၃၆ - အတွင်န်းအပြင်န်ပုံစံပြောင်းလဲတော်မူချင်န်း

တနေ့ခါမာကိုယ်တော် ‘ယေရှု’ ဟာဆူ့ယဲ့တပဲ့ဆုံးယောက်ဖြစ်ဆူ ‘ပေတရု၊ ယာကုပ် န ယောဟန်’ ကော်ခေါ် ဆွားဟာဝါး။ (ယောဟန် လော့ခေါ်ဟားတဲ့တပဲ့ဖြစ်ဆူမာကိုယ်တော် ‘ယေရှု’ ကော်ရေနစ်မင်္ဂလာလုပ်ပေးတဲ့လူပဟုတ် ဝူးလဲ။) ဆူတော့ဟာဖရားရှစ်ခိုးဖော့ဆူတော့ခေးခေးတောင်အမြင်န့်နားတက်ဆွားကြဟာဝါး။

ကိုယ်တော် ‘ယေရှု’ ဟာဖရားချဲင်န်ကော်ဆုတောင်းနေခါဆူယဲ့မျက်နှာမာနေသလဲဝင်န်းမော်အရောင်နေ တောက်လာဟာဝါး။ ဆူ့ယဲ့အဝတ်အစားနေဟာလဲဖြူဖွေးတောက်ပြောင်လာမော် ကဖာပေါ်မာရှိဟားတဲ့ဖယ်သလဲ လူဆားနေမှလုပ်ဆောင်နိုင်ချင်န်းပရှိဝူးလဲယ်။

ဟဲင်န်းပီးခါ ‘မောရှေ’ နရှေ့ဖြစ်ဟောပြင်ညာရှိ ‘ဧလိယ’ တော့ရောက်လာကြဟာဝါး။ ဟဲင်န်းလူနေဟာကဖာ ကီးပေါ်မာနှစ်ပေါင်းရာနချီမော်နေခဲ့ကြဆူနေဖြစ်ဟာဝါး။ ဆူတော့နကိုယ်တော် ‘ယေရှု’ ဟာ ‘ယေရုရှလင်’ မြို့မာ ကိုယ်တော်ပကြာမီဆေဆုံးတော့မယ့်အကြောင်းကော်ပြောဆိုနေကြဟာဝါး။

မောရှေ’ န ‘ဧလိယ’ တော့ဟာကိုယ်တော် ‘ယေရှု’ နစကားပြောနေခါမာ ‘ပေတရု’ ဟာကိုယ်တော် ‘ယေရှု’ ကော် “ဟဲယ်နေရာဟာနေချင်န်စရာကောင်းဟာလဲ။ ဟဲင်န်းနေရာမာအချဲင်န်ဖော့တဲနန်းတစ်ဆောင်၊ ‘မောရှေ’ ဖော့ တဲနန်းတစ်ဆောင်၊ ‘ဧလိယ’ ဖော့တဲနန်းတစ်ဆောင် စုစုပေါင်းဆုံးဆောင်ကော်ငါဆောက်လုပ်ပရစေ” လော့လျှောက် ထားလိုက်ဟာဝါး။ ဟဲင်န်းပီး ‘ပေတရု’ မာဆူ့ဟာဆူဖာပြောလိုက်မိမှန်းကော်ပဆိ့ဝူးလဲယ်။

‘ပေတရု’ စကားပြောနေခါမာ အရောင်တောက်နေတဲ့ တိမ်တခုမာဆင်န်းလာပီး ဆူတော့ကော်ဖုံးအုပ်လိုက် ဟာလဲ။ ဟဲင်န်းပီးခါ “ဟဲင်န်းလူမာ ငါအများရီးရှစ်တဲ့ငါယဲ့ဆားတော်ဖြစ်ပီးဆူ့ယဲ့စကားကော်နာခံကြလဲယ်။” လော့ ဟဲင်န်းတိမ်နားမာစကားပြောဆံတခုကော်ကြားလိုက်ရဟာဝါး။ တပဲ့တော်ဆုံးယောက်မာအများရီးကြောက်ဆွားပီး မြေကီးပေါ်နားလဲဆွားဟာဝါး။

ဟဲင်န်းပီးခါ ကိုယ်တော် ‘ယေရှု’ ဟာတပဲ့တော့ကော်ကိုင်ပီး “ထလဲယ်။ ပကြောက်ကြန” လော့ပြောကြားဟာ ဝါး။ ဆူတော့ဘေးနားကိ့လိုက်ခါမာကိုယ်တော် ‘ယေရှု’ တယောက်ထဲကျင်န်ရှိတော့လဲယ်။

ကိုယ်တော် ‘ယေရှု’ နတပဲ့ဆုံးယောက်တော့ဟာ တောင်ပေါ်ကနေလောပြင်န်မော်ဆင်န်းလာကြဟာဝါး။ ဟဲင်န်းပီးခါကိုယ်တော် ‘ယေရှု’ ကဆူတော့ကော် “ခုဟဲယ်နေရာမာဖြစ်ဟားတဲ့အကြောင်းအရာနေကော် ပဆူ့ကိုမှပ ပြောကြန၊ ငါဟာပကြာခင်ဆေဆွားမာဖြစ်ဟာလဲအဆက်လောပြင်န်မော်ရှင်န်လာမာလဲယ်။ ဟဲင်န်းခါမှလူနေကော် နင်န့်တော့ပြောပြလဲ။” လော့မိန့်တော်မူလိုက်ဟာဝါး။

A Bible story from: Matthew 17:1-9; Mark 9:2-8; Luke 9:28-36