Ehelawe Oc

Israelde hoage, Isip ulude nuenigan ben bahin elubaeinah. Hoage haun ehelawe begabeg abi dana aid qei bilecia. Hoage Mil hoage onigan ec Le Madec Qel Qetec niean hogu nuenigan nueinah. Israel hoage, Isipde hoageu gude elcel ocun eic ocoliadecianfe, Isipde hoage elcel adec adi adeinah, gol hofa, o, silwa hofa, odan elcel elianacai odacat hofa adeinah. Dana aid hatu hoil hoil gude, hoage Ifanun wawa cefein ho, sain Israel hoage Isip uludeinahgu, hoagefa Israelde hoagecai ilam nueinah.

Asil ho Ifan uqa tain hoil tutu adi qafulec taweanahgu ho, uqa hanuqe adedean nueinah, ode wi qa, tain tutu adi qafulec houqa lai iec alesoanah, ode ohis lulwa tatawe ieanah. Ifan uqa gaid ode hoagecai bibile, hoage nuein hogu, uqa hoage adacadedean hoage nueinah. Hoage uqa totodec adi totodeinah.

Odan del ganicif adi nueanafa, Farao uqa dana aid uqadeucai, hoage isdec hoageu ho ehele falidean, Israelde dana aid hoage, ehele hoageu begabeg abi dana aid bileadenigan hocon galeadeanah. Ifan uqa dana aid hoage uqa ho, Gugufu Ifan Osahi Adi, odeic, hoage donigan, uqa ho Iawe, odan uqa ho Faraocai, Farao uqau ulec manecet mati bahin hoage hogimadec, uqa gagadi odec ahulec bilea ec ho fenigan, gug houqacan, Ifan uqa odean Farao uqa isdec falidecun cucule uqa ilou teieanah.

Hocon, Farao uqa fan adec dana uqadeucai, hoage Israelde dana aid hoage ehele, hoageu begabeg abi dana aidcai bileadenigan hocon, hoage labadeic totoadeinah. Sain Israelde dana aid hoage, Isipde fan adec dana hoage fafaheician feadeciafa, hoage macas logcai houqa nahaicisai ninian, Farao uqau fan adec dana hoage qa, nahaicisai fahecian feadeciafa, hoage utuf soqa ec dociafa, hoage utaceic eweinah. “Ige elacicin Isipde ule faheqa, o ige qil almecun io!”

Moses uqa Israelde dana aid madadeanah, “Ub umuniebilac! Qil Ifan uqa agecen meme, uqa adeian, ode uqa age esuladeb hoage qei age aqebilac.” Odean Ifan uqa Moses maudeanah, “Dana aid hoage macas logcai ho totmudeic obenigan madadece.”

Odean, Ifan uqa tain tutu qafulec houqa gildean wa, Israeldecai, Isipde hoage gemacu tain houqa mean taweanah. Hocon, Isipde hoage Israelde qei feadeinah.

Ifan uqa, Moses uqa guqac ohisde leben dadagaweb, macas, wa qatane filigandeian hocon maudeanah. Moses ho odeanafa, Ifan uqa odean, wasali uqa macas gude wa houqa sundean, hanenaigucisai ho nunuean, meulifaingucisai hofa nueanah. Odean hocon, macas gemacu qa, obecun hi hoil alesoanah.

Israelde dana aid hoage, wa nanahai nanahai olcolde niniehian, hoage macas gemacu mil kakanecgu ocobe nueinah.

Odean, Ifan uqa tain houqa hi afaqec tawean ho, uqa ohisdean tetean, Isipde hoage Israelde dana aid cumbibisolecian feadeinah. Isipde hoage, Israelde ho labade nuenigan hocon isdec mudeinah.

Hocon hoage macas gemacu hi ho nieanahgu, hoage Israel dana aid totoadeic wainah. Odan hoqa, Ifan uqa odean, Isip hoage cucumunie ocobeic qa, hoage odeian hoageu Karis ho hadageinah. Hoage utaeinah, “Cum nuecie! Ifan uqa Israelde dana aid hoagecen meme, uqa fan mea!”

Israelde dana aid hoage unug meu adi, macas leteic nahaicisai wacianafa, Ifan uqa, Moses uqa haun ehele guqac ohisde leben dadagaweian maudeanah. Sain Moses uqa le totodec odeanafa, wa uqa Isipde fan adec dana hoage, lahulade oade taceafa ehele asac nieanah iwe aleso nieanah. Isipde fan adec dana hoage unug bahin wa leic almeinah.

Sain Israelde dana aid hoage, Isipde hoage almecian feadeciafa, hoage Ifan uqa adi ho uqa ihoc hoage ofadeian ec ho dodoic, hoage Moses uqa ho, uqa gugufu Ifan uqau le ahun madec dana ec ho doinah.

Odedeic Israel dana aid hoage ben bahin galececeic elubaeinah, elacin, Ifan uqa hoage almebilacancai, begabeg abi obilacancai, uqa hogude besade oadeanah. Ois, hoage etegsiec Ifan ewel outenigan. Israelde dana aid hoage qei begabeg bilebilac, hoage meu bilec qilde ho oin houqacan elubaecgucai, Ifan uqa hoage Isipde fan adec dana lebena gude uqa besade aodean houqacan hoage Ifan weni ohisdecgucai, hoage seg qilde hoageu mati bahin siladeinah.

Ifan uqa Israelde dana aid hoage, uqa meheladean houqacan iar osahi osahi, hoage gaid odec isde dodoic elubaeic eli lenigan madadeanah. Hoage ode odecgu ho, Ifan uqa adegu esulade Isipde ho aqean golodedecian, begabeg abi dana aidcai bilein hogude, uqa besade oadean fahein houqacan donigan. Hoage sipsip nacag, deweu meubahin adi hoil qecian almeanafa, hoage bret iscai qitigi namecia houqacai leleic, hoage etacub houqacan isde dodoic elubaeinah.

Ifan uqacan totqec louqec heqa: Hehelawe Oc 12:33-15:21 hogude