Dana Aid Hoage Adecgu Masa Hoageu Ulude Nueic Hoilgu Bileciafa Hoage Haun Ehelawe Fahecia

Israel uqau hatucai, Iuda uqau hatu hoale ilam Ifan amuggu silail mudehianah. Hoale Ifan uqa hoagecai Sinai fohien hogu le made qel qetean ho tebacumdeinah. Ifan uqa le ahun madec dana uqadeu hoage nueic, dana aid madadebil hoage ahuldeqa eic wawa falideciafa, hoage haun ehelawe Ifan binainig mudenigan hocon madadenigan suladeanah. Odan hoaqa, dana aid hoage le ho qei totode odeinah.

Hocon, Ifan uqa hatu elis hoale ilam qan bi fehian aleanah, hocon uqa hoaleu ad fialacil ho oiscadean hoage soic, hoale aqaleic ifulifulaleinah. Asiria hatu ben houqa gagadi odeccai odan hihibanig ahulec, uqa Israel uqau hatu houqa qe ifulifuldeanah. Asiria hatu gude hoage Israel uqau hatu gude dana aid mati bahin aqadecian almemecian, hoageu elcel meumeu ho unug feleu oade fale nunueic, Israel hatugu elcel mati bahin ho namadecian iadeinah.

Asiria hoage, Israelde hanuqec ilo dana ho unugcai, odan dana aid ehewanacai hondeg ho unugcai, odan dana aid abi gug filfil houqacan doccai bilein hondeg ho unugcai, hoage ho unug oadeic Asiria nueinah. Asiria hoage Israelde dana aid ehewanacai qitigi bahin ho, hoage qei aqadecian almeinahcai hoage adi qa hoage Israel uqau hatu hogu odecet bileinah.

Ode Asiria hoage dana aid filfil gude oade faheic, mil Israel uqau hatu nieanahgu hogu uladecian hoage hogu bileinah. Dana aid filfil gude fahadein hoage, taun ben ben ho alocie ifulifuldec ho, hoage haun ehelawe cecefadeic, hoage Israelde dana aid ini hogu uladecian bilein hoagecai hoage oan oan einah. Israelde dana aid hoage, dana aid hoil gude fahadein hoagecai oan oan eciafa, hoageu gude sihul alesoin houqa, hoage ho Samariade dana id ec madadecia.

Odan Iuda uqau hatu gude dana aid hoage, Ifan uqa Israel uqau hatu gude dana aid hoage, qei Ifanun wawa cecefeic, hoage uqa ou qei totode odein houqacan hoage qan bi oin houqa, Iudade dana aid hoage feinah. Odan hoqa, hoage odecet adi kadan bihainima mumudeic, hoage Keinan ageu manecet filfil hofa binainima mudeinah. Ifan uqa le ahun madec dana uqadeu suladean nueic, hoage ho ulenigan madadeinah. Odan hoqa, hoage le ho dahmecun ho uleinah.

Asiria hoage Israel uqau hatu ho qe ifulifuldein ho, 100 iar ode nue hedeanafa, Ifan uqa Babilon uqau hatu nieadecia houqau king ho weni Nebukadnesa, odan uqa Iuda uqau hatu ho utumdeian hocon, Ifan uqa sulduleanah. Babilon hatu houqa, hatu odacat acal hoageu hatu ilo ben gagadi ahulec bileanah. Iudade king uqa Nebukadnesa uqau abi dana bileutete, uqa men aci benben Nebukadnesa iar osahi osahi gaid ode uteian hocon uqa ois ec madeanah.

Odan hoqa, iar ganicafa adi nueanafa, Iuda uqau hatu gude King uqa Nebukadnesa facalisanig bibile uqau isdec ho totodecun uleanah. Ode hocon Babilon hoage haun ehelawe faheciafa, Iuda uqau hatu ho utumdeinah. Hoage Ierusalem taun ben houqa ociafa, gun lo ho alocie ifuliful dedeic, hoage elcel meumeu taun ben hogudecai, gun lo hogude ho oade fale Babilon nueinah.

