46. Pahulu Ukholeshe Mukrisitayo

Sahulu yali musatsa muvukha walinda tsikanzu tsia vasatsa vira Shitefano. Shiyasuvila mu Yesu tawe, ma khu yatambitsa vasuvila. Yachenda vuli khu muliango nakimila vasatsa khu vakhali nukhuvara mujela. Musalisi Mukali yiyemela Sahulu khutsia mu lidala lia Damasika akimili vakristayo valiyo nukhu vakalushitsa Yerusalemi.

Sahulu nali khunjila natsitsanga Damasika, vulavu vunyishi khurula mwikulu vwakha wayali, ma nakwa hasi. Sahulu yahulila mundu navola, ''Sahulu! Sahulu! Shijila shina untambitsanga?'' Sahulu yareva, ''Nivi vina, Mwami?'' Yesu yamukalushitsa, ''Ninzi Yesu. Ninzi wa utambitsanga!''

Lwa Sahulu yavukha, shiyanyalitsa khulola tawe. Valina veve vamukhonyanila khwinjila mu Damasika. Sahulu shiyalia inoho khung'wa shindu shiosi khu madukhu kavaka tawe.

Khwali ho nende mulondi wa Yesu mu Damasika yalangwa Anania. Nyasaye yamuvolela, ''Tsia munzu mwa Sahulu amenya. Vikha mikhono chiochio khuye khulelo alole khandi.'' Nikhali Anania yavola, ''Mwami, nahulila khuli mundu wuyu atambitsa vasuvila.'' Nyasaye yamukalushitsa, ''Tsia! Murovole atangase lira lianje mu Vayahudi nende vandu vi tsimbia tsindi. Alasalila muno shijila lira lianje.''

Khu Anania yatsia khu Sahulu, namuvikha khu makhono, navola, ''Yesu, ukhuloleshele khunjila nuwitsa yinu, andumi khu ivi khu lelo ukalushitsi lilola nukhwitsulitswa Roho Mutakatifu.'' Heneyaho Sahulu yanyalitsa khulola khandi, ma Anania namuvatisa. Malelo Sahulu nakalushitsa tsingulu niyakhalia khu shukhulia.

Khu vwangu, Sahulu yakhanga khwilwatsila Vayahudi vali Damasika, navola, ''Yesu nu Mwana wa Nyasaye!'' Vayahudi vali nu vuchenyi khulola vu mundu wachelitsa khwononyinya vasuvila khali ye khandi usuvili mu Yesu! Sahulu yalomolominya vayahudi, khuvamenyinya vu Yesu ni Masiha.

Matukhu manyishi nikakhavira, Vayahudu vakanakana khwira Sahulu. Varuma vandu khutsa khumulindila mu vwinjililu vwi lidala khulelo vamwiri. Nikhali kakwa Sahulu mu marohi, ma valina veve nivamukhonyanila khwilukha. Vutukhu vulala vamuvikha mushikabu nivamulakhulila khu lisisi li lidala. Sahulu niyakharula Damasika, yatsililila khwilwatsa khulondokhana khu Yesu.

Sahulu yatsia Yerusalemi khuvukana nende valondi va Yesu nikhali vamuria. Ma mulala khu vasuvila walangwa Baranaba nayila Sahulu khu varumwa navavolela khuli Sahulu yali niyilwatsie Damasika vuchila khuria. Khurula awenaho, valondi va Yesu vahujilila Sahulu.

Vasuvila valala vali nivilukha khutambitswa mu Yersalemi vatsia ihale mu lidala lia Antoko ma nivilwatsa yo khulondokhana khu Yesu. Vanyishi mu vandu va Antoko shivali vayahudi tawe, khu lukhuranga, vanyishi khuvo vasuvila. Baranaba nende Sahulu vatsia yo khwekitsa vasuvila vayia yavo khulondakhana khu Yesu khandi khuvikha tsingulu mu likanisa. Mu Antoko namwo mwa vasuvila mu Yesu varanga khulangwa ''Vakrisitayo.''

Litukhu lilala Vakrisita va Antoko vali ni vihimi lilia nukhusala, Roho Mutakatifu nukuvavolela, ''Mulombe vwiyangu vwanje Baranaba nende Sahulu vakhole mihinzi chia navalanga vakhole.'' Khu likanisa lia Antoko liasalila Baranaba nende Sahulu nivavikha mikhono chiavo khuvo. Ma nivavaruma khutsia khwilwatsa makhuva malayi khulondakhana khu Yesu yi vundu hundi. Baranaba nende Sahulu vechitsa vandu vanyishi, na vandu vanyishi khurula mu tsimbia tsinyishi vasuvila Yesu.

Lukanu lwi Vanjeli khurula: Vikholwa 8:3; 9:1-31; 11:19-26; 13:1-3