35.Tata wishivelo

Litukhu lilala, Yesu yali niyechitsanga vavukuli vu vushuru nende voni vandi vali nivivunjelitsi khumuhulishitsa.

Vimilili vandi vi dini valiho valola Yesu navukuli voni yava khuli valina nivaranga khwimonya lichiaya nukhwimonya. Khu Yesu yavavolela lukanu yulu.

''Khwali ho nende mundu wali nende vikhula vavili.Mwikhula mushe yavolela tata wewe, 'Tata, nyenya umbe mukabwa kwanje sasa!' Khu yise yakavulanyinya miandu chiechie khu vikhula vavili.''

''Khu vwangu mwikhula mutititi yavunjelitsa vindu vievie natsia khwononola mang'ondo keke mu limenya liu vwoni ihale.''

''Inyuma wa kenako, khwali ho nende shimiyu wa mwikhula mushe yali, navula mang'ondo ku khukula shiukhulia. Khu mulimu kwa ya nyola kwali khulishitsa tsingulume.Yalola vutiinyu nende inzala inyishi nakanaka khulia shukhulia shi tsingulume.''

''Lukhumalishitsa, mwikhula mushe yireva, 'khu khola shina? Vakholi va tata wanje vali nende shiukhulia shinyishi ninzi inzala ni yinzira. Natsia khu tata wanje mureve mbe mulala khu vakholi veve,'''

''Khu mwikhula mushe yaranga khukalukha ingo wa yise wewe. Nashili ihale yise wewe yamulola namulolela shivelo. Yilukhachila mwikhula wewe na mu khumbelela.''

''Mwikhula yavola, 'Tata, nakhola vwoni khu Nyasaye khandi khu ivi. Shindushili khuva mwana wowo tawe.'''

''Nikhali tatawewe yavolela mulala khu vakholi veve, 'Tsia ulere tsinguvu tsindayi ufwale mwikhula wanje! Vikha mukasa khu shitere shieshie makhandi uvishi tsikala mu vilenje vievie. Khandi wiri shimoli shilayi khuve nende lilia nu khusangala, shijila mwana wanje yali wakhutsa nikhali khu lwene yulu ali mwoyo. Yali wakora, unyoleshe.!'''

''Khu vandu varanga khusangala.Luhono nulushili khutsia lurambi, mwikhula mukhulundu yachelela ingo khurula wa yali nayinzilenje mulimi. Yahulila tsinyimbo nilisieva nachenya shiali nishikholekhanga.''

''Lwa mwikhula mukhulundu yanyola vu vasangala shijila amwavo wewe uchelele ingo, yali nu vurima niyambakhana khwinjla munzu. Yise wewe yamusaala khu yinjili vasangale naye, nikhali yambakhana.''

''Mwikhula mukhulundu yavolela yise, 'Mihika yichi chiosi nakhuyinzilila ni lisuvila liosi! Shili khukhumilakhu imoni tawe, na ushili khumbakhu khali imbuli yonyene nasangala na valina vanje. Nikhali lwa mwikhula wowo uyu wamala tsisendi tsiotsio mu tsinjila tsiu vwoni akalushi ingo, umwirili shimoli shilayi!'''

''Yise yakalushitsa, 'Mwana wanje , uvetsa ninzi khase, khandi vuli shindu shia ndi nashio nishioshio. Nikhali nuvulayi khusangala shijila muyayi wenyu yali wakhutsa, na khu lweneyulu ali mwoyo. Yali wakora, nikhali unyoleshe khu lwene yulu!'''

Lukanu lwi Vanjeli khurula: Luka 15:11-32