42. Yesu akalukha Mwikulu

Litukhu lia Yesu yarula mu vakhutsu, vavili khu veechi veve vali nivatsitsa mu litaala liali hambi. Nivali khunjila, valomoloma khu kali nikakholeshe khu Yesu. Vakanakananga vu ni Muhonyi, khu malelo wayirwa. Ma vakhayo vavola ali mwoyo khandi. Shivamenya lia vasuvilila tawe.

Yesu ya valonda naranga khuchenda navo, nikhali shi va mu menyelitsa tawe. Yareva shia vali ni va lomoloma khu, ma ni va muvolela vuli yako kosi kali nikakholeshe khu matukhu mati kaviri khulondokhana khu Yesu. Vasuvila va lomolominya mucheni ukhamenyi kali ni ka kholeshe Yelusalemi tawe.

Malelo Yesu navaloshitsila ka likhuva lia Nyasaye lia vola khulondokhana khu Muhonyi.Yavitsushitsa vu valoli vavola Muhonyi alikhasalili malelo yirwa, nikhali litukhu lia khavaka alikharuli mu vakhutsu. Lwa vatukha mu litaala lia vandu vavili yavo vapara khwikhala vwali nu vwilanga.

Vandu vavili yavo vavolela Yesu yikhale navo, nahujilila. Nivakhirechekha khulia shililwa shiu khulukolova, Yesu yavukula shipande shiu mukati, niyitsominya Nyasaye, malelo nakumeneka. Heneyaho vamenya vu yali Yesu. Nikhali khu luhono lwenolo yakora khurula mu tsimoni tsiavo.

Vandu vasata vavili yavo vavolelana, ''Woyo avele Yesu! Nashio shijili mioyo chieru ni chiyia lwa akhwivaliili likhuva lia Nyasaye!'' Khu vwangu, vakalukha Yelusalemi. Lwa vatukhayo, vavolela veechi, ''Yesu ali mwoyo! Khumuloli!''

Veechi lwa vali nivalomoloma, Yesu yalolekha munzu mwa vali na vavolela, ''Milembe chive na munyi!'' Veechi vakanakana yali shinanyenzo, nikhali Yesu yavola, ''Shijila shi muli nu vuri nu khuvula khusuvila? Henzi khu makhono ni vilenje. Vinanyenzo vivetsa nu muvili khuli inzi tawe.'' Khuvamenyinya vu shi yali shinanyenzo tawe, yavareva shiukhulia. Vamuha shipanda shi sutsi indeshe, malelo nalia.

Malelo Yesu navola, ''Namuvolela vu vuli kahandika khulondokhana khu inzi mu likhuva lia Nyasaye khutukha karweshizwi.'' Yakhunula tsinganakani tsiavo khu vahelewe likhuva lia Nyasaye. Yavola, ''Kahandikwa khale vu Muhonyi yakhasalilizwi, akhutsi, malelo aruli mu vakhutsu litukhu likhola khavaka.''

''Khandi kahandikwa mu luvaso vu veechi vanje vakhavolele vandu vu vuli mulala yenyekha khwikanila khulelo anyole khuvelwa vwoni vwevwe. Valakhola vari khuranjilila mu Yelusalemi, malelo vatsi mu vandu lukanu nu lukanu vuli avundu. Muli vashahidi makhuva yaka.''

Khu matukhu makhomi kane kalonda khu, Yesu yalolekha khu veechi veve makhavi manyisi. Lulala, yaloleshela vandu vaviri 500 khulala! Yamenyinya veechi veve mu tsinjila tsinyishi ali mwoyo, ma navechitsa khulondokhana khu vwami vwa Nyasaye.

Yesu yavolela veechi veve, ''Tsingulu tsiosi mwikulu nende hasi mbelelwi. Khu mutsi, khulomba veechi vuli mu tsimbia tsi vandu lukanu nu lukanu khulukhu vavatisi mu lira lia Tata, liu Mwana, nende Roho Mutakatifu, nende khuvechitsa vari vuli kosi kanamuvolela. Mwitsushitsi nimbe namunyi vuli lwosi.''

Khu matukhu makhomi kane Yesu narulienje mu vakhutsu, vavolela veechi veve, ''Mumenye mu Yerusalemi khutukha lwa Tata wanje amuha tsingulu lwa Roho Mutakatifu kwitsa mu munyi.'' Malelo Yesu natsia mwikulu, ma malesi nikamuvisa khurula khuvo. Yesu yikhala khu mukhono musatsa kwa Nyasaye khu yamihi vuli shindu.

Lukanu lwi Vanjeli khurula: Matayo 28:16-20; Maliko 16:12-20; Luka 24:13-53; Yowana 20:19-23 Vikholwa 1:1-11