1. Lilonga

Nindi khuli liranga lia vuli shindu liakholekha. Nyasaye yalomba lilova nende viosi vilimu mu madukhu sita. Nyasaye niyakhalomba shivala, shiali shiele, khandi shisundi. Roho wa Nyasaye yali khu matsi.

Khandi Nyasaye yavoola, ''vulavu vuveho'' ma vulavu nu vuvaho. Nyasaye yalola vulavu nuvuli vulayi; yavulanga ''Mbasu''. Yahula shisundi nende vulavu nalanga ''Vutukhu.'' Nyasaye yalomba vulavu litukhu liu khuranga lililonga.

Litukhu lia khavili lililonga, Nyasaye yalomoloma nalomba likulu, ikulu wi shivala. Yalomba likulu lwa yahula matsi kikulu khurula khu matsi kahasi.

Litukhu lia khavaka, Nyasaye yalomaloma niyahula matsi khurula khu lilova liumu. Yalanga humu heneyaho ''shivala'' malelo nalanga matsi ''inyanza.'' Nyasaye yalola via yali nalombi nivili vilayi.

Malelo Nyasaye navola, ''Misala luganu nu luganu nende viragwa viosi viruli mulilova.'' Na nindio kakholekha. Nyasaye yalola via yali nalombi nivili vilayi.

Mu litukhu lia khanne lililonga, Nyasaye yalomaloma nalomba liuva, mweli nende tsinyininyini. Nyasaye yavilomba vihane vulavu khu shivala khandi viahuli mmbasu nende vutukhu, tsinyinga nende mihika. Nyasaye yalola viayali nalombi nivili vilayi.

Khu litukhu lia kharanu, Nyasaye yalomaloma nalomba vuli shindu shielema mmatsi na manyonyi kosi. Nyasaye yalola nuvuli vulayi,navikasitsa.

Litukhu lia sita lililonga Nyasaye yavola, ''Tsinyama tsiosi tsiu khwilova ziveho.'' Na kakholekha khuli Nyasaye yali navoli. Tsindala ni tsiukhuvaya, tsimolanga hasi nende tsiumbulimu. Nyasaye yalola nuvuli vulayi.

Nyasaye yavola, ''Chendi khulombe vandu khu vukondo vweru vasese khutsi. Valava nende vwamihi khu lilova ni tsinyama tsiosi tsilikhu.''

Khu Nyasaye yavukula malovo nalombakhu mundu, navura vulamu muye. Lira liu mundu uyu liali Adamu. Nyasaye yaraka viragwa mmulimi kwa Edeni wa Adamu ya khamenyi nu khukulinda.

Hakari hu mulimi kwa Edeni, Nyasaye yaraka misala chivili-musala kuvulamu nende musala kuvucheli vu khumenya vulayi nende vuvi. Nyasaye yavolela Adamu anyala khulia khurula khu musala kwosi mmulimi kwa Edeni nikhali musala kukhumenya vulayi nende vuvi. Niyakhalili khurula khu musala yuku, yakhakhutsi.

Malelo Nyasaye navola, ''Shu vuli vulayi mundu khumenya wonyene tawe.'' Nikhali ivula khu mutsinyama yakhavele mukhonyi wa Adamu.

Khu Nyasaye yachila Adamu nakone tsindolo. Malelo Nyasaye naruliza lulala khu tsimbalu tsietsie na lulomba mukhali na muhila khuye.

Lwa Adamu yamulola yavola, ''Leelo! Uyu neye usesa inzi. Lekha alangwi 'mukhali', shijila yalombwa khurula khu musatsa.'' Nashio shivune shijila musatsa nalekha yise na nyina mahambana nu mukhali wewe.

Nyasaye yalomba musatsa nu mukhali vamusese khuliye. Yavakasitsa navavolela, ''Muve nu lwivulu lunyishi nende vitsikhulu ma mwitsulitsi shivala.'' Ma Nyasaye nalola viayali nalombi viosi nivili vilayi, nayanzizwa munonono. Yaka kosi kakholekha mu litukhu lia sita lililonga.

Litukhu lia saba lwa liatukha, Nyasaye yali namali muhinzilu kwekwe kwa yali nakholi. Yakasitsa litukhu lia saba nalikhola litakatifu, shijila litukhu yili yahulukha khurula khu muhinzilu kwekwe. Nindio Nyasaye yalonga lilova nende viosi vilimu.

Lukanu lwi Vanjeli khurula:Liraanga 1-2