၂၁ - ဖရားချဲင်န်က ‘မေရှိယ’ ကော်ကတိပေးတော်မူချင်န်း

ဖရားချဲင်န်ဟာ ကဖာကီးကော် အစွန့်ပြခါက ဆူဟာနောင်တရချိန်မာ ‘မေရှိယ’ ကော်စေလွှတ်ရမယ်လဲ့လော့ ကြိုဆိ့ထားဟာဝါး။ ဆူဟာ ‘အာဒံ’ န ‘ဧဝ’ ကော်ဟဲယ်သလဲလုပ်ရမာလဲကတိပေးခဲ့ဟာဝါး။ ဆူဟာ ‘ဧဝ’ ယဲ့နောက် ဖြစ်လာမယ့်မျိုးဆက်နေဟာမြွေခေါင်းကော်ထုခေမာလဲလောပြောခဲ့ဟာကြောင့် ‘စာတန်’ ဟာ ‘ဧဝ’ ကော်လှည့်စား ဖော့မြွေပုံစံနပေါ်ပေါက်လာခဲ့ဟာလဲဖရားချဲင်န်က ‘မေရှိယ’ ဟာ ‘စာတန်’ ကော်အပီးအပိုင်တိုက်လိမ့်မာကိုဆိုလိုဟာ ဖြစ်ဝါး။

ဖရားချဲင်န်က ကဖာပေါ်မာရှိလူမျိုးတိုင်းကော်ကောင်းချီးနေခံစားရမာလော့ ‘အာဗြဟံ’ ကော်ကတိပေးခဲ့ဟာ ဝါး။ ဖရားချဲင်န်ဟာ ‘မေရှိယ’ ကိုနောင်ချိန်မာစေလွှတ်ဖော့ဟဲယ်ကတိစကားကော်အကြာရီးရှိစေခဲ့ဟာဝါး။ ‘မေရှိယ’ ဟာဟဲယ်ကဖာမြေပေါ်မာ လူဆားအ များစုကော်ဆူတော့ယဲ့အပစ်နေမှကယ်တင်မာလဲယ်။

ဖရားချဲင်န်ဟာ ‘မောရှေ’ သလဲပရောဖက်ပြင်ညာရှိတယောက်ကော်နောင်ခါမာစေလွှတ်မာလော့ ‘မောရှေ’ ကော်ကတိပေးခဲ့ဟာဝါး။ ဟဲင်န်းသလဲကတိပေးဟားတဲ့ရှေ့ဖြစ်ဟောပြင်ညာရှိဟာ ‘မေရှိယ’ ဖြစ်ဟာဝါး။ ဟဲယ်နီးန ဖရားချင်န်ဟာ ‘မေရှိယ’ ကော်စေလွှတ်မာလဲယ်လောမော်ကတိပေးတော်မူဟာဝါး။

ဖရားချဲင်န်ဟာဖရင် ‘ဒါဝိဒ်’ ယဲ့နောက်မျိုးဆက်ထဲမှတယောက်ဟာ ‘မေရှိယ’ ဖြစ်လာမာလဲယ်။ ဆူဟာဖရား ချဲင်န်ယဲ့လူဆားနေအပေါ်မာဖရင်တပါးအဖြစ်အမြဲတမ်းအုပ်စိုးလိမ့်မာလဲလော့ကတိပေးတော်မူဟာဝါး။

ဖရားချဲင်န်ဟာ ရှေ့ဖြစ်ဟောပြင်ညာရှိ ‘ယေရဟိ’ ကော်တနေ့မာပဋိဉာင်အဆစ်တခုပြုလုပ်လိမ့်မာလော့ပြော ကြားဟာဝါး။ ဟဲင်န်းပဋိဉာင်အဆစ်ဟာ ‘သိနာ’ တောင်မာ ‘ဣသရေလ’ တော့နပြုလုပ်ခဲ့တဲ့ဆဘောတူညီမှုနမတူညီ ပူးလဲ။ ဆူဟာလူနေနပဋိဉာင်အဆစ်လုပ်ဟားခါမာဆူ့ကော်ကိုယ်ဟာကိုယ်ဆိ့ရှိစေပီးလူတိုင်းဟာဖရားကော်ရိုဆေဟား မော်ဆူယဲ့တရားတော်နေအားလိုက်နာစေမာလဲ။ ဟဲယ်နီးနဖရားချဲင်န်ယဲ့တရားတော်နေဟာဆူတော့ယဲ့အဆဲနှလုံးနား မာရေးမှတ်ထားသလဲဖြစ်နေမာလဲ။ ဆူတော့ဟာဖရားချဲင်န်ယဲ့လူနေဖြစ်လာပီးဖရားချဲင်န်ဟာဆူတော့ယဲ့အပစ်နေ ကော်ခွင်န့်လွှတ်ပေးမာလဲ။ ‘မေရှိယ’ အချဲင်န်ဟာဆူတော့ယဲ့ပဋိဉာင်အဆစ်ကော်လဲလုပ်မာလော့ပြောတော်မူခဲ့ဟာ ဝါး။

