48. Yesu naye Muhonyi walakwa

Lwa Nyasaye yalomba lilova, vuli shindu shiali shilunji. Vwoni shuvwali ho tawe. Adamu na Hawa vali vayanzana, khandi vali vayanza Nyasaye. Vulwale ni likhutsa shiviali ho tawe. Nyasaye yenyanga lilova live mu liva lirio.

Shitani yalomolomela mu inzukha yali mu mulimi khu avehele Hawa. Malelo ye nende Adamu nivakholela Nyasaye vwoni. Shijila vona vuli mundu uli khushivala alwalanga khandi vuli mundu akhutsanga.

Shijila Adamu nende Hawa vakhola vwoni, shindi shindu shiu khurishitsa shia kholekha. Vamenya nivakwa vatsiku va Nyasaye. Khu lwa keneyako vuli mundu yivulwa nali mwoni khandi nali mutsiku khu Nyasaye. Lihambana lia Nyasaye nende vandu liamenekwa nende vwoni. Nikhali Nyasaye yali ni lienya liu khukalushitsa vuhambani vwenovo.

Nyasaye yalaka vu mulala khu vitsikhulu va Hawa yakhatuvulanyinyi murwi kwa shitani na shitani yakhalumi indecheye yeye. Yaka kamenyinya Shitani yakhiri Muhonyi, nikhali Nyasaye yakhamuhele vulamu khandi. Malelo Masiha yononyinyi vwamihi vwa Shitani mihika ni mihika. Mihika minyishi nichiakhavira, Nyasaye yavula vu Yesu naye Muhonyi.

Lwa Nyasaye yononyinya shivala shiosi ni michelelo, yahana liaro lihonyinyi vandu vamusuvila. Mu injila indala yeneyo, vuli mundu atushili khukhutsa shijila vwoni vwavo, nikhali Nyasaye wahana Yesu ahonyinyi vuli mundu umusuvila.

Khu tsimia tsi mihika, vasalisi vatsililila khukholela Nyasaye milukha khulukhu manyinya shijelo shiu vwoni vwa vandu. Nikhali milukha yecho shichiavarulitsa vwoni tawe. Yesu naye Musalisi Mukali Mwene. Lukanu nende vasalisi vandi, yirulitsa khuli musango ku khurulitsa vwoni vwa vandu vosi khulilova. Yesu yali musalisi mulunji shijila yavukula shinyashitso shiu vwoni vwa vuli mundu yakhola.

Nyasaye yavolela Aburahamu, ''Vandu vosi vali khulilova valikhakasitswi khuvirila khu ivi.'' Yesu yali mwitsukhulu wa Aburahamu. Vandu vosi khulilova vakasitswa khuvirila khuye, shijila vuli mulala usuvila mu Yesu ahonyinywa vwoni vwevwe makhandi ava mwitsikhulu wa Aburahamu mu roho.

Lwa Nyasaye yavolela Aburahamu amuhanili mwana wewe, Isaka, khuli shihanwa shiu musango, Nyasaye yalera likondi havukono hu muyayi wewe, Isaka. Vosi khwenyekha khukhutsi shijila vwoni vweru! Nikhali Nyasaye yalera Yesu, likondi lia Nyasaye, khuli shihanwa shiu musango akhutsi havukono weru.

Lwa Nysaye yaruma matiinyu ku khumalishitsa mu Misili, yavolela vuli Muislaheli yiri likondi lilunji mu kandi malelo aveshe musayi khu tsimbahu tsitila muliango ikulu nende tsimbeka tsiosi. Lwa Nyasaye yalola musayi, yavira khu miliango chiavo na shiyayira vayayi vavo vukhuranga tawe. Shikholwa yishi shilangwangwa Khuvirakhu.

Yesu ni likondi lieru liu Khuvirakhu. Yali mulunji ukhali nu vwoni khandi yirwa mu lisangala liu Khuvirakhu. Lwa mundu wosi asuvila mu Yesu, musayi kwa Yesu kurunganga vwoni vu mundu woyo na shinyashitso shia Nyasaye shiviranga khu mundu woyo.

Nyasaye yalomba lihulishitsana nende Vaislaheli, vali varovole veve. Nikhali khulwenulu walomba lihulishitsana lindi linyolekha khu vuli mundu. Shijila lihulishitsana liyia yili, vuli mundu khurula khu tsimbia lukanu nu lukanu anyala khuva mundu wa Nyasaye khu lu khusuvila mu Yesu

Musa yali muloli mukali wavola makhuva ka Nyasaye. Nikhali Yesu yali muloli mukali khu vosi. Ye ni Nyasaye, khu vuli shia yakhola nukhuvola viali vikholwa na makhuva ka Nyasaye. Nashio shijila Yesu nalangwa Likhuva lia Nyasaye.

Nyasaye yalaka Mwami Daudi vu mulala khu vitsikhulu veve alikhamihi vandu va Nyasaye mihika ni mihika. Shijila Yesu nu Mwana wa Nyasaye khandi Muhonyi, naye mwitsikhulu wa Daudi wonyene wakhamiha mihika ni mihika.

Daudi yali mwami wa Islaheli, nikhali Yesu nu mwami wi lilova liosi! Alikhitsa khandi khwamiha vandu veve khu vulunji ni milembe mihika ni mihika.

Lukanu lwi vanjeli khurula: Liranga 1-3, 6, 14, 22; Khurula 12, 20; 2 Samweli 7:1-8: 13, 9:11- 10:18; Likhunula 21