47. Pahulu nende Sila mu Filipi.

Sahulu nachendanga mu lusomo lwa Varomi, yaranga khurumishila lira lielie lia Varoma, ''Pahulu.'' Litukhu lilala Pahulu nende mulina wewe Sila vatsia mu lidala lia Filippi khutangasa makhuva malayi ka Yesu. Vatsia ha muchela kuli ilwanyi wi lidala wa vandu vivunjelitsila vasaale. Hawenaho vavukana nende mukhayo walangwa Lidia wali mukholi wu vukhala. Yali wayanza nukhusaala Nyasaye.

Nyasaye yikula mwoyo kwa Lidia asuvili makhuva shijila Yesu, ma ye nende vandu veve nivavatiswa. Yinjilitsa Pahulu nende Sila vamenye naye munzu mwemwe, khu vikhala naye na vandu veve.

Pahulu na Sila vavukana na vandu havundu hu khusaala mu vunyishi. Vuli lidukhu nivatsitsa yo, mukhana murukwa wali ni lidimoni yavalonda. Khuvirila mu lidimoni yelo yanyalitsa khulola kalikholekha khuvandu. Khu yalombela mwami wewe mang'ondo manyishi khuli muloli wi tsikhavi.

Mukhana murukwa yatsililila khulanjlitsa navo nivachenda, ''Vandu yava na varumishi va Nyasaye uli Ikulu khu Viosi. Vamuvolelanga muhonyinywi!'' Yakhola ario vuli lwosi Pahulu namulechela.

Lukhumalishitsa litukhu lilala mukhana murukwa yaranga khulanjiltsa, Pahulu niyishevukha navolela lidimoni liali muye, ''Mu lira lia Yesu, rula muye.'' Lidimoni liarula muye heneyaho.

Vasatsa vene mukhana murukwa valeka muno! Vanyola vu vuchila lidimoni, mukhana murukwa shiyakhavolele vandu kalikholekha tawe. Kamenyinya vandu shivamuha khandi mang'ondo avavolele kalikholekha khuvo tawe.

Valala khu vene mukhana murukwa vavukula Pahulu na Sila nivavayila khu vwamihi vwa Varoma, vavakhuva nivavasiuva mu jela.

Vikalila Pahulu na Sila havundu hatinyu muno mu jela khali nivavoywa vilenje. Nikhali mu vutukhu hakari, vali nivimbanga tsinyimbo tsiu khwitsominya Nyasaye.

Hatititi, khwali nende vuyoko vwi shivala khutechela! Miliango chiosi chi jela chikukha, ma minyololo chiali khu vavohe chiosi nichikwa.

Musikali wi jela yavukha, lwa yalola miliango chi jela chikushi, yali nuvuri! yakanakana yavaohe vosi vilusi yiyiri. (Yamenya vwimilili vwa Varoma vwakhamwiri nalakhuli vavohe viluKha.) Nikhali Pahulu yamulola nalanjilil, ''Lekha! Wakhisalilitsa tawe. Vosi khuli hanu.''

Musikali wi jela natechelanga yitsa khu Pahulu na Sila nareva, ''Nakhakhola ndina khulelo mbonyinywi?'' Pahulo yamukalushitsa, ''Suvila mu Yesu, Mwami, na yivi nende vandui vovo mulahonyinywa.'' Musikali wi jela yayila Pahulo na Sila ingo wewe niyochitsa makule kavo. Pahulo yilwatsa makhuva malayi ka Yesu khu vuli mundu wali munzu yomo.

Musikali wi jela nende vandu veve vosi vasuvila mu Yesu ma nivavatiswa. Malelo musikali wi jela naha Pahulo na Sila shiukhulia nivasangala halala.

Litukhu lialondakhu vimilili vi lidala valakhula Pahulo na Sila khurula mu jela ma nivavavolela varuli Filipi. Pahulo na Sila vachendelela Lidia na valina vandi ma nivarula mu lidalomo. Makhuva malayi khulondokhana khu Yesu katsililila khulanda, ma likanisa nilitsililila khukaliha.

Pahulo nende vakristayo vandi vachenda mu madala manyishi , nivilwatsa nu khwechitsa vandu makhuva malayi khulondokhana khu Yesu. Khandi vahandika tsibarwa tsinyishi tsiu khutsuva nu khwechitsa vasuvila vali mu makanisa. Tsibarwa tsindala tsiakholekha vitabu vi vanjeli.

Lukanu lwi Vanjeli khurula: Vikholwa 16: 11-40