာလိုတမ်းန ဖြစ်လာဝါး။ ‘ဣရှမေလ’ ဆယ့်ဆုံးနှစ်နားရောက်ခါဖရားချဲင်န်းက ‘အာဗြံ’ ကော်လောမော်မိန့်တော်မူဝဲ့တယ် လာ့။

ဖရားချဲင်န်က “ငါ့ဟာအနန္တတန်ခိုးရှင်ဖရားချဲင်န်ဖြစ်ဟားမော်နင်န့်နငါပဋိဉာင်တစ်ခုလုပ်မှာလဲ” လော့ ပြောဝဲ့ဝါး။ ဟဲင်န်းခါမှာ ‘အာဗြံ’ ဟာမြေကီးပေါ်ဦးချနေတယ်လာ့။ ဖရားချဲင်န်းက “နင်န်ဟာနိုင်ငံအများကီးယဲ့ အဖဖြစ်လာမာလဲယ်။ ငါဟာနင်န်နနင်န့်ယဲ့မျိုးရိုးစဉ်ဆက်ကော်ဟဲယ် ‘ခါနန်’ မြေကော်အပီးပေးအားမော်ငါဟာ ဆူတော့ယဲ့တဆက်လုံးဖရားချဲင်န်ဖြစ်လာမာလဲယ်။ နင်န့်တော့မိဆားစုမာရှိဟားတဲ့ ယောကျာ်းနေတိုင်းကော် အရေဖျားဖြတ်မင်္ဂလာပြုလုပ်ပါ” လော့ ‘အာဗြံ’ ကော်ပြောတော်မူဝဲ့တယ်လာ့။

“နင်န့်ယဲ့မိန်းမဖြစ်အားတဲ့ ‘စာရဲ’ ဟာဆားတယောက်မွေးပီးဆူကကတိပေးဟာနပတ်သတ်သော ဆားဖြစ်မာလဲယ်။ ဟဲင်န်းလူကော် ‘ဣဇာက်’ လော့နံမယ်ပေးဝဲ့။ ငါ့နပဋိဉာင်ဆုံးမော်ဆူဟာအားကီးတဲ့လူမျိုး တခုဖြစ်လာမာလဲယ်။ ငါဟာ ‘ဣရှမေလ’ ကော်လဲကီးမားတဲ့လူမျိုးကီးတစ်စုလုပ်ပေးမာလဲယ်။ ဟဲင်န်းသလဲ ကြောင့်ငါ့ဟာ ‘ဣဇာက်’ နကော်ကတိပေးစကားပြောခဲ့ဟာဝါး”။ ဟဲင်န်းပီးခါဖရားချဲင်န်ဟာ ‘အာဗြံ’ နံမယ် ကော် ‘အာဗြံဟံ’ လော့ပြောင်းပေးဝဲ့ဝါး။ ဟဲယ်အဆိတ်ပါယ်ကလူနေအများရီးယဲ့အဖဖြစ်ဟာဝါး။ ဟဲင်န်းပီးခါ ဖရားချဲင်န်က ‘စာရဲ’ နံမယ်ကော် ‘မဲင်န်းဆမီး’ သလဲအဆိတ်ပါယ်ရတဲ့ ‘စာရာ’ လော့ပြောင်းပေးဝဲ့ဝါး။

ဟဲင်န်းနေ့မှာ ‘အာဗြဟံ’ ဟာဆူရဲ့အိမ်ထောင်စုရှိတဲ့ယောကျာ်းနေအကုန်လုံးကော်အရေဖျားဖြတ်မင်္ဂ လာပြုပေးဝဲ့တယ်လဲယ်။ တစ်နှစ်ကြာခါ ‘အာဗြံဟံ’ ကအဆက်တစ်ရာန ‘စာရာ’ ယဲ့အဆက်ကိုးဆယ်မာ ‘စာရာ’ ဟာဆားတယောက်ရခဲ့ဟာဝါး။ ဟဲင်န်းဆားကော်ဖရားချဲင်န်ပြောကဟာသလဲ ‘ဣဇာက်’ လော့နံမယ် ပေးဝဲ့ဝါး။

