Ifan Uqa Iosepcai, Iosep Uqau Sihul Ho, Uqa Esulade Besade Oadea
Iar mati bahin nueanafa, sain Iakob uqa toiameafa bileanahgu, uqa dana mel uqau idohunigleacai houqa weni Iosep, uqa nue otigul sipsip ofade niein hoage, uqa hoage iawade feadeian hocon suldulean nueanah.
Iosep otigul hoage Iosepun hoage gemana becgu alucal dodouleic, hoage uqa fecun ho uleinah, elacin, hoage mema ho, uqa Iosepun ho uqa wacu niec bahin, odan hoil qa, Iosep uqa esi ilo bile ofadeian ec ho, uqa bebelecgu feanah. Sain Iosep uqa fahe otigulcai alesoanafa, hoage uqa fale hibaweinah. Odeic hoage uqa sudulecian, begabeg abi dana idatmadec dana leih hoage idatmeinah.
Sain Iosep otigul hoage ehele masal qei nuecgu, hoage Iosep uqau loto benahiac ho uqa sicalumain o obeacai ho ociafa, hoage mecmec logacgu cumeinah. Odeciafa, hoage loto houqa mema ifadecian, mema uqa isdean ho, eqaf uih hoil Iosep qean almeanah ec ho doanah. Iakob uqa ben bahin wacu doan, uqa wawawi eanah.
Odan dana begabeg abi dana idatmeic oadeciafa, hoage nue suladeciacai hondeg, hoage Iosep ofale Isip nueinah. Isip hatu houqa ben bahin, odan uqa gagadi odeccai, odan uqa Nail wa ol hogu niea. Begabeg abi dana idadmeade nueic, hoage cusin suladeciacai dana hondeg hoage, Iosep o nueic gabman uqau abi dana hoil, uqa ehewanig acalac bilean houqaugu suldecian, uqa idadmeanah. Iosep uqa, uqau ilo dana houqau abi ho mude cusadeuteanah, odan Ifan uqa Iosep eldec uteanah.
Uqau ilo dana aidec uqa, Iosep uqa faliteb niefuecgu, uqa deweu meme ocolideanah. Odan hoqa, Iosep uqa hi odegu ho, uqa Ifan amuggu ub silail meminaceafa, uqa uleanah. Aid houqa gemac bean, uqa ulecgu Iosep umquleanah. Odan hoage Iosep faleic kalabusgu mudeinah. Sain Iosep uqa kalabusgu bilean hofa, uqa Ifan ou totodec bilean ho, uqa odecet adi bilean caiteanah, odan Ifan uqa Iosep eldec uteanah.
Iar elis nue hedeanafa, Iosep uqa deweu lecai qitigi, odean hoqa, uqa kalabusgu odecet bileanah. Wi hoil Farao, (Farao ec ho, Isip hoage King hoageu houqacan madeciacai). Odan Farao houqa, uqa bebelec elis fealean houqacan, uqa ben bahin isdec qeanah. Ini uqa isdec uteciacai hoage unug bahin, bebelec elis hoaleu gug ho qatanecun ho dalieinah.
Ifan uqa, Iosep uqa bebelec gug silidecun ho doc ihoc uteanah. Ode hocon, Farao uqa madeanfe, Iosep kalabus gude mehule uqacai ofale soinah. Iosep uqa bebelec elis hoaleu gug ho, uqa silide maudeanah, “Ifan uqa esi 7 iar iacul, uqa eli walmec asisi bahin lu adeian, odeb ho totodec houqa, 7 iar ahel nieian.”
Farao uqa Iosepun wacu aiean, uqa adi ihoc doc meucai ec doafa, uqa Isip hatu unug ageu hanuqec dana, uqa Farao bilea houqa totodec ho Iosep uqa ilo bile adeian ec abi ho uteanah!
Iosep uqa 7 iar ho iacul, uqa eli meu walme niean sain meu hogu, uqa dana aid hoage eli oadeic, am ben bahi haguadeic, hoage ud mebil bileian hocon madadeanah. Odan sain 7 iar ahel soanahgu, Iosep uqa eli ho suldean, hoage idadmein hocon dana aid hoage eli ihoc leleic bileinah.
Ahel ben meuqe ho, Isip hatu hogu adi qei nieanah, Keinan milgu Iakob uqa sihul uqadeucai bileinahgu hogufa nieanah.
Hocon, Iakob uqa melahul hanuqec gude hoage, uqa suladean eli idat menigan hocon Isip nueinah. Otig otig nuein hoage, sain eli idat menigan hocon, hoage Iosep amuggu tawein ho, hoage uqa Iosep ec ho qei doinah. Odan hoqa, uqa qa hoage doadeanah.
Iosep uqa, otigul dumana asacde ho, hoage uleinahaf ec ho uqa feian hocon, uqa hoage temade hedeafa, uqa hoage madadeanah, “Isa age otia Iosep! Age ub cumuniebilac. Sain age, isa begabeg abi dana bileigan sulitein houqa, age kobol meuqe ho muditenigan odeinah. Odan hoqa, Ifan uqa kobol meuqe houqa, uqa odean meu bahig ho alesoah! Age faheic Isip bibilebil, Isa agecai, ageu sihulcai ofadeigan.”
Sain Iosep otigul hoage ehelawe masal nueciafa, hoage Iosep uqa ena eac bilea ec ho mema maudecianafa, uqa ben bahig elubaeanah.
Iakob uqa toia meanah, odean hoqa, uqa himecul unugcai, hoage Isip nueic hoage unug hogu bileinah. Iakob uqa qei almec ninie, uqa melahul unugcai, uqa hoage osahi osahi eldec adeanah.
Ifan uqa le qel qete gagadi mudec uqadeu Abraham uteancai ho, Aisak uqaugu wanah, odan hogude Iakob uqaugu wanah, odean hogude qa, Iakob melahul 12 hoage himenacilcai hoageugu wanah. Dana mel 12 hoageu gude sihul alesoin hoage ho, Israel uqau masa gati filfil 12 hoage alesoinah.
Ifan uqacan totqec louqec heqa: Gugqec 37-50 hogude