Ulumen Benben 10 Ho Efelufel Socia

Mosescai Aron hoale Faraocai nuehianah. Hoale nuehiafa madehianah, “Israel uqau Ifan ho ede madea, ‘Ina Isau dana aid felacaden nuecie!’” Farao uqa hoaleu le dahmecun culeanah. Uqa Israel hoage felacadeb nuecun ho cucule qa, uqa hoage abi gagadi bahin onigan esiadeanah.

Farao uqa Israelde dana aid felacadeb nuecun ulean ho, uqa odecet adi odeanfe, Ifan uqa ulumen benben meuqe bahin 10, ho efelufel suldean Isip hogu soanah. Ulumen benben efelufel ho soadein hogu, Ifan uqa Faraocai, Isip hoageu manecet filfil ho unug uqa hogimadec, uqa adi gagadi odecahulec ec ho ifaeanah.

Ifan uqa Nail wa ho odean log alesoanah. Odan hoqa, Farao uqa odecet adi, Israelde dana aid felacadeb nuecun ho uqa uleanah.

Ifan odecgu cog mati bahig aladesoic, Isip hatu ho unug ihoc wanah. Farao uqa, Moses uqa cog oade nueian hocon ninicdeanah. Odan hoqa, sain cog hoage unug alme hedein hofa, Farao uqa ilou tean ho teanah. Uqa Israelde dana aid felacadeb Isip ulude nuecun ho uleanah.

Hocon Ifan uqa ulumen benben efelufel soan hogu, uqau odecgu wetemalcai galilimu aladesoinah. Odeanafa, uqa ulumen ben meuqe hoil, uqa haun ehele uqau odecgu lagilag aladesoinah. Farao uqa madean Mosescai Aron hoale uqacai wahianafa, uqa hoale ulumen ben meuqe ho soan houqa ahacadebilfe, Israel dana aid hoage Isip ulude nuenigan ec madaleanah. Sain Moses uqa inondeanafa, Ifan uqa lagilag unug Isipde itatacadean nueadeinah. Odan hoqa, Farao uqa ilou tean hocon, uqa Israel dana aid qei falacadean, hoage besadec oinah.

Ho totodec, Ifan uqa odean, Isip hoageu eqaf manan abi ociacai hondeg ho unug bahin sag ociafa hoage almeinah. Odan hoqa, Farao uqa ilou tean hocon, uqa Israel hoage qei felacadean nueinah.

Odean, Ifan uqa, Moses uqa lai alaba oafa uqa Farao amesac gucisai ohis tahuleian maudeanah. Sain Moses uqa ho odeanafa, Isipde hoage dewenagu, ioma dain ahulec houqa aladesoanah, Odan hoqa, Israel dana aid hoageugu qa, ho qei alesoanah. Ifan uqa odean, Farao uqa ilou teanah, odan Farao uqa Israel hoage qei felacadean besadec oinah.

Ho hedeanafa, Ifan uqa odean, etacub hau bi iwe ho hau ohisde neme, Isip ageugu abi gude eli lec ho mati bahin qean kololeinah, odan in sibelu aleso obean hofa qean almeanah. Farao madean, Mosescai Aron hoale uqacai sohianafa uqa madaleanah, “Isa silail mudicah. Age ois nuenigan.” Odeanfe, Moses uqa inondean, etacub hau bi iwe hau ohisde nean houqa gatideanah.

Odan hoqa, Farao uqa ilou teanahgu ho, uqa haun ehele silail meanah. Uqa Israelde dana aid qei uladean hoage besadec oinah.

Hocon Ifan uqa odean, sis kimum hoage osahigu adi toqeic, am benben gu alade soic hoage Isip hatu ho unug tahafoic ihocwa nienah. Sis kimum hoage abi gude eli lec ho, hau bi iwe ho qei aqean kololeinahcai ho unug, hoage lecian qeimeanah.

Odean Ifan uqau odecgu, gagatu aleso del iet nieanah. Gagatu qidiec bahin niean hocon, Isip hoage lo hoageu ho qei uludeic alesoinah. Odan hoqa, Israel hoage nieciaugu hoqa, fuladec nieanah.

Ulumen benben meuqe 9 heqa so nue hedean hofa, Farao uqa Israel dana aid felacadeb hoage besadec ocun ho, uqa qei oiscadeanah. Farao uqa, Ifan uqau le madec ho qei doanfe, Ifan uqa ulumen benben meuqe osahi adi itqecgu suldeian hocon isdec mudeanah. Afagu heuqa esi Farao uqau isdec ho falideutep, uqa Israel dana aid felacadeb besade onigan.

Ifan uqacan totqec louqec heqa: Ehelawe Oc 5 - 10 hogude