ဖရားချဲင်န်ယဲ့ပရောဟိတ်နေကလဲ ‘မေရှိယ’ ကပရောဟိတ်ဘာဆာရေးခေါင်းဆောင်အပြင်ဖရင်ပါဖြစ်လာမာ လဲလော့ပြောကြားခဲ့ဟာဝါး။ ပရောဟိတ်ဆိုဟာမာဖရင်ထံနားတရားတော်များကော်လူများထံတော့ပြင်န်မော်ပြောဆူ ဖြစ်ဟာဝါး။ ဖရားချဲင်န်စေလွှတ်မာလော့ပြောတဲ့ ‘မေရှိယ’ ဟာအပစ်ကင်န်းပီးပြည့်စုံတဲ့ပရောဟိတ်တစ်ပါးဖြစ်မာ လဲယ်။ ဟဲယ်သလဲပြောရခြင်းမာ ‘မေရှိယ’ ဟာဖရားချဲင်န်ယဲ့မိန့်ဆိုတဲ့စကားကော်အကောင်းဆုံးကြားနိုင်မော်အ ကောင်းဆုံးနားလည်ပီးလူနေကော်လဲဝဟဲင်န်းတရားနေကော်ကောင်းကောင်းမွန်မွန်ပြည့်ပြည့်စုံစုံပြင်န်မော်ပြောနိုင်ဆူဖြစ်ဟာမာဝါး။

‘ဣစရေး’ ဘာဆာရေးခေါင်းဆောင်နေဟာ လူဆားနေဖော့ဖရားချဲင်န်ကော်လောမော်ပူဇော်မှုနေလုပ်ကြဟာ ဝါး။ ဟဲယ်သလဲပူဇော်နေဟာ ဖရားချဲင်န်ကလူနေယဲ့အပစ်နေကော်အပစ်ပေးဟာမခံရဖော့အပစ်အစားထိုးပူဇော်နေ ဟာဖြစ်ဝါး။ လူအများရီးဖော့ဘာဆာရေးခေါင်းဆောင်နေကလဲဖရားချဲင်န်ကော်ဆုတောင်းပေးခဲ့ကြဟာဝါး။ ဟဲင်န်းသ လဲပေမဲ့ ‘မေရှိယ’ ကပီးပြည့်စုံတဲ့ယဇ်ကောင်အဖြစ်ဆူ့ကိုယ်ဆူဖရားချဲင်န်နားဆက်သမယ့်ဆူဖြစ်ပီးကိုယ်တော်ဟာလူ ဆားတော့ယဲ့အပစ်နေကော်အမြဲရှင်န်လင်န်းမှုမယ့်ပြည့်စုံတဲ့ဆာဆနာရေးဆိုင်ရာမဟာနာယကမင်န်းကီးဖြစ်လာမာ လဲယ်။ ဟဲယ်သလဲပြောနေရဟာမာဆူဟာအပြစ်ကင်န်းစင်ဆူဖြစ်ဟားမော်အနာဂတ်မာဖယ်သလဲပူဇော်မှုနေလော မော်လုပ်စရာမရှိအောင်ဖရားချဲင်န်ကော်ဆူ့ကိုဆူပူဇော်လိုက်ဟာဝါး။

