Pol Uqa Kristen Alesoa

Saul uqa dana haun, odan uqa ho dana ini Stiwen qecian almeancai hoageu loto ecelag dewa lahude tace obeciacai ho, uqa qafane tawe houqa ofde adeanah. Odan uqa Iesusun qei wacu cefean hocon uqa ini wawa cefeincai ho aqadede itatac adeanah. Uqa Ierusalem hogu, uqa danacai, aidcai, ilam falede kalabusgu meadeian hocon, uqa lo osahi osahigu unug uqa ciciawe obeanah. Ihanec ilo dana uqa, Saul uqa ois uqa taun ben Damaskus hogu nueafa, uqa Kristen hondeg taun hogude ho faladeafa, uqa mehade ehele Ierusalem faheian ec ho oisduleanah.

Saul uqa Damaskus nueian hocon nunuean, hau ohisde fulacdec ben hoil watalude uqa alildeanah, odan uqa batage ne milgu nieanah. Saul uqa itacub hoil uqa ede madean dahmeanah, “Saul! Saul! Ina elacicin isa qiqitec labiteca?” Odan Saul uqa ocolieanah, “Ilo dana isau, ina in?” Iesus uqa walde maudeanah, ‘Isa Iesus. Ina isa qiqite labiteca!”

Sain Saul uqa aie tawean ho, uqa amug ho afaqean hocon meciewahuqe. Uqa fiacul hoage, uqa gimdeic mehuleic Damaskus wainah. Saul uqa del iet ho uqa eli, o, wa hoil leccaiqe uqa gaul odecet nieanah.

Damaskus hogu, ewel oc dana hoil weni Ananias ecia uqa bileanah. Ifan uqa Ananias maudeanah, “Ina lo Saul niea hogu nuece. Ina leben ho uqa deweu taitac menafa, odeb, uqa esi haun ehelawe mecieian.” Odan hoqa, Ananias uqa madeanah, “Ilo dana isau, isa dana heqa wawa cefec hondeg adegucisai uqa hoage aqeqe itatac adeal houqacan ho isa dugah.” Ifan uqa le wadacde maudeanah, “Nuece! Isa uqa Iuda sihul gudecai, dana aid am filfil hoil gudecai, uqa hoageugu uqa isa wenimi houqa madadeian hocon gawicah. Uqa esi isa wenimicin bahin elcel mati bahingu dain efeian.”

Hocon Ananias uqa Saulcai nueafa, uqa leben Saul deweu taitacmeme uqa madeanah, “Iesus, uqa ina hegu fahegan fafahecan uqa inacai amasac alesoal ho, uqa isa inacai sulitean inacai fahicah, odeb haciou ina ehele meciegan, odec ina Kis Gun uqa inacai ambeb bilegan.” Odan qei giec bahin Saul uqa ehelawe mecieanah, odan Ananias uqa Saul wa loudec uteanah. Odean Saul uqa eli leih leanafa, uqa huen ho ehele soanah.

Odean, Saul uqa sain qei cusdeanah, uqa hananme Iuda hondeg Damaskus bilein hoage meu le madadede madeanah, “Iesus uqa ho Ifan Melah!” Iuda hoage dana houqa, uqa ini wawa cefein hondeg ho uqa hoage aqadeb qeimenigan hocon odeancai houqa, qil uqafa ho Iesusun wacu cefean hocon hoage ona atage neanah.

Del mati bahin nueanafa, Iuda hoage Saul qebil almeian hocon le ilameian. Hoage dana leih suladecian, uqa qebil almeian hocon, hoage nueic taun ben houqa aba wacgu mecieic taweinah. Odan hoqa, Saul uqa hoageu le ilamec houqacan dahmeanah, odan uqau fiacul hoage uqa esuldulecian, uqa lokume mehelade cum nueanah.Sain hoil wi, hoage uqa gamgu ho bibilean, hoage taun ben houqa waubdec gelgel cefec niea houqa tebadeic, o mudeic fafalecian no nueanah. Sain Saul uqa Damaskus hogude mehelade cumuneafa, uqa qei uleanah, uqa odecet adi ode Iesusun le ho sae obeanah.

Saul uqa Iesus uqau ewel oc dana hoage feadeian hocon uqa Ierusalem nueanah. Odan hoqa, hoage uqacan cumunieinah. Odean dana hoil uqa wacu cefeccai uqa weni Banabas, uqa Saul mehule aposel hoagecai nueafa, uqa Saul uqa adegu Damaskus hogu cumuniec qitigi uqa le saean houqacan uqa hoage madadeanah. Ho odeanafa ewel oc dana hoage hogu ois eic Saul oinah.

Wawa cefec hondeg Ierusalem hogu aqe itatacadec ho niean hogu hoage bisolade nueadein ho leih qa acanamcai nueic taun ben Antiok hogu alewainah. Odeic hoage Iesusun le saienah. Antiokde dana aid hoage matibahin ho Iudade qe, odan hoqa, sain ho hahawan bahin hoageu gude maticai bahin hoagefa wawa cefeinah. Banabascai Saul hoale wawa cefec qilde heage Iesusun gehcai iwaladedehi, tamanec houqa gagadi mudehian hocon hogu nuehianah. Antiok hogu ho ini Iesusun wawa cefec bilein hoagecen ho, “Kristen” ec madec houqa, hahawan bahin hogu asac hananmeic madeinah.

Del hoil, sain Antiokde Kristen hoage ud bibileic inondedecian, Kis Gun uqa hoage madadeanah, “Banabascai Saul hoale isa abi hoale odehian houqacan isa oalin ho odeihian hocon oaleic umuti fil mealecie.” Hocon Antiokde wawa cefec tamanec houqa Banabascai Saul inoncaleleic, hoage lebena hoale taitanalai meinah. Odeciafa, hoage hoale masa odacat mati bahin hogu, Iesusun meu le houqa saehian hocon sulalecian hoale nuehianah. Banabascai Saul hoale dana aid am filfil gude hoage iwaladehian, dana aid mati bahin hoage Iesusun wawa cefeinah.

Ifan uqacan totqec louqec heqa: Aposel 8:3; 9:1-31; 11:19 -26; 13:1-3 hogude