49. Lilakano lia Nyasaye liyia

Injolosi yavolela mukhana muchima walangwa Mariya vu alikhivula mwana wa Nyasaye. Khu nashili muchima shinini shinjolosi shiamuloleshela ma navelekha. Yivula mwana ma namulanga Yesu. Khu lwa yako Yesu alikhavili Nyasaye khandi mundu.

Yesu yakhola manyishi kukhuchenyinya kamenyinya ni Nyasaye. Yachenda khu matsi, yahonjelitsa shivunjetsi, yahonyinya vandu valwale vanyishi, yarulitsa madimoni, yavushitsa vakhutsu ni vava valamu, malelo nakalukhanyinya mikati chiranu nende tsisutsi tsindi tsivili khuva shukhulia shitukha vunyishi vwa vandu 5,000.

Yesu khandi yali mwechitsi mukali, yalomoloma nende vunyali shijila nu mwana wa Nyasaye. Yechitsa vu wenyekha uyanze vandu vandi khuli wiyanza mwene.

Khandi yechitsa wenyekha uyanze Nyasaye khuvira shindi shindu shiosi, khuvira khali mwandu chiochio.

Yesu yavola vu vwami vu mwikulu vuviri shindi shindu shiosi shili khwilova. Shia vuli mundu yenyekha akhole nu khwinjila mu vwamihi vwa Nyasaye. Khwinjila mu vwamihi vwa Nyasaye, khutukha uhonyinywi vwoni vwovwo.

Yesu yechitsa vu vandu valala valamwiyema ma vahonyinywi, nikhali vandi shivanyala tawe. Yavola vandu valala valo manye lilova lilayi. Vahulila makhuva malayi ka Yesu ma vahonyinywa. Vandi vandu vali lilova litinyu liukhunjila, wa vukutsa vwi likhuva lia Nyasaye shivwinjila nukhuvunwa tawe. Vandu yavo vambakhana vurume khulondokhana khu Yesu na shivalinjila mu vwamihi vwevwe tawe.

Yesu yechitsa vu Nyasaye wayanza voni muno. Yenya khuvavela ma avakhole vana veve.

Yesu yakhuvolela vu Nyasaye shiyayanza vwoni tawe. Lwa Adamu nende Hawa vakhola vwoni, vwasalilitsa vitsikhulu veve vosi. Khu lwa kenako vuli muindu khu lilova akhola vwoni na wayahulwa khurula khu Nyasaye. Khu vuli mundu wakwa mutsiku wa Nyasaye.

Nikhali Nyasaye wayanza vuli mundu uli mu lilova muno nahana vutsa mwana wewe mulala, khulelo woyo wosi usuvila mu Yesu shiala Nyola isalilitso yu vwoni vwevwe tawe. Nikhali alamenya na Nyasaye mihika ni mihika.

Shijila vwoni vwovwo, uli na makoso na utushili khukhutsa. Nyasaye ali nende vurima nende ivi, nikhali wavikha vurima vwevwe khu Yesu havukono wiivi. Lwa Yesu yakhutsa khu musalaba, yanyola isalilitso yoyo.

Yesu shiyakhola vwoni tawe, nikhali yahujilila khusalilitswa ma khutsi khuli mulukha mulunji kwi shihanwa shiakharulitsa vwoni vwovwo nende vwoni vwa vuli mundu ali mu lilova. Shijila Yesu yilomba mulukha mwene, Nyasaye anyala khuvela vuli vwoni khali vwoni vukali muno.

Mihinzi milayi ma chikhuhonyinyi tawe. Shivulaho shia wakhakhola khulelo uhulishitsane na Nyasaye tawe. Yesu wonyene naye wakhokitsa vwoni vwovwo. Wenyekha khusuvila vu Yesu nu Mwana wa Nyasaye, na yakhukhutsila khu musalaba ma Nyasaye namurulitsa mu vakhutsu khandi nava mwoyo.

Nyasaye alahonyinya vuli mundu usuvila Yesu ma amuvukula khuli Mwami wewe. Nikhali shilihonyinya woyo wosi ukhamusuvila tawe. Shikahenditsa nuli muhinda noho mutakha, musatsa noho mukhali, muhindila noho mwana, inoho wa umenyanga tawe. Nyasaye wakhuyanza na yenyanga usuvili mu Yesu khu ave nende lihulishitsana lia ahimbi nende ivi.

Yesu yenyanga usuvili muye ma uvatiswi. Usuvila Yesu ni Masiha, Mwana wa Nyasaye mulala? Usuvila uli mwoni na wenyekha Nyasaye akhuhe isalilitso? Usuvila Yesu yakhutsa khu musalaba narulitsa vwoni vwovwo?

Nuwasuvila mu Yesu nende ka yakhukholela, uli mukrisitayo! Nyasaye wakhurulitsa mu vwamihi vwa Shitani vwi shisundi nu khukhuvikha mu vwamihi vwa Nyasaye vu vulavu. Nyasaye warulitsa tsinjila tsia khale, tsiu vwoni tsia wakholelamu vindu nukhukhuha tsinjila tsimbia, tsinunji tsiu khukhola vindu.

Nuva nuli mukrisitayo, Nyasaye wakhuleshela vwoni vwovwo khulondokhana khu ka Yesu yakhola. Khu lweneyulu, Nyasaye akhulola menye mulina wa ahimbi havukono hu mutsiku.

Nuli mulina wa Nyasaye ma muhinzili wu Mwami Yesu, walenyekha uri ka Yesu akhwekitsanga. Khali nuli mukrisitayo, walachelizwa khukhola vwoni. Nikhali Nyasaye nuwilisuvila na avola nuvula vwoni vwovwo, alakhuleshela. Alakhuha tsingulu tsiu khulwana vwoni.

Nyasaye akhuvolela usaale, usome likhuva lielie, usaale nende vakrisitayo vandi, ma uvolele vandi vandu ka yakhukholela. Vindi yivi viosi vilomba uvie nu vuhambani vu mukari naye.

Lukanu lwi Vanjeli khurula: Varoma 3:21-26, 5:1-11; Yowana 3:16; Maliko 16:16; Vakolosia 1:13-14; 2 Vakorinzo 5:17-21; 1 Yowana 1: 5-10