Iesus Uqa Dana Hoil Siai Meuqecai Ho Meu Mumude, Uqa Aid Hoil Sagcai Hofa Meu Mudea
Del hoil, Iesus uqa ewel oc dana uqadeu hoagecai, hoage hatu Geresa dana aid bilecia hogu nuenigan hocon, hoage botgu tobe teciafa, hoage wa qalide houqa qeteic nahaicisai wainah.
Sain hoage wa qalidec houqa nahaicisai nue alewacianafa, dana hoil uqa siai meuqe deweu tean bileanahcai houqa, uqa guculecgu adi uqa Iesuscai soanah.
Dana houqa, uqa hihibanig ahulec, hocon in hoil uqa fale one mumude ahacdeb, uqa ehna bilewahu qe. Dana aid hoage dana houqa sengufa lebencai faci ho hibawociahancai, odahan hoqa, uqa gaid ode sen ho agoadehan.
Dana houqa, aben dana leladec felana niadecia ho gemacu uqa nieanah. Dana houqa gaid ode asil wicai, uqa isogoe euwewe nieanah. Uqa loto elcel hoil qei taqoanah, ode uqa gaid gaid ode adi, men nieadecia hogu uqa deweu ganac acago nieanah.
Odan sain dana houqa Iesuscai soafa, uqa haciou bahin Iesus amesacgucisai milgu no gatelac cefe bileanah. Iesus uqa siai meuqe ho maudeanah, “Dana ho deweu iaculde alesogec!”
Dana siai meuqecai houqa lelec ohisgu utaeanah, “Iesus, ina Ifan Ben Gagadi odec ahulec houqa melah, ina isacai elaci ogan? A ina ub isa deweni dain utenac!” Odean, Iesus uqa siai meuqe houqa ocolideanah, “Ina wenimin in?” Odan dana houqa, uqa walde maudeanah, “Isa wenimi ho Legion, elacin, ige ho mati bahin bileqa.” ("Legion " ec ho, Rom hoageu fan adec dana hogude tausen ganicif hoage am osahi osahi mudeciacai)
Odan siai meuqe hoage Iesus ninicdeinah, “A ina ige hatu hegude ub suligen aleso nuemunac!” Odan, aben hogu ho fo am hoil, hoage lolocis utuqanu hogu, hoage eli leleic nieinah, hocon siai meuqe hoage Iesus ninicdeinah, “A odeqeit, ina ige suligen, ige fo wawagu nocun!” Odan Iesus madeanah, “nueciec!”
Odan, siai meuqe hoage dana deweu gude alesociafa, hoage fo wawagu noinah. Fo hoage wa oc tutu qafulec tawean hogu, hoage guculecgu adi nonociafa, wa qalidec hogu wa iacul no wa le almeinah. Fo am houqa ho 2000 fo ode.
Sain fo ofadec dana aid hoage etacub ho alesoan ho feciafa, hoage taun ho iacul gucule nueciafa, Iesus uqa hoageugu ade odean fein houqacan, hoage dana aid unug madadeinah. Dana aid taun hogude hoage faheciafa, hoage dana siai meuqe hoage deweu tecian bileahan ho, uqa ehna kilieafa dae, loto elcel taqoafa, uqa dana deweu meu adi bileanah iwe bibilean feinah.
Dana aid hogude hoage ho feciafa, hoage asisi bahin cumunieciafa, hoage Iesus uqa hogude cucule nueian maudeinah. Hocon, Iesus uqa botgu teafa, uqa nueian hocon saiadeanah. Odan dana siai meuqe deweu tecian bileancai houqa, uqa Iesus totodeb obehian hocon, uqa Iesus ninicdeanah.
Odan hoqa, Iesus uqa dana ho maudeanah, “Qec, isau galeitec ho ina logu nuecafa, Ifan uqa inacan elcel unug ade mudeal houqacai, ode uqa adaha bahin inacan wacu qeal houqacan ho, ina fianal hoagecai, inau sihul hoage madadegan isdica.”
Odeanfe, dana houqa nueafa, uqa dana aid unug Iesus uqa, uqacan ade mudulean houqacan uqa hoage madadeanah. Dana aid unug, ini hoage uqau totqec houqa dahmein ho, hoage isdec acadean, ona atage nean dahme bileinah.
Iesus uqa haun ehelawe, uqa wa qalidec ho nahaicisai wanah. Sain uqa nue alewanafa, dana aid am ben bahin hoage eguleic uqa alildeinah, odeic, hoage tufulifuldedeic hoage uqa duculdeinah. Aid hoil uqa 12 iar uqa logac nenean ulumen ben cefe bilean houqa, uqa dana aid am ho gemacu obeanah. Aid houqa dokta hoage meumitenigan eafa, uqa men aci uqau ho unug bahin uqa dokta idatmadeanah. Odan ho, uqa meu hoil qei alesoanah, uqa meuqe bahin meanah.
Aid houqa, Iesus uqa dana aid sagcai hondeg mati bahin meu madean houqacan doafa, uqa isdeanah, “Isa duga, Gugufu bahin isa Iesus uqau loto elcel ho adi qutuadifig ho, isafa esi meumitec oigan!” Hocon, aid houqa Iesus gogodocgucisai beafa, uqa Iesus uqau loto qutuadeanah. Sain uqa loto ho qutuadedean bahin logac nean ho gatideanah.
Qei giec bahin, Iesus uqa gagadi odec uqau ho, uqau ulude wawan uqa deban doanah. Hocon, Iesus uqa waldeafa ocolieanah, “In isa qutuiteah?” Odan uqau ewel oc dana hoage waldeic maudeinah, “Dana aid mati bahinag he alilciseseic, gahalisecia ho fefegafa, ina elacicin ‘In isa qutuiteah ega?’”
Aid houqa ben bahin cumunieafa, uqa qelelece, uqa Iesus amuggu gatelac cefe bileanah. Odeafa, uqa ade odeafa uqa meu mudec oan houqacan, uqa Iesus maudeanah. Odan Iesus uqa aid ho maudeanah, “Inau wawin cefec houqa ina meu miseah. Ina wawin meugu nuecale.”
Ifan uqacan totqec louqec heqa: Metiu 8:28-34; 9:20-22; Mak 5:1-20; 5:24b-34; Luk8:26-39; 8:42b-48 hogude