Stiwencai Filip
Tamanec wawa cefec osahi hahawan bahin alesoan houqau ilo dana bilein hoageu gude, dana hoil weni Stiwen decia uqa bileanah. Dana aid hoage dana houqa ho meu bahin ec ho madeinah. Odan Kis Gun uqa, dana houqacai bilean hocon uqau doc isdec ho meu meu adi oanah. Stiwen uqa dado gagadi odeccai mati bahig mudadean aladesoinah. Ode uqa dana aid hoage esi ihoc Iesusun wawa cefenigan ho hi niea ec ho, uqa qohode mecidede uqa madadeanah.
Del hoil, sain Stiwen uqa dana aid hoage Iesusun iwaladedean, Iudade leih hoage Iesusun qei wawa cefeciacai hoage hanameic Stiwencai kokieinah. Hoage Stiwenun geman asisi bahin beanafa, hoage Stiwen deweuan ulec le mati bahin Iuda ageu ufu fec hanuqec ilo dana hoage madadeinah. Hoage madeinah, “Ige dana houqa uqa Mosescai Ifan hoalecen, uqa elcel meuqe hondegan madalelean ige dahmuleqah!” Hocon ufu fec hanuqec ilo dana hoage Stiwen faleciafa, hoage mehuleic ihanec ilo danacai, ufu fec hanuqec ilo dana odacat hoageugu mehuleic wainah, odean hogu odacat hoagefa soic Stiwenun ulec le hondeg mati bahin ehelawe meadeinah.
Odan ihanec ilo dana uqa Stiwen ocolideanah, “Le he madadecial he gugufucuf?” Stiwen uqa le wadacde madeanahgu ho, uqa Abraham uqau sain gude bean Iesus uqau saingu hofa, Ifan uqa elcel benben bahin odean aladesoinah. Odan hoqa, adecen Ifan uqau dana aid hoage qa edecet adi hoage Ifan uqau le ho, hoage qei totodeic odeinah ec ho uqa hoageu isdec batawe adecgu uqa le ho madenah. Odeafa uqa madeanah, “Dana aid age ho wawa menec bahin bilecia, odeic Ifan facalisanig bilecun ho uleciacai, age ahiacilcai dogiacil hoage Ifan sibededeic uqau le ahun madec dana aqadecian almeinah iwe, odecet bahinag age gaid ode Kis Gun sibedeciacai. Oda hoqa, age qa etacub meuqe bahin, etacub ahialcai dogiacil odein houqa hogimdec age odeinah. Age qa Mesaiah qecian almeanah!”
Sain ufu fec ilo dana hoage le houqa dahmeciafa, hoage gemana asisi bahin bean, hoage dahia afaqeqeic benben utatadieinah. Hoage Stiwen fale eceleic taun ben houqa uludeic sibelu alesociafa, uqa qebil almeian hocon hoage men tahuleic qeinah.
Sain Stiwen uqa almeian odede uqa utaeanah, “Iesus ina isau Kis oge.” Odede uqa batage no gatelac cefe bileafa uqa ehele utaeanah, “Ilo isau, ina heageu silail heuqacan dahin eleale.” Odede uqa almeanah.
Odan dana haun hoil uqa weni Saul, uqa dana aid hoage ois Stiwen qecian almea ec, wacu ode niean hocon, uqa hoageu loto ecelag hoage dewa ohis laho obeciacai houqa, uqa qafane tawe ofdeadedean hoage men tahuleic Stiwen qeinah. Del hogu Ierusalemde dana aid mati bahin hoage hananmeic, ini hoage Iesus uqau doc ho totodein hondeg ho aqeic itatac adecianfe, Iesusun wawa cefein hondeg mati bahin hoage cumbisoladeic masa odacatgu nueadeinah. Odan hoqa, hoage ode odadecian fefeciafa hoage qei uleinah, hoage nueic masa masa obeinahgu hogu ho, hoage Iesusun le totqeqeic obeinah.
Iesus uqau ewel oc dana weni Filip, uqafa Iesusun wawa cefec odacatcai hoage aqeqeic itatac adeinah sain hogu, uqa Ierusalemde cumbisole nueanah. Uqa Samaria hogu nueafa, uqa Iesusun le totqean, dana aid mati bahin hoage hogu besadec oinah. Del hoil, Ifan uqau engel hoil, uqa Filip uqa desetgu hi niadecia hogu uqa hi hoil totode nueian hocon maudeanah. Odan sain uqa hi ho totode ocobe nueanahgu, Filip uqa Itiopia hatu gude gabman uqau dana ben wenicai hoil, uqa karis uqaugu bibile uqa fafahean mecideanah. Odan Kis Gun uqa Filip uqa dana houqacai wafa, uqa le maudeian hocon maudeanah.
Sain Filip uqa karis ho utuqanu wanahgu, uqa Itiopiade houqa Ifan uqau le ahun madec dana weni Aisaia le louqean houqa sasaniean dahmuleanah. Dana houqa le ede sanieanah, “Hoage uqa sipsip haun hoil qebil almeian mehuleic nuecia iwe, odan sipsip haun houqa kiliqitigi niea iwe uqafa le hoil qei madeanah. Hoage uqa asisi bahin qeqeic, hoage uqacan qei doinah. Hoage uqa ub milgu eac bilewan eciafa uqa qecian almeanah.”
Filip uqa Itiopiade ho ocolideanah, “Ina etacub sasanie odeca houqau gug ho dogauf?” Itiopiade houqa walde madeanah, “Qe, isa le heuqau gug ho qei duga. In hoil uqa le heuqau gug ho silide maitebfe ho, isa gug uqau ho doigan. A ina ois, so isa emeni bilece. Aisaia uqa dodocon le louqeanah o, uqa dana hoilun dodo le louqeanah?”
Aisaia uqa Iesusun dodo uqa le ho louqeanah ec ho, Filip uqa le gug ho silide Itiopiade ho maudeanah. Filip uqa Ifan uqau le odacat niadecia hogufa, uqa Iesusun meu le houqa dana Itiopiade ho totquleanah.
Sain Filipcai Itiopiade hoale ode nue nuehiafa, hoale wa nieanahgu hogu alesohianah. Odan Itiopiade uqa madeanah, “Fege! Wa he niea hoca! Isa ihocuf wa loitec oigan?” Odede uqa karis falec dana houqa karis faleb taweian hocon maudeanah.
Hocon hoale wagu nohiafa, Filip uqa Itiopiade ho wa loudec uteanah. Sain hoale wa iaculde alebehianafa, Kis Gun uqa Filip ququlubde ofale aben hoilgu nueanafa, Filip uqa hogu uqa odecet adi ode dana aid Iesusun totaqeanah.
Itiopiade houqa, uqa masa uqaugu nueian totomude nueanah iwe ho, uqa odecet adi uqa nueanah. Uqa Iesusun doan hocon, uqa wacu elubaecgu nueanah.
Ifan uqacan totqec louqec heqa: Aposel 6:8-8:5; 8:26-40 hogude