‘ဣဇာက်’ ဟာလူငယ်သလဲအရွယ်ရောက်လာခါဖရားချဲင်န်က ‘အာဗြဟံ’ ယဲ့ယုံကြည်မှုကော်စမ်းဆပ် သလဲအနေန “နင်န့်ယဲ့တဦးဆီးသောဆားဖြစ်တဲ့ ‘ဣဇာက်’ ကော်ခေါ်အားမော် ငါ့ဖော့ကပ်ဝဲ့” လော့ပြောဝဲ့ဝါး။ ‘အာဗြဟံ’ ဟာဖရားချဲင်န်ပြောတဲ့အတိုင်းလောနားထောင်ဟားမော်ဆူ့ယဲ့ဆားကော်ကပ်ဖော့ပြင်န်နေဝါး။

‘အာဗြံဟံ’ န ‘ဣဇာက်’ တော့ဟာကပ်မဲ့နေရာနားလမ်းလျှောက်ဆွားခါ ‘ဣဇာက်’ က “အဖ၊ ငါတော့ ကပ်ဖော့အတွက်ထဲင်န်းနေရှိနေပေါ့။ ဟဲင်န်းပီးသိုးကဖယ်မှာလဲ” လော့မေးခါ ‘အာဗြဟံ’ က “ကပ်ဖော့သိုး ကော်ဖရားချဲင်န်ကပြင်န်ဆင်န်ပေးမာလဲ ငါ့ဆား” လော့ပြင်န်အားမော်ပြောဝဲ့ဝါး။

ကပ်ဖော့ဟဲင်န်းနေရာနားရောက်ခါမာ ‘အာဗြဟံ’ ဟာဆူ့ယဲ့ဆား ‘ဣဇာက်’ ကော်ကြိုးနတုတ်အား မော်ကပ်ဖော့လုပ်တဲ့နေရာပေါ်နားကော်လှိုင်းချဝဲ့ဝါး။ ဆူ့ဆားကော်ဆပ်ဖော့လုပ်နေခါမာဖရားချဲင်န်ဟာ “ရပ်ဝဲ့၊ လူခနယ်ကော်နာအောင်ပလုပ်န၊ ငါ့ပေးဟားတဲ့နင်န့်ယဲ့တဦးဆီးသောဆားကော်ပစ်နိုင်အောင် ငါ့ကော်ကြောက် အားမော်ရိုဆေသလဲကော်ခုငါဆိ့ဟားပေါ့” လော့ပြောဝဲ့ဝါး။

ဟဲယ်နားတဝိုက်မှာရှိမြက်ရှုပ်နမိနေတဲ့သိုးထီးတကောင်ကော် ‘အာဗြဟံ’ တွေ့ဟားဝါး။ ဖရားချဲင်န်က ‘ဣဇာက်’ အစားကပ်နိုင်ဖော့လုပ်ကူပေးသလဲဖြစ်လော့ ‘အာဗြဟံ’ ဟာသိုးထီးကော်ဝမ်န်းဆာအားရကပ်ဝဲ့ဝါး။

ဟဲင်န်းပီးခါဖရားချဲင်န်ဟာ ‘အာဗြဟံ’ ကော် “နင်န်နနင်န့်ယဲ့တဦးဆီးသောဆားအပါ အရာအကုန်လုံး ကော်ငါ့ကော်ပေးဖော့ဝန်ပလေးပူး။ ဟဲင်န်းပီးငါဟာနင်န့်ကော်ကောင်းချီးပေးမာလော့ကတိပေးထားသလဲနင်န့် ယဲ့နောင်လာနောင်ဆားမျိုးဆက်များဟာမိုးပေါ်မာကြယ်နေထက်အများကီးပွားလာမာလဲယ်။ နင်န့်ဟာငါ့ယဲ့ ပြောစကားကော်နားထောင်ခဲ့ဟာကြောင့်ကဖာပေါ်မာရှိမိဆားစုအများရီးကော်နင်န့်ယဲ့မိဆားစုနေမော်တခါ ကောင်းချီးပေးမာ” လော့ပြောခဲ့ဝဲ့ဝါး။

A Bible story from: Genesis 16-22