43. Likanisa Liranji

Yesu ni ya khakalukha mwikulu, veechi vamenya mu Yerusalemi khuli yali ni ya va volela vakhole. Vasuvila vivunjelitsa halala nukhusala

Vuli muhika, matukhu 50 Ipasaka niyakhavira, Vayahudi vasangalila litukhu likhongo lilangwangwa Pentekote. Pentekote khwali khusangalila khwa Vayahudi injeso yi nganu. Vayahudi varula mu tsimbeka tsiosi tsi lilova khwitsa khusangalila Pentekote halala Yerusalemi. Muhika yuku, litukhu lia Pentekote lia tukha lisitsa lilala Yesu na kalushenje mwikulu

Lwa vasuvila vali nivali halala, liyoko liahulilikhana munzu mwa vali khuli shivunzetsi. Malelo shindu shialolekha khuli lumemo lu mulilu shiali khu murwi kwa vuli musuvila. Vosi vitsulitswa Roho Mutakatifu ma nivaranga khulomoloma mu tsilomoloma tsindi.

Lwa vanduvali Yerusalemi vahulila liyoko, lukhu lwa vandu lwitsa khulola shiali nishikholekhanga. Lwa vandu vahulila vasuvila nivavola mihinzi chiu vuchenyi chia Nyasaye, vikosa khuhulila makhuva kene yako mu lulomoloma lwavo vene.

Vandu valala vavola veechi vang'wele. Nikhali Petelo yasinjila navavolela, ''Mbulishitsi! Vandu yava shivang'wele tawe! Yukhu nukhurweshitsa vuloli vu muloli Yoweli vwa Nyasaye avola, 'Mu matukhu ku khumalishitsa, natsukhulula Roho kwanje.'''

''Vasatsa va Islaheli, Yesu yali mundu wakhola vindu vinyishi viu khuchenyinya khuvirila mu tsingulu tsia Nyasaye, khuli mwa khalola khandi khuli mwa menya khale. Nikhali mwamuvamba!''

''Khali Yesu niyakhutsa, Nyasaye yamurulitsa mu vakhutsu. Yili lirweshitsa vuloli vuvola, 'Shulalekha Mutakatifu wowo akundili mu vwina tawe.' Vwa toto vuli, Nyasaye yavushitsa Yesu namuha vulamu khandi.''

''Yesu khu lwenulu wanininywa khu mukhono mulunji kwa Nyasaye Tata. Ma Yesu waruma Roho Mutakatifu khuli lwa yali niyalaka yakhakholi. Roho Mutakatifu nakwo kulera vinduvia mulola nukhuhulila yivi.''

Mwavamba Yesu, nikhali kilikali Nyasaye wakhola Yesu khuva Mwami khandi Masiha!''

Makhuva ka Petelo yavola katukha khu vandu vamuhulishitsa muno. Khu vareva Petelo nende veechi, ''Vamwiru, khwakhakhola khurina?''

Petelo yavakalushitsa, ''Vuli mulala khu munyi kenyekha yikanili nukhuvatiswa mu lira lia Yesu Kristo khulelo Nyasaye amuvele vwoni vwenyu. Khandi alamuha shihanwa shia Roho Mutakatifu.''

Vandu vatukha 3,000 vasuvila ka Petelo yavola nivakholekha veechi va Yesu. Vavatiswa nivakholekha valala khu likanisa lia Yelusalemi.

Veechi vatsililila khuhulishitsa mechitso ka varumwa, nivalia halala, ma khandi nukhusalila vene khu vene. Vasangalila khwitsominyila Nyasaye halala ma khandi shiosi shia vali nashio vakavana. Vandu vosi varanga khuvakanakanila vulayi. Vuli litukhu. Vuli nuvushia vandu vatsililila khusuvila.

Lukanu lwi Vanjeli khurula: Vikholwa 2