Ifan Uqa Mesaiacan Le Qel Qetea

Gugqecgu bahinag, Ifan uqa Mesaia suldeian hocon isdec mudeanah. Mesaiacan le qel qetec houqa hanuqecgu, Adamcai Ewa hoaleugu soanah. Ewa uqau sihul gude hoage esi mel hoil basenigan, odeb uqa esi man gati lacude nanasaleian. Man Ewa iqaqulqulean houqa ho Satan. Mesaiacan le made qel qetec houqau gug ho, Mesaia uqa esi Satan uqau gagadi odec ho qitigi mudebcaiteian.

Ifan uqa, Abraham uqacangu adi, dana aid am filfil mil gude hoage esi eldec onigan ec ho, uqa Abraham le maude qel qeteanah. Sain hoil esi soian niea hogu, sain Mesaia uqa sobafa, hogu qa eldec houqa esi ihoc mudec nieian. Uqa esi dana aid am filfil mil gude hoage besadec onigan hi houqa eteg mudeadeian.

Ifan uqa esi, uqau le ahun madec dana hoil Moses iwecet esi alesoian ec ho, uqa Moses le maude qel qeteanah.

Ifan uqa Deiwit uqau sihul hogude hoil esi king alesoafa, uqa esi Ifan uqau dana aid hoageu ilo bileadede, uqa gaidgaidun ofadeian ec ho, uqa King Deiwit le maude qel qeteanah. Houqau gug ho, Mesaia uqa esi Deiwit uqau sihul gude alesoian.

Ifan uqa esi Le Qel Qetec Qildec mudeian ec ho, uqa le ahun madec dana Ieremaia le utean madeanh. Oda hoqa, le qel qetec houqa ho, uqa Israel hoagecai Sinai fohien hogu mudean ho iwe qe. Le Qel Qetec Qildec hogu qa, Ifan uqa esi dana aid wawagu, uqa nun le uqau houqa louqeadeian, odeb, dana aid hoage dodo esi hoage Ifan doudenigan, ode hoage esi uqau dana aidcai bileutenigan, odeb, Ifan uqa esi hoageu silail ho agaseadeian. Mesaia uqa esi Le Qel Qetec Qildec ho, uqa gugqeian.

Ifan uqau le ahun madec dana hoage, Mesaiah uqa ho esi, Ifan uqau le ahun made dana bileian, uqa esi ihanec dana bileian, ode uqa esi king bileian ec hofa madeinah. Ifan uqau le ahun madec dana houqa ho, uqa Ifan uqau gude le oafa, uqa nue Ifan uqau le houqa dana aid madadeacai. Mesaiah Ifan uqa esi suldeian ec le made qel qeteancai houqa, uqa esi Ifan uqau le ahun madec dana tutucun hocai, gugufucun houqa madec dana bileian.

Israelde ihanec dana hoage ho, dana aid ageu silailun dana aid hoage qan bi obilac hocon, hoage ecedeweic Ifan ihandec uteinah. Ihanec dana hoage ho, dana aidcai hoagecen memeic, hoage inondec hofa Ifan inonduleinah. Mesaiah uqa dodo qa, uqa esi deweu feladeb qebil almeian hogu ho, uqa Ifan ihandec tutucuncai, gugufucun ho uteian. Hocon uqa esi ihanec ilo dana tutucuncai, gugufucun meubahin bileian.

Dana hoil uqa dana aid hatu uqaugude hoageu ilo bibile ofadede, uqa hoage gehimadeacai houqa ho uqa king ec madecia. Mesaiah uqa ho itotom obec dana, ode uqa tutucuncai, gugufucun meubahin bileian. Odeb uqa ahac Deiwit uqa king bileanahgu, king bat uqau hogu esi bileian. Uqa esi mil he unug bahin uqa ilo bibile, uqa gaid gaidun ofdeian, ode uqa esi gugufucungu gegehime, uqa isdec tutucungu le made gagadi mudeian.

Ifan uqau le ahun madec dana hoage, elcel mati bahingu Mesaiahcan isdedeic madeinah. Ifan uqau le ahun madec dana weni Malakai, uqa Mesaiah qei soc ninieab, Ifan uqau le ahun madec dana wenicai hoil esi soian ec madeanah. Ifan uqau le ahun madec dana weni Aisaia, uqa aid hoil uqa dana hoilcai qei niec, uqa esi Mesaiah baseian ec ho le ahun madeanah. Ifan uqau le ahun madec dana weni Maika, uqa Mesaiah qa esi Betlehem taun hogu alesoian ec madeanah.