လူ့အဖွဲ့အစည်းနေကော်အုပ်ချုပ်တဲ့ ဖရင်နေနခေါင်းဆောင်နေဟာတစ်ခါတစ်လေအမှားနေလုပ်တတ်ကြဟာ ဝါး။ ‘ဒါဝိဒ်’ ဖရင်ဟာ ‘ဣသရေလ’ လူမျိုးနေအပေါ်မာကော်အုပ်ချုပ်ဟာဝါး။ ဟဲင်န်းပီးခါမာ ‘ဒါဝိဒ်’ ဖရင်ယဲ့နောက် မျိုးဆက်ဖြစ်တဲ့ ‘မေရှိယ’ ဟာကဖာတခုလုံးကော်အမြဲတမ်းအုပ်ချုပ်မာဖြစ်ဟာဝါး။ ဆူဟာအမြဲတမ်းမှန်ကန်စွာအုပ်စိုး တော်မူမော်တရားမျှတဆောဆုံးဖြတ်မှုများကော်ချမှတ်ဟာဝါး။

ဖရားချဲင်န်ယဲ့ရှေ့ဖြစ်ဟောပြင်ညာရှိနေဟာ ‘မေရှိယ’ ယဲ့တခြားအကြောင်းအရာနေကော်လဲပြောဟာဝါး။ ဥပ မာအနေန (မာလခိ) က ‘မေရှိယ’ ပလာခင်တခြားရှေ့ဖြစ်ဟောတစ်ယောက်လောပေါ်လာမာလဲ။ ဟင်န်းရှေ့ဖြစ်ဟော ပြင်ညာရှိဟာအများရီးအရေးပါလာမာလဲလော့ပြောဆိုခဲ့ဟာဝါး။ ဟဲင်န်းပီးနောက်မာရှေ့ဖြစ်ဟောပြင်ညာရှိ (ဟေရှာ ယ) က ‘မေရှိယ’ ဟာ အပျိုနေမော်မွေးလာမာလဲလော့ပြောခဲ့ပီးရှေ့ဖြစေဟောပြင်ညာရှိ (မိက္ခာ) ကလဲ ‘မေရှိယ’ ဟာ ‘ဗက်လင်’ မြို့မာမွေးလာမာလဲလော့ပြောဆိုခဲ့ဟာဝါး။

ရှေ့ဖြစ်ဟောပြင်ညာရှိ (ဟေရှာယ) က ‘မေရှိယ’ ဟာ ‘ဂါလိလဲ’ ပြေမာနေပီးအများရီးဝမ်န်းနေးဆူနေကော် နှစ်သိမ့်ပေးတော်မူဟာဝါး။ ဆူဟာအချုပ်ကျနေတဲ့ဆူနေကော်လဲလွှတ်ပေးမာဖြစ်ပီးနေပကောင်းတဲ့ဆူနေနအပီးနားပ ကြားဆူနေ၊ ပသန်ပစွမ်းဆူနေကော်လဲကုဆပေးမာလဲလော့မိန့်ခဲ့ဝဲ့ဝါး။

ရှေ့ဖြစ်ဟောပြင်ညာရှိ (ဟေရှာယ) ကလူနေဟာ ‘မေရှိယ’ ကော်မုန်းကြပီးလက်ခံကြမာပဟုတ်ဝူးလဲ့ပြော ကြားခဲ့ဝါး။ တခြားရှေ့ဖြစ်ဟောပြင်ညာရှိနေက ‘မေရှိယ’ ယဲ့အဖော်နေဟာဆူ့ကော်ဆစ်စာဖောက်ကြမာလဲလော့မိန့် ကြားခဲ့ပီးရှေ့ဖြစ်ဟောပြင်ညာရှိ (ဇာခရိ) က ‘မေရှိယ’ ယဲ့အဖော်ဟာဟဲယ်သလဲလုပ်ချင်န်းကြောင့်ငွေဒင်္ဂါးဆုံးဆယ်ရ မာလဲကြိုမော်ပြောကြားခဲ့ဟာဝါး။ တချို့သောရှေ့ဖြစ်ဟောပြင်ညာရှိနေကလဲလူနေဟာ ‘မေရှိယ’ ကော်ဆပ်ပီးဆူ့ယဲ့ အဝတ်အစားနေကော်အလောင်းအစားလုပ်ကြမာလဲလော့ပြောခဲ့ကြဟာဝါး။

