Wa Alec

Sain ecelagcai bahin nue hedeanafa, dana aid mati bahin milgu bileinah. Hoage dumana meuqe bahin cumunancai ho mumudadeic, hoage hihiqana tetean bileinah. Etacub ho nue meuqe bahin meanfe, Ifan uqa wa alec ben bahiggu mil he unug qeb qeimeian hocon isdec mudeanah.

Odan hoqa, Ifan uqa Noacan wacu nieanah. Noa uqa ho tutu obec dana, uqa dana aidcai kobol meuqe bahig mudecia hoage gemacu bileanah. Ifan uqa wa alec suldeian isdec mumude bilean houqacan uqa Noa maudeanah. Uqa Noa uqa bot ben bahin hoil mudeian hocon maudeanah.

Ifan uqa Noa uqa bot houqau ecelag ho 140 mita ode mudeian, odeb babagalain uqau ho 23 mita, odeb ohis tec uqau ho 13.5 mita te mudeian maudeanah. Noa uqa bot houqa ho nagu mudeian, ode uqa batal iet ohaleb ohis teian, ode aben mati bahin agiadeian, ode qaqas hoil mudeian, ode, uqa wasali waian ho aba hoil ohonawec mudeian maudeanah. Bot houqagu esi Noa uqa himeculcai, odeb, eqaf filfil mil gude obecia hoagecai, hoage wa alec nieian hogu qei fadalebilac, hoage meu adi bilenigan.

Noa uqa Ifan madeanah iwe totodeanah. Uqa melahul iet hoagecai, hoage bot mudecun hi Ifan madadeanah iwe, hoage ode bahin mudeinah. Bot ho ben bahinag hocon, hoage mumudecian iar mati bahin nueanah. Noa uqa wa alec houqa soian ec ho, uqa dana aidcai dahia faleanah, ode, uqa hoage silail kobol ho uculeic, falide Ifancai sonigan hocon madadeanah. Odean hoqa, hoage uqau le houqacan qei wawa cefeinah.

Ifan uqa, Noa uqa himeculcai hoage eli lenigancai, eli eqaf hoage lenigancai, hoage eli am ihoc hagudenigan bahin madadeanah. Sain elcel ho unug ho saiadec hedec niean, Noa uqa dodocai, uqa aideccai, uqa melahul iet hoagecai, melahul hoage aidelacilcai, hoage bot ho iacul wanigan sain soa ec ho, Ifan uqa Noa maudeanah. Danacai aid ho unug gabandec ho 8 hoage bot ho iacul wainah.

Ifan uqa eqaf unug gude manafalcai, ufinocai, odan hai hoagefa odecet adi oadeafa, uqa hoage bot iacul waciafa sain wa aleian hogu hoage meu adi bilenigan hocon, uqa suladean Noacai wainah. Ifan uqa eqaf manafal 7, odan ufino hofa 7, odan eqaf hondeggu ho, hoage Ifan ihandec utecun ho ois ec niea. Uqa eqaf hondeg ho odeafa, uqa suladean bot iacul wainah. Sain hoage unug bot iacul wacianafa, Ifan uqacat adi aba meneanah.

Odean wa hananme neanah, wa nean ho odecet adi nene nieanah. Odan wa nean ho, 40 asilcai, 40 wi ho wa sadeccai qe, wa ode adi nene nieanah. Wa mil iaculdefa asisi fifie alebeanah. Odan, mil hegude elcel unug niean ho, unug wa oade taceanah, fohien ohis bahig hoagefa, odecet adi oade taceanah.

Elcel unug mil kakanecgu eac niein hoqa almemecian, dana aid, odan eqaf filfil hoagecai, hoage bot iacul bilein hoqa, hoage qei almeinah. Bot qa wa ohis atae obeanah, ode uqa elcel unug iacul niein hoage, wa le almebilacan esuladean meu bileinah.

Wa nene niean ho hedeanafa, bot hoqa wa ohis atae tatawean nuean lagel 5 oanah. Odan sain hogu, wa sananme side noanah. Odan sain hoil, bot uqa fohien hoil taitac bileanah. Odan hoqa, mil unug qa, wa odecet adi otae nieanah. Odean, ehele lagel iet hedeanafa, fohien gatina ho amasacme nuadeinah.

Ehele 40 del hedeanafa, Noa uqa wa side hedeanahaf ec ho, uqa feian hocon, uqa hai hoil weni alog ecia houqa suldeanah. Alog uqa mil kakanec feigaeafa, uqa halupapawe nunue fafaheceanah. Odan hoqa, uqa mil kakanec hoil qei feanah.

Ho hedeanafa, Noa uqa hai hoil ufudid ecia houqa suldeanah. Odan hoqa, uqafa mil kakanec hoil qei qeledeanah. Ode hocon, uqa ehele Noacai faheanah. Odan ufu osahi nueanafa, Noa uqa ehele ufudid suldean nueanah. Odan ufudid uqa, uqa na weni oliw ecia houqa, leben hoil olohugu ocuteafa faheanah!

Noa uqa wa humude bilean ufu hoil ehele oanafa, uqa ufudid suldean nue ietdeanah odan sain hogu, ufudid uqa ul mude bileian aben fean hocon, uqa ehele qei faheanah. Wa qa wele side noanah.

Ufudid ho nuen ho ninean lagel elis hedeanafa, Ifan uqa Noa maudeanah, “Inacai, ina himenalcai, eqaf unug hoagecai, age qil bot culudeic alesocie. Ina himenalcai, ahinal ho mati bahin fulusdeciafa, hoage milgu ihoc wa nienigan." Hocon, uqa sihul uqadeucai, hoage bot iaculde alesoinah.

Sain Noa uqa bot iaculde alesoafa, uqa Ifan ihandecun alta mudeafa, uqa eqaf hondeggu ihandec mudecun, ho ois ec niea hogude leih oadeafa, uqa Ifan ihandec uteanah. Ifan uqa ihandec houqacan, uqa wacu meu nien, uqa Noa himeculcai eldec adeanah.

Ifan uqa madeanah, “Isa le madi qelqetica, isa dana aidcai hoage kobol meuqe bahin odenigan houqacan bahin isa gugufu bahin haun ehele mil qei bahin geldeminac, o, isa qei odemin wa alecgu mil he ifulifuldewan. Dana aid mel alcal gudecet, age silail ahulec bilenigan hofa, isa ho qei odeminac.”

Odeafa, Ifan uqa wal hahawan bahig mudean houqa ho, uqau le qel qetean houqacan dado houqa meanah. Sain unug wal hau ohis aleso niefe, Ifan uqa le qel qetec houqacan dahu soian, odedeb, adi dana aid uqadeu hoagefa dahia soian.

Ifan uqacan totqec louqec heqa: Gugqec 6 - 8 hogude.