Le ahun madec dana weni Aisaia, uqa Mesaiah uqa esi Galili hogu dana aid walolomacai bileciacai hoage gemacu bileian ec madeanah. Odeb, ini hoage gihacadecgu hoil uqau begabeg abi oic bileciacai hoage uqa besadeb hoage meu bilec onigan, odeb, ini kalabusgu bileciacai hoage, uqa hoage besadeb aleso nuenigan. Uqa esi etacub houqacan, uqa le amasac qasale madeian ec madeanah. Aisaia uqa, Mesaiah uqa esi dana aid sagcai, le dahmewahu qe hoagecai, qei meciecia hoagecai, qei le madecia hoagecai, odan qei obeciacai, hondeg ho unug, uqa esi meu madeian ec, uqa le hofa madenah.

Le ahun madec dana Aisaia uqa, Mesaiah uqa esi le gugcai qe, gaul bahin gegehildedeic sibedenigan ec le ahun hofa madeanah. Le ahun madec dana odacat hoage qa, ini Mesaiah qebil almeian hoage esi, uqau loto elcel ho in oian ho fenigan hocon, hoage esi elicelec hoil, laki kat elicelec iwe hondeg elicelcenigan ec le ahun ho madeinah. Odeb, uqau fialic hoil uqa esi uqa cuculude uqa walde, uqa ad lebenagu meian ec le ahun hoil hofa madeinah. Le ahun madec dana weni Sakarias, uqa Mesaiah uqau fialic houqa, uqa Mesaiah cuculude walde uqa ad lebenagu meian houqacan amug oc ho, uqa 30 silwa men acigu idat mulenigan ec madeanah.

Le ahun madec dana hoage, Mesaiah uqa esi ade almeian houqacan hofa madeinah. Aisaia uqa le ahun madean houqa ho, dana aid hoage esi Mesaiah ifole qeqeic, uqa igaudedeic, uqa wakidenigan ec madeanah. Hoage esi, uqa elaci meuqe hoil qei odeiancai ho, hoage gaul bahin etacub acicaigu, uqa deweu gataweic giloloc mudenigan. Odeb, uqa esi ulumen ben bahin efefe, uqa dain ben bahin oafa, uqa almeian ec madeanah.

Le ahun madec dana hoage Mesaiah uqa esi meubahin itomtom adi obec dana, uqa silail qitigi bileian ec hofa madeinah. Mesaiah uqa almeian houqa ho, uqa dana aid odacat hoageu qisolmec houqacan, uqa qan bi houqa uqa oian. Uqa qan bi ho oian houqa ho, Ifancai dana aid hoage gemacu tanawadec houqa osobafa, hoage wawa elecgu meu adi bilenigan. Gug heuqacan, Ifan uqau isdec niean ho totodec, Mesaiah qecian qeimeanah.

Le ahun madec dana hoage, Mesaiah uqa esi almebafa, Ifan uqa esi tulideb uqa almec gude ehelawe aie eac bileian ec, le ahun hofa madecian nieanah. Mesaiah uqa almeafa, uqa almec gude ehelawe aie eac bileian hogu ho, Ifan uqa dana aid silailcai hoage besade oadeian hocon, uqa isdec ho ilamean niean houqa ihoc mudeian, ode uqa Le Made Qel Qetec Qildec houqa gugqeian.

Ifan uqa Mesaiah soian houqacan, uqa elcel mati bahingu uqa le ahun madec dana hoage ifacadeanah. Odan hoqa, le ahun madec dana hoageu sain hogu, Mesaiah uqa qei alesoanah. Le ahun made he unug niean fahe bean, le ahun madec ho unug qeimeanafa, hogude 400 iar ho gaul nueanah. Sain utecgu bahin, Ifan uqa esi Mesaiah suldeb milgu soian nieanah.

Ifan uqacan totqec louqec heqa: Gugqec 3:15;12:1-3; Nun 18:15; 2 Samuel 7; Ieremaia 31; Aisaia 59:16; Daniel 7; Malakai 4:5; Maika 5: 2; Aisaia 9: 1-7; 35:3-5; 61; 53; Seg Buk 22:18; 35:19; 69:4; 41:9; Sakaraia 11: 12-13; Aisaia 50:6; Seg 16:10-11 hogude