ရှေ့ဖြစ်ဟောပြင်ညာရှိနေက ‘မေရှိယ’ ဟာဖယ်သလဲဆေရမာကော်လဲပြောခဲ့ဟာဝါး။ ‘ဟေရှာယ’ ကလူနေ ဟာ ‘မေရှိယ’ ကော်ဆံထွေးနထွေးမော်ကဲ့ရဲ့ခါထိုးနှက်ကြဝဲ့မာလော့ပြောကြားခဲ့ဟာဝါး။ ဆူတော့က ‘မေရှိယ’ ဟာ ဖယ်သလဲအပစ်မှလုပ်ဟားခြင်းပရှိပဲလှံနအထိုးခံရပီးကီးစွာသောဒုတ်ခနနာကျင်မှုနေကော်ခံစားရမာလော့ကြိုမော် ပြောဆိုခဲ့ဟာဝါး။

‘မေရှိယ’ ဟာအပစ်လုပ်ချင်န်းပရှိအောင်ပြည့်စုံဆူဖြစ်မာလော့ရှေ့ဖြစ်ဟောပြင်ညာရှိနေကဟောကြားခဲ့ဟာ ဝါး။ ဟဲင်န်းပီးဖရားချဲင်န်ကလူဆားတော့ယဲ့အပစ်နေဖော့အပစ်ပေးတော်မူခါဆေဆုံးရမာလော့ပြောကြားခဲ့ဟာဝါး။ ဆူဆေဆုံးဆွားတဲ့အခါမှသာလူနေဟာ ဖရားချဲင်န်နအတူငြိမ်းချမ်းရေးရနိုင်ကြမာလဲယ်။ ဟဲင်န်းပီးဖရားချဲင်န်ယဲ့အစီအ စဉ်အရ ‘မေရှိယ’ ဆေဆုံးရမာလဲလော့ကြိုမော်ပြောဆိုခဲ့ကြဟာဝါး။

ရှေ့ဖြစ်ဟောပြင်ညာရှိနေဟာဖရားချဲင်န်က ‘မေရှိယ’ ကော်ဆေဆုံးခြင်းမှလောပြင်န်မော်ထလာမာလော့လဲ ဟောကြားထားဟာဝါး။ ဟဲယ်ဟောကြားချက်သလဲခရစ်တော်ယဲ့ဆေဆုံးခြင်းနလောပြင်န်မော်ထမြောက်ချင်န်းဟာ ဖရားရားချဲင်န်အပေါ်မာလူနေလုပ်ဟားတဲ့အပစ်နေဆေးကြောပေးတဲ့ပဋိဉာင်အဆစ်လဲဖြစ်ဟာလော့လဲပြောဆိုခဲ့ဝဲ့ဝါး။

ဖရားချဲင်န်ဟာရှေ့ဖြစ်ဟောပြင်ညာရှိနေကော် ‘မေရှိယ’ ယဲ့အကြောင်းအရာနေအားအများရီးဖော်ပြပေး တော်မူဟာဝါး။ ဟဲင်န်းပီးခါ ‘မေရှိယ’ ဟာဟဲင်န်းရှေ့ဖြစ်ဟောပြင်ညာရှိနေနေတဲ့အချိန်မာကြွရောက်လာချင်န်းပရှိခဲ့ဝူး လဲယ်။ ဟဲင်န်းသလဲရှေ့ဖြစ်ဟောချက်နေပေးပီးနှစ်ပေါင်းလေးရာခန့်ကြာဟားခါမာမှန်ကန်တဲ့အချိန်အတိအကျနဖရား ချဲင်န်ဟာ ‘မေရှိယ’ ကော်ဟဲယ်ကဖာမြေပေါ်နားစေလွှတ်တော်မူဝဲ့ဟာဝါး။

A Bible story from: Genesis 3:15; 12:1-3; Deuteronomy 18:15; 2 Samuel 7; Jeremiah 31; Isaiah 59:16; Daniel 7; Malachi 4:5; Isaiah 7:14; Micah 5:2; Isaiah 9:1-7; 35:3-5; 61; 53; Psalm 22:18; 35:19; 69:4; 41:9; Zechariah 11:12-13; Isaiah 50:6; Psalm 16:10-11