28.Mwamihi Muvukha Muhinda

Litukhu lilala, mwami muvukha yitsa khu Yesu namureva, ''Mwechitsi mulayi, nakhakhola shina khu nanyola vulamu vwi mihika ni mihika?'' Yesu yamuvolela, ''Shijila shina unanga 'mulayi'? Aliho vutswa mulala uli mulayi, naye nali Nyasaye. Navutswa nuwenyanga vulamu vwi mihika ni mihika, uri malako ka Nyasaye.''

Yareva, ''Kalena ka kenyekha ndi? Yesu yamuchipa, ''Wakhira tawe. Wakhaheya tawe. Wakhiva tawe. Wakhaveha tawe. Ha tata na mama wowo luyali, malelo uyanze murende wowo khuli wiyanza.''

Navutswa muvukha yavola, ''Malako yako kosi nakalonda khurula nindi mwana. Nishina shindi shia kenyekha khole khulelo menye mihika ni mihika?'' Yesu yamuhenza namuyanza.

Yesu yachipa, ''Nuwenyi khuva mulunji, kuliza miandu chiochio chiosi malelo uhe vatakha mang'ondo ka unyola. Walava nende livishilu mwikulu. Malelo witsi unonde.''

Lwa muvukha woyo yahulila ka Yesu yavola yaleka koro, shijila yali muhinda sana na shiyenya khuhana viosi via yalia navio tawe. Yakomokha narula wa Yesu yali.

Malelo Yesu navolela vechizwi veve, ''Nuvutinyu muno khu vanndu vahinda khwinjila mu vwamihi vwa Nyasaye! Katoto nu vutoro khu ingamia khwinjila mu induhu yi sindani khuvira muhinda khwinjila mu vwamihi vwa Nyasaye.''

Lwa vechizwi vahulila ka Yesu yavola, vikosa nivavola, ''Khu nivina wakhahonyinywa?''

Yesu yahenza vechizwi veve navola, ''Yaka shikanyala khunyalikha tawe khu vandu, navutswa khu Nyasaye, vuli shindu shinyala khukholekha,''

Petelo yavolela Yesu, ''Khwivale vuli shindu khukhulondi. Ni shina shia nukhunyole?''

Yesu yamukalushitsa, ''Vuli wosi uleshi inzu yeye, vamwavo, vavotso, nyina, yise inoho mwandu shijila inzi, alanyola vindu makhavi 100 makhandi alanyola vulamu vwi mihika ni mihika. Nikhali vanyishi vali imbeli valitsa khuva vinyuna na vanyishi vali inyuma valitsa khuva imbeli.''

Lukanu lwi vanjeli khurula: Matayo 19:16-30; Maliko 10:17-31; Luka 18:18-30