Mema Wacu Qeccai Bilea Uqacan Le Totqec

Del hoil, Iesus uqa men aci tex gohilec dana hondegcai qisolmec dana odacat, hoage mati bahin uqa dahmulenigan hocon fahe egulein ho uqa hoage iwaladeanah.

Cufu fec ilo dana leih hoagefa hogu bilein ho, hoage fein ho Iesus uqa ini silailcai hoage ho, uqau fiacul iwe bahin meumeu adedean feciafa, hoage hananmeic hoagenanan Iesus ecewuleic sibelunig le madeinah. Hocon Iesus uqa le totqec heuqa madadeanah.

“Dana hoil uqa melah eliscai hoage bileinah. Dana ho melah anag houqa aie memeg maudeanah, ‘Mem, qil ina isau elcel mugumi bilea ho itegan!’ Hocon memalai uqau ehewanig houqa, uqa melah elis hoaleuan gemacu qataneafa, uqa hoaleu aleu docudoc ehawe aleanah.”

“Qeigiec, melah nacag houqa elcel uqadeu ho unug oade fale uqa acanamcai nueafa, uqa men aci uqau ho qisol mec kobol mumude bileanahgu hogu, uqa men aci ho unug hogu iwatudeanah.”

“Ho hedeanafa, mil melah nacag ho nue bileanahgu hogu ho ahel ben bahig hoil nieanah. Odan melah nacag houqa eli idatme lecun ho men aci qitigi bileanah. Hocon uqa fo eli adec abi houqa adi qeledeafa uqa abi houqa oanah. Uqa gihadecgu elubaeccai qe bileanah, ode uqa wendean fo ageu eli ho leian isdeanah."

“Nuean nuean, melah nacag houqa uqa dodo made doanah, ‘Isa he ade odica? Mem uqau abi dana unug hoage qa eli mati bahin lelecian, isa qa eli leccai qe gaul bilica. Isa ehelawe memcai nuicafa, isa elecef mem uqau abi dana alisoiganec ho isa mem ocolideigan.’”

“Hocon melah nacag houqa hananme memeg uqau lo totomudec ocobe nueanah. Sain uqa acanamcai hocot fafahean, memeg uqa melah feafa uqa melah waloloc leanah. Ode memeg uqa gucule nueafa, uqa melah aifeafa ou leanah.”

“Odan melah uqa madeanah, ‘Mem, isa wele Ifanun qei dudu nini ahuldi silail mudinah, odan inacanfa qei dudu nini ahuldi silail mudinah. Isa edaha ina melam meu ec bilewahucaiqe.’”

“Odan hoqa, memeg uqa abi dana uqau hoil maudeanah, ‘Ina haciou bahin nue loto elcel meu meu houqa oade fahecafa, isa melami taqulece! Odec ring hoil ogafa uqa leben gicgu meutece, odec uqa faci elis ho sende taqeutece. Odecafa, ina makau nacag deweu meubahin hoil qe ihilenafa, ige eli leleq elubaecun, elacin, isa melami uqa almeanah, odan hoqa, uqa qil qah bilea! Uqa isa ulite nue hedeanah, odan hoqa, qil uqa qeledicah!’”

“Hocon dana aid hoage hananmeic, hoage eli leleic elubaeinah. Qeigiec melah matude houqa, uqa abi abengu abi o niean ho, uqa logu faheanah. Uqa elcel ququdadecian udahuna alesosocian tabiliein ho udahu dahmeafa, uqa elaci ena odede odecia ec ho uqa isdec adeanah.”

“Sain melah matude houqa, uqa otig ho uqa logu faheal hocon eli leleic elubae odecia ec ho doafa, uqa gemag asisi beanafa, uqa lo faman wacun ho uleanah. Memeg uqa sibelu alesoafa, uqa melah houqa hoagecai faman wabafa hoage eli leleic elubaenigan hocon uqa esideanah. Odan hoqa, melah uqa uleanah.”

“Melah matude houqa memeg maudeanah, ‘Iar he unug beal he, isa inauan adi abi mudinah! Isa inau le hoil qei fedinah, odean hofa, ina mecmec alanig osahi adifa hoil qei itecan, isa fialialcai ige eli leleq elubaeunah. Oda hoqa, ina melam heqa, uqa inau men aci unug ho uqau qisolmec kobol hogu uqa iwatude hedeafa, uqa logu fahean ina makau nacag meubahin houqa qe ihileutecah.’”

“Odan memeg uqa walde maudeanah, melami, ina qa isacai gaid ode bilewa hocon elcel isau ho unug ho inau. Odeqeit, ige ois eli leleq ige elubaecun, elacin, ina otin uqa almeanah, odan hoqa qil uqa bah bilea! Uqa isa ulite nue hedeanah, odan hoqa, qil uqa qeledicah!’”

Ifan uqacan totqec louqec heqa: Luk 15:11- 32 hogude