40.Yesu Uvambilwi

Vasikali nivakhakholela Yesu shihenyehenye, vamuhila ihale wa vamuvambila. Vamuchingitsa musalaba kwa akhutsila khu.

Vasikali vayila Yesu avundu alangwa ''Shihanga'' ma nivakhomela vilenje vwevwe na makhono khu musalaba. Nikhali Yesu yavola, ''Tata, vavele, shijila shi vamenyi shia vakhola tawe.'' Pilato yavola handichi, ''Mwami wa Vayuda'' khuli shimenyinyilo ma muvishi khu musalaba ha murwi kwa Yesu.

Vasikali vakhuvila isimbi tsinguvu tsia Yesu. Lwa vakhola yaka, varweshitsa vuloli vuvola, ''Vikavanila tsinguvu tsianje, khandi vakhuvila tsinguvu tsianje isimbi.''

Yesu yavambilwa hakari ha vivi vavili. Mulala khu vivi yava yakholela Yesu shihenyehenye, nikhali hundi yavola, ''Shuli nu vuri khu Nyasaye tawe? Khutsi khuli na makoso nikhali mundu wuyu shiali nilikoso tawe,'' Malelo navolela Yesu, ''Nuyanza unzitsushitsi mu vwamini vwovwo.'' Yesu yamukalushitsa, ''Nunundi khulava nivi mu Paradiso.''

Vimilili va Vayahudi nende vandu vandi vali mushituma vakholela Yesu shihenyehenye. Vamuvolela, ''Nuva nuli Mwana wa Nyasaye, yikhulukha khurula khu musalaba ivi mwene! Khulelo khukhusuvili.''

Malelo likulu niliva shisundi mu lusomo lwenolo lwosi, khali ndio kwali vutsa mu lidukhu hakari. Shisundi shiaranga saa sita ziu mbasu nishimala masaa kavaka.

Malelo Yesu nalila navola, ''Luvwele! Tata, mbana roho kwanje mu makhono koko.'' Malelo niyinaminya murwi kwekwema mwoyo nukurula muye. Lwa yakhutsa, shivala shia techela ma ipasia yahukhanyinya vandu nende Nyasaye mu Litempeli ni yatikha khali khavili khurula ikulu khutukha hasi

Khuvirila mu likhutsa lielie, Yesu yikula injila ya vandu khutukha khu Nyasaye. Lwa musikali wali nalindi Yesu yalola kosi kali nikakholeshe, yavola, ''Kilikali, mundu wuyu avula likoso. Yali Mwana wa Nyasaye.''

Malelo Yosefu nende Nikodemo, vimilili va Vayahudi vavili vali nivasuvila Yesu ni Muhonyi, vareva Pilato avahe muvili kwa Yesu. Valinjila muvili muinguvu nivakuvikha mu shilindwa shiali nishilombelwi mwichina. Malelo ni va kolongominya lichina likali ni li khunikha vwi njililu vwi shilindwa tsana.

Lukanu lwi Vanjeli khurula: Matayo 27:27-61; Maliko 15:16-47; Luka 23:26-56; Yowana 19:17-42