Wawa Cefec Tamanec Houqa Hananmea
Iesus uqa ehelawe Ifan uqau meu ulgu nueanafa, ewel oc dana uqadeu hoage qa, uqa Iesus madadeanah iwe, hoage Ierusalem hogu nag bahin ode nieinah. Wawa cefec hondeg hogude hoage gaid ode inondenigan so gabamdeic eguleinah.
Iar unug, Pasowacan isdec del hogude bean del 50 oa hogu ho, Iuda hoageu del ben hoil Pentikos ecia houqacan isdedeic elubaec sain houqa soacai. Pentikos del houqa ho Iuda dana aid hoage wit eli houqa walmeanafa agocian wa houqacan hoage isdedeic elubaeciahec. Iuda hondeg hatu filfilgu bileadeciacai hoage Ierusalem hogu adi gabamdeic, hoage Pentikos houqacan isdedeic elubaec hoageu ho mudadenigan hocon fahadeinah. Odan iar Iesus almeanahgu hogu qa, Iesus uqa ehelawe Ifan uqau meu ulgu nueanafa, ufu osahi ode hedeanafa Pentikos houqa soanah.
Sain wawa cefec hoage unug osahigu adi gabamdecianafa, qei giec bahin lo hoage bileinahgu ho, wasali gagadi bahin soan udahu wa iwe hondeg houqa lo hogu unug ihoc wanah. Odean etacub hoil lai iec belinag iwe houqa alade soic, wawa cefec hoage unug gatina ohis haluhaleic taweinah. Odan hoage unug Kis Gun uqau gagadi odec ho hoage oade tacean, hoage hanameic odacat ageu legu hoage le madeinah.
Sain Ierusalemde dana aid hoage udahu houqa dahmeciafa, dana aid hoage elaci alesoso odea ec ho fecunceciafa hoage fahadeinah. Sain dana aid hoage, wawa cefec hoage Ifan uqa abi benben odean alesoan houqacan, hoage amasac qasale mamadecian dahmadeciafa hoage ona atage neanah, elacin, hoage elcel houqacan ho le ageucat hogu madadedecian dahmadeinah.
Dana aid leih hoage qa, Iesus uqau ewel oc dana hoage wa lecian iloma ifuldeah ec le ho um aqeinah. Odan hoqa, Pita uqa aie taweafa madadeanah, “Isa dahmitecie! Dana heage qei wa kat lecian iloma ifuldeah! Etacub heuqa Ifan uqau le ahun madec dana weni Ioel, uqa le ahun madeanahgu Ifan uqa le madeanah, 'sain qeimec nieiangu hogu, isa esi Kis isau houqa felademin uqa esi abi odeian' ec madean ho, he houqa ihoc mudec ho alesoa.'‘
“Israelde dana aid age, Iesus uqa ho dana uqa Ifan uqau gagadi odecgu uqa dado gagadi odec ahulec, odan mecidec meubahin wawa aieanahcai ho, uqa ho mudadean alesocian age ho mecideinahcai hocon age ho docia. Odan hoqa, agecen bahin uqa na babalecgu qecian uqa almeanah.”
“Gugufu Iesus uqa almeanah, odeanqa, Ifan uqa Iesus almec gude tulidean aieanah. Ho odeanahgu hogu, le ahun ede madec niea, 'Ifan ina esi qei inau Gun Bahin houqa uluden uqa felgu moliewan’ ec le ahun houqa ho ihoc mudeanah. Odan ige gugufu bahin Ifan uqa Iesus almean ho tulidean ehelawe aie eac bilea ec ho, ige amigegu feun hocon qasale madeqa.”
“Ifan uqa qil Iesus ohisdean teahan, uqa Memige Ifan uqau leben meulifain houqa ho uqa bilea. Odan Iesus uqa esi Kis Gun suldeian ec uqa le made qel qeteanah iwe, uqa Kis Gun suldeah. Age qil elcel he fefeadeic dahmeadecia heuqa ho, Kis Gun uqa he odedean elcel he alesoadecia.”
“Age dana Iesus houqa age uqa na babalecgu qecian almeanah. Oda hoqa, age he gugufu bahin ec docie, Ifan uqa odean, Iesus uqa adi ho uqa Ilo Benahiac igeu bilea, odan uqacat adi ho Mesaia!”
Dana aid Pita dahmulein hoagen Pita uqa elcel houqacan le madean houqa odean, hoage ben bahin ode wawa aieanah. Ode hocon hoage Pita uqacai, ewel oc dana leih hoage ocoliadeinah, “Otigeil, ige elaci ade hoil odecun?”
Odan Pita uqa hoage madadeanah, “Age unug bahin, age qisolmec kobol ho cuculeic wawa falideciafa, Iesus Kristus wenigu age wa loadec onigan, age ho odebil Ifan uqa esi ageu qisolmec ho agaseadeian. Odede uqa esi idacdec igec Kis Gun uqau gude soa hofa esi age adeian.
3,000 dana aid ode, hoage Pita uqa le madean houqacan hoage wawa cefeciafa, hoage Iesus uqau ewel oc dana aid alesoinah. Hoage wa loadec ociafa, hoage wawa cefec osahi hoageu tamanec Ierusalemde hoagecai bileinah.
Ewel oc dana aid hoage gaid ode aposel hoage iwaladein ho dahmemeic, hoage aposelcai so ilam gabamdeic sain nag bahin ode hoagecai ilam bibileic, eli ilam leleic, hoagenanan hoage hoil inondulean inondulean einah. Hoage ilam gabamdeic Ifan weni ohisdec houqacan ho hoage wawa elubaeanah, odedeic hoage elcel hoageu unug ho hoage gemacu hoilcai ehawe utean uteanceinah. Dana aid unug hoagecen ho meu bahig odecia ec doadeinah. Del unug gaid ode dana aid matibahin soic Iesusun wawa cefeinah.
Ifan uqacan totqec louqec heqa: Aposel 2 hogude