Iudade King uqa Nebukadnesa facalisanig bilecun ulean houqacan, uqa qan bi feian hocon, Nebukadnesa uqau fan adec dana hoage, Iuda hatu uqau King houqa melah ho, uqa amuggu bahin qecian almemean, hoage king houqa amug afulecian uqa amug ho galuc meanah. Ho odeciafa, hoage king houqa Babilon hogu kalabusgu bile almeian hocon mehule nueinah.

Nebukadnesa uqa, fan adec dana uqadeucai hoage, Iuda uqau hatu gude dana aid hoage unugcai bahin oade Babilon nunueic, hoage dana aid ehewancai qitigi bahin hoage adi qa, hoage ninieic abigu eli cefenigan hocon uculadeic nueinah. Etacub ho niean sain houqa, Ifan uqau dana aid hoage, Ifan Mil Abraham Oian Le Qel Qetean hogude, hoage esiadecgu masa hoageu ho ulude nue masa hoilgu bilecia, ode hocon hoage esiadecgu masa hoageu ho ulude hoilgu nue bilecia ec madecia.

Ifan uqa dana aid uqadeu hoage silail hoageuan, uqa hoage qan bi fenigan hocon uqa odean, hoage esiadecgu nueic masa hoilgu bileinah. Odan hoqa, uqa hoagecen, o, uqau le made qel qetec houqacan, uqa qei dahu eleanah. Ifan uqa odecet adi, uqa dana aid uqadeu ho ofadede, uqa le ahun madec dana uqadeu hoage le adeanafa, hoage le ho o nueic dana aid madadeinah. uqa hoage esi 70 iar hedebafa, hoage esi ehelawe, Ifan Mil Abraham uteian Le Qel Qetean hogu nuenigan ec, uqa le madeanah.

Odean 70 iar ode nue hedeanafa, Pesia uqau hatu gude King weni Sairus, uqa Babilon hatu houqa qean qei meanah, odean hocon, hatu alcal hoageu ilo hatu ben weni Pesia ecia, uqa hatu ilo ben weni Babilon ecia houqau aben ho uqa oanah. Sain hogu, Israelde dana aid hoagecen ho, hoage Iuda dana aid ec madadeinah, odan hoageu gude mati bahinag hoageu bilec ho, Babilon hogu bileinah. Iuda dana aid toia ohcai hoage adi qa, hoage Iuda mil houqacan hoage qei dahina eleanah.

Hatu alcal hoageu hatu ilo ben houqa weni Pesia. Odan Pesia uqa gagadi odeccai, odean hoqa, uqa dana aid hatu hoil hoil gude acade oadeian ho, uqa wacu qecgu hoage ofadeanah. Sairus uqa Pesia hatu houqau king sosoafa bahin, uqa Iudade dana aid ini hoage ehelawe Iuda nuenigan isdefeic, hoage ois Pesia uludeic ehelawe Iuda nuenigan ec ho madadeanah. Uqa hoage gun lo ho ehele cefenigan hocon, uqa men aci hofa adeanah! Hocon 70 iar hoage masa ulude nue hoilgu bilein ho hedeanafa, Iuda dana aid am alanig adi qa, hoage haun ehelawe Iuda hatugu Ierusalem taun ben hogu nueinah.

Sain dana aid hoage Ierusalem alewaciafa, hoage Gun Lo ho ehelawe cecefeic, hoage taun ben ho waubdec gelgel hofa cefeic alideinah. Hoage ois dana aid leih facalisina bileinah, odean hoqa, hoage ihoc haun ehelawe Ifan Mil Abraham uteian Le made Qel Qetec hogu bibileic, hoage Gun logu cufu fefeic bileinah.

Ifan uqacan totqec louqec heqa: 2 King 17; 24 - 25; 2 Chronicles 36; Esra 1 - 10; Nehemaiah 1-13 hogude