Ifan Moses Utadea

Iosep uqa alme hedeanafa, uqau sihul hondeg hoage unug Isip hogu bileinah. Odan hoagecai, hoageu gude sihul sihul alesoin ho, hoage Isip hogu odecet adi bibilecian, iar mati bahin nueanah. Odan, hoage himenacil ho mati bahin aladesoinah. Dana aid am hogude ho, hoage Israeld dana aid ec madadeinah.

100 iar matibahin ho nue hedeanafa, Israel sihul gude ho habiecian, hoage haniwadec gadac hoageu ho ben meanah. Odan Isipde dana aidcai hoage Iosepun wele dahiaceleanah. Odan, uqa hogu adegucisai uqa hoage esuladean houqacanafa, hoage dahiaceleanah. Hoage Israel sihul ho geh bahin alesoin houqacan, hoage cumunieinah. Hocon, Isip uqau Farao, uqa sain hogu ilo bibile, uqa Isip hatu ofdean ho, uqa madean Israel sihul gude hoage, Isip sihul gude hoageu begabeg abi dana aidcai alesoinah.

Isipde hoage Israelde ho cesiadedecian, Israelde hoage lo mati bahin cefadeinah. Odan, hoage taun benben hofa mudadeinah. Abi uqau ulumen benben houqa odean, hoageu bilec ho meuqe alesoanah. Odan hoqa, Ifan uqa hoage esulade oadede, uqa hoage eldec adeanah. Odan hoage odecet adi himenacil mati bahin basadeinah.

Farao uqa, Israelde hoage mel momodac mati bahin basadecian feadeafa, uqa dana aid uqadeu hoage Israelde hoageu dana mel momodac ho unug oadeic, hoage Nail wagu tahuladebil no almenigan hocon, uqa hoage madadeanah.

Israelde aid hoil, uqa dana mel momodac hoil baseanah. Aid houqa gemugcai hoale mel momodac ho, hoale lokumudecun ihoc hocon hoale uqa lokumudehianah.

Sain dana mel houqa memeg anagcai hoale, uqa lokumude siewahuqecin, hoale Isipde hoage uqa qebil almewan hocon, hoale uqa esuldule o mudebil bileian hocon, hoale gam wa ohis ataeian hondeggu noan tacehiafa, uqa Nail wa coc totodec educet iacul mudehian nieanah. Mel houqa ebinag matude ho, uqa mel ho deweugu elaci hoil alesop feian hocon, uqa mecie nieanah.

Odan, Farao atec hoil, uqa gam ho feafa, uqa gam ho iacul mecian noanah. Sain uqa mel nacag ho feafa, uqa mel nacag houqa, mel ho uqau bahin bileuteian hocon oanah. Ode uqa Israelde aid hoil, uqa mel nacag ho hu uteian abi uteanah. Odan aid houqa ho mel nacag ho anag bahin, odan ho uqa qei dodo ninie, uqa abi ho uteanah. Sain mel nacag houqa, uqa anag uqau hu lean ho uqa hu uleanahgu, aid houqa mel ho haun ehele Farao atec uteanah. Odan Farao atec uqa, mel houqa weni Moses qeanah.

Sain Moses uqa wele benme danameafa, del hoil Moses uqa Isipde hoil, uqa aie Israelde begabeg abi dana hoil qeqean feanah. Odeafa, Moses uqa uqau hondeg Israelde houqa temde esulde omudeian hocon odeanah.

Sain Moses uqa isdean ho, in hoil qei mecitea eafa, uqa Isipde houqa qean almeanafa, deweu ganac leleanah. Odan hoqa, itacub ena Moses uqa kobol ho odean ho, uqa feanah.

Odan sain Farao uqa, Moses kobol ho odean houqacan dahmeafa, uqa Moses qeb almeian hocon odeanah. Moses uqa Isipde cum bisole, uqa wadau mil igis adi kakanec niea hogu nueanah, odep hogu Farao uqau fan adec dana hoage, uqa qei qebil almewan, uqa meu adi bileian.

Moses uqa Isip ulude acanam bahi nueafa, uqa wadau mil igis adi kakanec niea hogu, uqa sipsip ofadec dana alesoanah. Uqa aid masa hogude oanafa, uqa dana mel elis basaleuteanah.

Del hoil, Moses uqa sipsip uqadeu ho ofade ninie, uqa gehu hoilgu lai iciean feanah. Odan hoqa, lai hoqa gehu ho qei iel. Moses uqa fecusadeigaeafa, uqa ocobe gehu ho totomude wanah. Sain uqa gehu hogu, lai ieanahgu ocobe utuqanu wawan, Ifan lelec madeanah, “Moses, ina faimen gude su ho hule bese oalece. Ina mil gun bilec hogu taweca.”

Odede, Ifan madeanah, “Isa dana aid isadeu hoage dain ben oic, hoage ulumen benben efefeic bilecia ho meciadicah. Isa ina sulisemin Faraocai nuegan, odeb, ina Israelde dana aid hoage, Isip hogu begabeg abi oic bilecia hogude, ina hoage besade oade alesogan. Isa esi Keinan mil houqa, hoage adeigan. Mil houqacan Isa Abraham, Aisak, odan Iakob adeigan ec le madi qel qetinah.”

Odan Moses uqa ocolieanah, “Ona dana aid hoage in uqa isa suliteal ho docun ec madecfeic ho, isa el le madeigan?” Odan Ifan madeanah, “ISA IN HO ISA. Madadece, ‘ISA uqa isa sulitean agecai fahicah.’ Odec madadece, 'Isa Iawe, isa age ahialacil Abraham, Aisak, odan Iakob, hoageu Ifan’ Isa wenimi heuqa ho gaid gaidun bileian."

Moses uqa cumuniean hocon, uqa Faraocai nuecun ho uleanah, elacin, uqa doan ho uqau le madec ho tutu qe, ode hocon, Ifan uqa Moses otig Aaron, uqa Moses esuldeian sulduleanah.Ifan uqa, Farao uqa esi Mosescai Aaron wele qei ois alewan, uqa esi ilou teian, houqacan uqa hoale docusadedehi nuehian hocon madaleanah.

Ifan uqacan totqec louqec heqa: Ehelawe Oc 1- 4 hogude